Pinskaja kampanija pastaŭlała ŭ Biełaruś śpisanuju miedtechniku. U tym liku defibrylatary — prybory dla adnaŭleńnia pracy serca. Machlary padrablali hod vypusku.
Viarchoŭny sud nie admianiŭ prysudu Bresckaha abłasnoha sudu ŭ dačynieńni da supracoŭnikaŭ «Miedtechniki» na čale z dyrektaram Stanisłavam Naryvončykam. Pinskaja kampanija pastaŭlała ŭ Biełaruś śpisanuju miedtechniku. U tym liku defibrylatary — prybory dla adnaŭleńnia pracy serca. Machlary padrablali hod vypusku.
U sakaviku hetaha hodu ich abvinavacili ŭ ździajśnieńni machlarstva arhanizavanaj hrupaj u asabliva bujnych pamierach. Pavodle abvinavačańnia, jany falsifikavali dakumienty i realizoŭvali balnicam miedtechniku nieviadomaha pachodžańnia i nieprydatnuju dla vykarystańnia. Vypadak redki ŭ kryminalnaj praktycy i, badaj, adziny ŭ kryminalnaj praktycy Biełarusi. Śledstva skončyłasia, ale pytańni pakul zastalisia.
Kryminalnaja sprava była zaviedziena ŭ červieni 2007 hodu. Orhany śledstva zajavili, što firma, jakoj kiravaŭ Naryvončyk, sfalsifikavała i realizavała na terytoryi Biełarusi 315 adzinak miedycynskaj techniki, «zahadzia nieprydatnaj da ekspłuatacyi». U śpisie značylisia defibrylatary — prybory dla ŭznaŭleńnia sardečnaha rytmu, dezinfikavalnaje abstalavańnie, aparaty dla pieraryvańnia ciažarnaści, dla karekcyi dziciačaj kasavokaści i inš. Pavodle śledstva, ahułam abvinavačanyja zavałodali hrašovymi srodkami na sumu bolš za 300 miljonaŭ rubloŭ.
Dziaržabvinavačańnie vyjaviła schiemu, pavodle jakoj pracavała «złačynnaja hrupa»: jany skuplali za miažoj śpisanuju miedtechniku i paśla jaje «amałodžvali». Stavili bolš poźni hod vypusku, a dakumienty padrablali. Takim čynam, abstalavańnie pryznavałasia prydatnym da ekspłuatacyi i pradavałasia biełaruskim miedycynskim ustanovam.
Śledstva ŭsie 315 adzinak techniki apiačatała. Zaraz pavodle rašeńnia sudu ich pavinny źniščyć. Adnak niekatoryja balnicy prosiać pakinuć abstalavańnie, bo ničoha lepšaha naŭzamien nie majuć.
Banda ci adzinočki?
Sprečnym momantam u hetaj spravie źjaŭlajecca toj fakt, što Naryvončyku i jahonym supracoŭnikam inkryminavali ździajśnieńnie złačynstva «ŭ składzie arhanizavanaj hrupy». Takoje abvinavačańnie abciažvaje vinu. Bok abarony sprabavaŭ davieści, što dziejańni abvinavačanych nie byli źviazanyja adzinym namieram i nichto nie abhavorvaŭ umovy ažyćciaŭleńnia złačynnaj dziejnaści, taksama nie raźmiarkoŭvaŭsia i prybytak ad realizacyi vyrabaŭ sa źmienienaj techničnaj dakumientacyjaj.
Łyžka dziohciu ŭ bočcy miodu
Pinskaja «Miedtechnika» była najbujniejšym pastaŭščykom tannych aparataŭ, pra što śviedčyli ŭ sudzie vodhuki dziesiatkaŭ lačebnych ustanovaŭ. Darečy, inkryminavanaja technika sa źmienienymi pašpartami za toj pieryjad skłała mienš za 1% tavarazvarotu.
Stvoranymi Naryvončykam firmami praz roznyja padatki ŭ biudžet adličalisia tysiačy dalaraŭ u dzień. Siońnia praz kanfiskacyju majomaści firma faktyčna padlahaje źniščeńniu. Niekalki sotniaŭ ludziej straciać pracu. Nie dapamahło Naryvončyku i toje, što jon nie raz pryznavaŭsia ŭładami najlepšym pradprymalnikam Brestčyny i krainy ŭ śfiery miedabstalavańnia.
U sudzie abvinavačany Naryvončyk pryznaŭ svaju vinu. Ale tolki ŭ tym, što niedahledzieŭ za padnačalenymi, jakija padrablali dakumienty. Abarona śćviardžaje, što nielha skazać, nibyta sama technika była sfalsifikavanaja. Pavodle pakazańniaŭ pracaŭnikoŭ, jakija padrablali dakumienty (u čym pryznavalisia ŭ sudzie), nijakich źmienaŭ u techniku nikoli nie ŭnosiłasia. Realizavanaja technika, ekspłuatacyja jakoj praciahvałasia da 6 hadoŭ, paśpiachova funkcyjanavała i nikoli nie vyklikała narakańniaŭ z boku daktaroŭ i pacyjentaŭ.
