Pastaŭki biełaruskaj małočnaj pradukcyi znoŭ mohuć być prypynieny, zajaŭlaje Rasspažyŭnahlad
Fiederalnaja słužba pa nahladzie ŭ śfiery abarony pravoŭ spažyŭcoŭ i dabrabytu čałavieka (Rasspažyŭnahlad) znoŭ pavialičyła śpis małočnaj pradukcyi ź Biełarusi, jakuju dazvolena ŭvozić u Rasiju. Adnak pastaŭki mohuć być prypynieny, kali biełaruski bok nie budzie vykonvać pratakoł damoŭlenaściej.
«Mnoju razhledžany treci śpis biełaruskaj pradukcyi, jakaja dazvolena da ŭvozu zhodna z padpisanym pratakołam. Heta jašče pryblizna 130 najmieńniaŭ małočnaj pradukcyi roznych vytvorcaŭ», — pryvodzić RIA Novosti słovy kiraŭnika Rasspažyŭnahlada, hałoŭnaha sanitarnaha ŭrača Rasii Hienadzia Aniščanki.
Adnak, pavodle jaho słoŭ, biełaruskija pradpryjemstvy i pastaŭščyki nie śpiašajucca pieradavać uzory pradukcyi, što ŭvozicca, na ekśpiertyzu. A heta źjaŭlajecca adnoj z abaviazkovych umoŭ pratakoła pamiž Rasijaj i Biełaruśsiu.
«Kali heta budzie praciahvacca, to terminy, jakija abumoŭleny pratakołam, nie buduć vykanany. Chaciełasia b papiaredzić biełaruski bok ab tym, što, kali nie buduć pryniaty miery, my nie tolki nie dazvolim novyja, ale nie vyklučajem, što prypynim try śpisy, pa jakich užo zavozicca abo pačnie zavozicca ŭ chutkim časie kisłamałočnaja pradukcyja», — zajaviŭ Aniščanka. Pavodle jaho słoŭ, adpaviednaje paviedamleńnie ŭžo nakiravana ŭ Minsielhascharč Biełarusi.
Pastaŭki biełaruskaj małočnaj pradukcyi ŭ Rasiju byli praktyčna poŭnaściu spynieny ŭ pieršaj dekadzie červienia, bo biełaruskija vytvorcy i pastaŭščyki nie pieraaformili dazvolnuju dakumientacyju ŭ adpaviednaści z novym techničnym rehłamientam na małako i małočnuju pradukcyju. Pad zabaronu trapili bolš za 1,2 tys. najmieńniaŭ pradukcyi; afarmleńnie dakumientaŭ jašče na 200 vidaŭ było prypyniena.
16 červienia padčas čarhovaha raunda pieramoŭ bakam udałosia damovicca ab tym, što biełaruskija vytvorcy i pastaŭščyki buduć pryvodzić u paradak dakumientacyju na pradukcyju, jakaja pastaŭlajecca ŭ Rasiju. Na hety pieryjad Rasspažyŭnahlad zdymaje abmiežavańni ź niekatorych vidaŭ pradukcyi pavodle zahadzia ŭzhodnienych śpisaŭ.
Pastaŭki adnavilisia 18 červienia. U pieršym śpisie było 139 najmieńniaŭ biełaruskaj małočnaj pradukcyi. 23 červienia byŭ zaćvierdžany druhi śpis sa 134 najmieńniami.
Kamientary