Kožny čaćviorty biełarus maje zališniuju vahu abo pakutuje ad atłuścieńnia, paviedamiła na pasiadžeńni kruhłaha stała ŭ Minsku 30 lipienia ŭrač‑endakrynołah Alena Šyško.
Jana padkreśliła, što heta niedakładnyja źviestki, pakolki ŭ Biełarusi isnuje prablema ŭliku ludziej, jakija majuć zališniuju vahu: u miedycynskaj dakumientacyi ŭkazvajucca pieradusim inšyja zachvorvańni pacyjenta, a atłuścieńnie abo zališniaja vaha zhadvajucca ŭ apošniuju čarhu.
Miž tym, pavodle słoŭ Šyško, atłuścieńnie i zališniaja vaha pryvodziać da zachvorvańniaŭ sardečna‑sasudzistaj sistemy, aporna‑ruchalnaha aparatu, straŭnikava‑kišačnaha traktu, a taksama da ankałahičnych zachvorvańniaŭ.
Pavodle infarmacyi endakrynołaha, 90% chvorych na cukrovy dyjabiet 2‑ha typu pakutujuć ad atłuścieńnia. Praciahłaść žyćcia čałavieka, jaki pakutuje ad atłuścieńnia, skaračajecca na dva hady, a kali jano ŭskładniena cukrovym dyjabietam, to na vosiem hadoŭ.
Atłuścieńnie ŭ Biełarusi maładzieje, zaŭvažyła Šyško. Kožny dziesiaty školnik maje zališniuju vahu abo atłuścieńnie, adnak u paraŭnańni z krainami Zachodniaj Jeŭropy i ZŠA heta niadrenny pakazčyk. U śviecie prykładna 122 młn. dziaciej školnaha ŭzrostu majuć zališniuju vahu. Urač padkreśliła, što prablemu zališniaj vahi vyklikaje niapravilnaje charčavańnie. U dziaciej jana ŭzmacniajecca rańnim pałavym vyśpiavańniem.
Jak adznačyła Šyško, u Biełarusi niedastatkova infarmacyi ab pravilnym charčavańni. Imknučysia da aptymalnaj vahi, ludzi časta sadziacca na dyjety, jakija padryvajuć zdaroŭje.
Pavodle słoŭ nutrycyjołaha‑dyjetołaha, majstra mižnarodnaha kłasa pa fitniesie Śviatłany Kašyckaj, u svajoj praktycy jana časta sustrakajecca ź ludźmi, jakija nie viedajuć, kudy źviarnucca dla vyrašeńnia prablemy zališniaj vahi.
Šmat u čym prablema źviazana z tym, što ŭ krainie nie rychtujuć śpiecyjalistaŭ pa charčavańni, padkreśliła Kašyckaja. Dla atrymańnia kvalifikacyi nutrycyjołaha‑dyjetołaha nieabchodna vučycca za miažoj, naprykład u Rasijskim instytucie charčavańnia.
Zdarajecca, što parady ŭ halinie dyjetałohii dajuć ludzi, jakija «prajšli ŭsiaho tolki adnadzionny kurs pa zdarovym charčavańni». Akramia taho, ludziam, jakija majuć niejkija zachvorvańni na fonie zališniaj vahi abo atłuścieńnia, harmanalnyja parušeńni, nieabchodna źviartacca da ŭračoŭ‑endakrynołahaŭ.
Alena Šyško adznačyła, što časta lačyć toje abo inšaje zachvorvańnie, naprykład arteryjalnuju hipiertenziju, možna tolki razam z panižeńniem vahi. Adnak u sistemie dziaržaŭnaj miedycyny na pryjom adnaho pacyjenta endakrynołahu advodzicca ŭsiaho 12 chvilin: hetaha niedastatkova, kab dać jakasnuju kansultacyju pa pravilnym charčavańni.
Kamientary