«Orhany nie pamylajucca»
Advakaty asudžanych da apošniaha spadziavalisia, što Viarchoŭny Sud źmienić rašeńnie Bresckaha sudu.
Advakat Stanisłava Naryvončyka V.Sazančuk miarkuje, što ŭ spravie pinskaj «Miedtechniki» spracavaŭ pryncyp «Orhany nie pamylajucca»: «Nakolki ja razumieju, u svoj čas kiraŭniku dziaržavy było dakładziena, što, maŭlaŭ, handlavali byłym va ŭžyvańni, nieprydatnym chłamam . I kiraŭnik dziaržavy nie moh nie skazać: «Razabracca i pakarać». I ja b na jaho miescy tak skazaŭ. Ale kali razabracca, što heta nie zusim tak, što ŭsio złačynstva tolki ŭ tym, što źmianili pašpart, instrukcyju pa ekspłuatacyi, — zhładžvaje spravu advakat. — Usie techničnyja paramietry zastalisia tymi ž, tolki hod u joj źmianili. Dyk treba suadnosna karać za heta, kali ŭ hetym jość skład złačynstva, a nie za niejki kradziež, jakoha i blizka tut niama. Hetaja sprava ŭ svoj čas była ŭzbudžanaja namieśnikam hienieralnaha prakurora zusim pa inšym artykule, pa artykule 250 «Pradstaŭleńnie niedakładnaj infarmacyi pra tavary», jaki b dazvoliŭ vyjści ź situacyi, što i orhany nie pamylajucca, i ŭ toj ža čas ludzi nie pakaranyja za toje, čaho nie ździajśniali».
Sazančuk miarkuje, što svaju rolu mahła adyhrać i rezalucyja, dadzienaja byłym ministram unutranych spravaŭ Uładzimiram Navumavym. Na dakumientach, źviazanych sa zvarotam Naryvončyka da kiraŭnika dziaržavy z prośbaj spynić u dačynieńni da jaho kriminalny pieraśled, Navumaŭ napisaŭ «Nachabnik».
Paśla taho zvarotu da prezidenta byli dadatkova zatrymanyja jašče dvoje supracoŭnikaŭ firmy.
U toj ža čas Alaksiej Bahamazaŭ, były supracoŭnik «Miedtechniki» vystupaŭ u Viarchoŭnym Sudzie z prośbaj pakinuć prysud bieź źmienaŭ.
«Navošta chłopca sadžać u turmu?»
Akramia Stanisłava Naryvončyka roznyja terminy abmiežavańnia svabody atrymali jašče piaciora supracoŭnikaŭ firmy: ad abmiežavańnia svabody biez nakiravańnia ŭ vypraŭlenčuju ŭstanovu (taki prysud vynieśli Bahamazavu, jaki spryjaŭ śledstvu) i 3, 6 i 8 hadoŭ pazbaŭleńnia svabody inšym.
Na pasiedžańnie Viarchoŭnaha Sudu pryjšła maci adnaho z asudžanych Juryja Kalinoŭskaha, jaki atrymaŭ 3 hady ŭzmocnienaha režymu: «Jon mienš za ŭsich prapracavaŭ na hetaj pracy… I nasamreč nijakaj bandy tam nie było, nijakaj zmovy… Jura vučyŭsia va univiersitecie… Toje, što jon podpisy staviŭ, mnohija jaho podpisy — navat śledčy sam kazaŭ — byli padroblenyja. Kali jon vinavaty, to choć by jaki‑niebudź štraf dali, choć umoŭna jaho pakarali. Navošta chłopca sadžać u turmu?»
Hety kamientar maci Ju.Kalinoŭskaha davała karespandentu «NN» 24 lipienia. 26 lipienia žančyny nie stała — nie vytrymała serca.
Advakaty asudžanych nie zdajucca i źbirajucca nakiroŭvać skarhi ŭ paradku nahladu ŭ Viarchoŭny Sud.
Ciapier hałoŭnaje śledčaje ŭpraŭleńnie MUS rasśleduje jašče adnu spravu ŭ dačynieńni da saŭdzielnikaŭ, dziakujučy jakim pinskaja «Miedtechnika» nibyta mieła nadziejnaje prykryćcio «źvierchu». U zonu ŭvahi traplajuć niekatoryja čynoŭniki i pradstaŭniki orhanaŭ. Ci skončycca heta sudovym pracesam — nieviadoma. A varta było b.
Kamientary