Heta nie futurystyčny ramont, a vynik patopu. Historyja adnoj kvaternaj katastrofy FOTA
Tak pad ciažaram vady pravisła naciažnaja stol. Try dni santechniki z ŽESa nie mahli dajechać, kab razabracca z avaryjaj.
Historyja zdaryłasia ŭ Minsku pry kancy žniŭnia. Haspadar kvatery Alaksiej, jaki zatapiŭ susiedziaŭ, zhadvaje, jak usio było.
«Maje kvataranty a 6-j ranicy dasłali paviedamleńnie, što źvierchu zalivaje. U mianie truba pad stollu prachodzić, ja adrazu padumaŭ, što ź joj prablema — prarvała. Vada liłasia sa stoli prosta ŭ vannu. Niešta ściakała pa ścianie susiedziam źnizu.
Kvataranty vyklikali słužbu 115 dva razy. Zajaŭka była terminovaja. Ale słužba nie pryjechała.
Uhavaryŭ svaich santechnikaŭ vyručyć. Jany pryjšli ŭviečary, časova puścili šłanh ad truby ŭ vannuju. Ale naturalna susiedziaŭ źnizu za ŭvieś dzień užo zaliło.
Dva dni vada liłasia ŭ vannuju. Znajomyja santechniki pryjechali ŭ paniadziełak i ŭsio vypravili (na vychodnych jany nie mahli, źjazdžali za horad). A sa słužby nichto tak i nie pryjšoŭ.
Kolki daviadziecca kampiensavać susiedziam za sapsavany ramont, pakul nie viedaju. Jašče ŭ pracesie vyśviatleńnia.
I heta ž u mianie nie pieršy vypadak. Druhi raz za paŭhoda susiedziaŭ zataplivaju. U minuły raz u vańnie z-pad krana palacieła prakładka. Ale spačatku było niezrazumieła, što zdaryłasia. U 115 zvanili, pryjechali ich śpiecyjalisty, skazali, što truba tresnuła i jany ničoha nie mohuć zrabić. Užo paśla maje santechniki pahladzieli i akazałasia, što prosta prakładku treba pamianiać. Tady susiedziam 300 rubloŭ kampiensacyi pieraličyli za patop».
«Naša Niva» patelefanavała ŭ słužbu 115. Voś što nam adkazali:
«Zajaŭka była ad 20 žniŭnia. Data ŭ mianie staić — 24 žniŭnia: mienavita tady prychodzili z ŽESa. Zajaŭka była zakrytaja, pakolki nie byŭ dadzieny dostup u kvateru. 20 žniŭnia była piatnica. 21 i 22 u ŽESie vychodnyja. Mabyć, tamu tolki 24 pryjšli».
U ŽESie Zavodskaha rajona dyśpietčar pa apracoŭcy zajavak adkazaŭ toje samaje.
«Prychodziać terminova santechniki na praciahu 30-60 chvilin, kali jany bolš-mienš volnyja. Nichto ž nie budzie kidać avaryju i jechać na inšy vyklik. Pa pytańni ab kampiensacyi — treba vyklikać majstra, jaki acenić, žychary vinavatyja ŭ avaryi abo ŽES. I tady, sychodziačy z hetaha, vyrašać», — dadaŭ dyśpietčar.
Ciapier čytajuć
Błohier Siaroha z Rasii pryjechaŭ na Zybickuju z kachanaj błohierkaj Aniečkaj. Vynik: źbity im biełarus u komie, a Siaroha na 5,5 hoda za kratami32
Kamientary