36-hadovaha žychara Viciebska Vadzima Jermałoviča zatrymali 14 krasavika niedaloka ad dziaržaŭnaj miažy ź Litvoj. Mužčyna znachodziŭsia na padpiscy ab niavyjeździe. Na jaho była zaviedzienaja kryminalnaja sprava za abrazu pradstaŭnika ŭłady (art. 369 KK). Pa viersii śledstva, jon u telehram-čacie «Vitebsk_Juh» abraziŭ kamandzira minskaha AMAPa pałkoŭnika Dźmitryja Bałabu, paviedamlaje «Viciebskaja Viasna».
Jak śćviardžajecca, paviedamleńnie ŭ čacie było raźmieščanaje 24 śniežnia 2020 hoda. Kryminalnuju spravu raspačali 20 sakavika 2021 hoda. U hety ž dzień Vadzima Jermałoviča ŭziali pad vartu, a ŭ jahonym domie ŭčynili pieratrus: kanfiskavali kampjutar, noŭtbuk, netbuk, fłeški, mabilny telefon, a taksama hrošy. Adnak praz 72 hadziny pa zatrymańni (23 sakavika) mužčynu vyzvalili ź izalatara pad padpisku ab niavyjeździe.
14 krasavika Vadzim Jermałovič byŭ znoŭ zatrymany niepadaloku ad miažy Biełarusi ź Litoŭskaj Respublikaj.
«Jaho zatrymali na miažy ź Litvoj. Miažu jon nie pierasiakaŭ. Miesca nam nie ahučyli», — raskazała maci zatrymanaha Taćciana.
«Paśla hetaha jaho adpravili ŭ SIZA. Nijakich spatkańniaŭ nam nie abiacali, skazali nielha nam pa hetym artykule. A pieradačy nosim», — dadała.
Paśla prezidenckich vybaraŭ Vadzim Jermałovič braŭ udzieł u pratesnych akcyjach, jakija prachodzili ŭ horadzie. Na adnoj ź ich byŭ zatrymany i aštrafavany pa artykule 23.34 KaAP. Pavodle maci, u Vadzima «abvostranaje pačućcio spraviadlivaści» i jon nie moh vynieści taho, «što robicca zaraz u krainie, hety žach».
Niezadoŭha da zaviadzieńnia kryminalnaj spravy Vadzim Jermałovič zvolniŭsia z pracy.
«Źbiraŭsia jechać u Polšču na pracu. Užo pra ŭsio damoviŭsia. I miesca pracy, i strachoŭka była apłačanaja, i viza adkrytaja. Usio było padrychtavana…» — kaža spadarynia Taćciana.
Ciapier Vadzim Jermałovič znachodzicca za kratami ŭ viciebskim SIZA-2.
Ciapier čytajuć
Były ministr kultury Rusłan Čarniecki znajšoŭ sabie padpracoŭku9
Kamientary