U Japonii paśpiachova dziejničaje kamanda babul-čyrlidarak
Kažuć, jany nie mienš enierhičnyja, čym padletki.
Na pieršy pohlad, japonskaja kamanda čyrlidarak «Pom Pom» padobnaja da inšych takich kalektyvaŭ, u jakich udzielničajuć maładyja dziaŭčaty. Ale na samoj spravie ŭ hety kalektyŭ biaruć tolki žančyn, nie małodšych za 55 hod.
U 2019 hodzie siaredni ŭzrost 24 udzielnic «Pom Pom» składaŭ 72 hady. Paśla pačatku pandemii kolkaść kamandy źniziłasia da 17 čałaviek, piša inews.co.uk.
Kab trapić u kamandu, žančynam treba prajści prasłuchoŭvańnie, być hatovymi ŭdzielničać u štotydniovych treniroŭkach i naviedvać spabornictvy ŭ roznych krainach śvietu. Kali «Pom Pom» tolki była stvoranaja, jana składałasia ź piaci žančyn, ale potym papularnaść kamandy pačała raści.
Pry hetym nie ŭsie japoncy dobra staviacca da čyrlidarak stałaha ŭzrostu. Šmat u čym heta źviazana ź ich adzieńniem dla vystupleńniaŭ — kamanda addaje pieravahu plisiravanym mini-spadnicam i bliskučym pamponam. Japonskija tradycyi patrabujuć, kab ludzi viali siabie tak, jak heta pryniata ŭ ich uzroście, tamu stałyja čyrlidarki časam čujuć u svoj adras admoŭnyja kamientary.
Tym nie mienš, japonskija ŭłady navat uzhadvajuć kamandu ŭ śpiecyjalnych brašurach pra aktyŭnaść stałych ludziej. Dla Japonii pytańnie aktyŭnaści starejšaha pakaleńnia vielmi važnaje, bo ažno kala 29% žycharoŭ krainy dasiahnuli ŭzrostu 65 hadoŭ. Pa padlikach, praz 15 hod jany buduć składać tracinu nasielnictva.
Japoncy ŭ hadach nadajuć uvahu i inšym vidam aktyŭnaści. Siarod ich jość špacyry, himnastyka tajso, to-bok prostyja fizičnyja praktykavańni, nakiravanyja ŭ tym liku na raściažku, i hiejtboł — kamandny sport na asnovie krakieta.
Ciapier čytajuć
Druhi vajskoviec, jaki zahinuŭ pry avaryi MAZa pad Asipovičami — 21‑hadovy tenisist ź Viciebska2
Kamientary