Najlepšy spartsmien Biełarusi, jaki patrapiŭ u apału za jazdu niećviarozym, raskazaŭ «Źviaździe» pra svoj udzieł u dziciačym carkoŭnym chory, płany pabić svoj ža suśvietny rekord i pra toje, jak jamu žyviecca na 450 tysiač rubloŭ u miesiac.
Najlepšy spartsmien Biełarusi, jaki patrapiŭ u apału za jazdu niećviarozym, raskazaŭ «Źviaździe» pra svoj udzieł u dziciačym carkoŭnym chory, płany pabić svoj ža suśvietny rekord i pra toje, jak jamu žyviecca na 450 tysiač rubloŭ u miesiac.
Lepšy štanhist płaniety 21-hadovy biełarus Andrej Aramnaŭ viartajecca da ciažkich trenirovak. Uzimku Andrej patrapiŭ u skandalnuju situacyju. Atlet vypiŭ piva ŭ piceryi i sieŭ za rul svajoj «BMV». Niechta z naviedvalnikaŭ patelefanavaŭ u DAI i «zakłaŭ» štanhista. U vyniku atleta pakarali štrafam u piać miljonaŭ dźvieście tysiač rubloŭ. Za heta ž Aramnava pazbavili stypiendyi ŭ 15 miljonaŭ rubloŭ. Kali vybuchnuŭ skandał [Aramnava łavili dvojčy na rulom u niećviarozym stanie – NN], ad Andreja Aramnava mnohija adviarnulisia. Jon źjechaŭ u Barysaŭ da svajho asabistaha treniera. Ale dniami Andrej usio ž viarnuŭsia u centr alimpijskaj padrychtoŭki «Stajki», kab znoŭ ščylna treniravacca. Tudy ž naviedać čempijona prybyŭ i karespandent «Źviazdy».
— Jon vietlivy i dobry, duša kampanii, ničoha drennaha pra Andrušu nie pišycie, — sustreła mianie supracoŭnica spartyŭnaha kompleksu ciažkaj atletyki ŭ «Stajkach». — Ranišniaja treniroŭka skončyłasia, šukajcie jaho ŭ hascinicy.
Jak tolki ja žyŭcom pabačyŭ dabradušnaha štanhista, to zrazumieŭ: pa-mojmu, historyi pra Aramnava-chulihana i Aramnava-złodzieja — heta žurnalisckija mify.
«Rychtujusia ŭstanavić try novyja suśvietnyja rekordy»
Rostam Aramnaŭ 173 santymietry, trymaje vahu ŭ 105 kh. Žylistym kačkom spartsmiena nie nazavieš. Choć mienavita jon ustanaviŭ na minułaj alimpijadzie ŭ Piekinie novy suśvietny rekord. Andrej nie padaje vyhladu, što ŭ jaho siońnia ciažkija časy i ŭpeŭniena dzielicca hrandyjoznymi płanami:
— Chaciełasia b ustanavić try novyja suśvietnyja rekordy.
— Kudy ŭžo bolš? — zdziviŭsia ja.
— Ciapier siłaŭ mnoha, vielmi dobra adpačyŭ paśla Alimpijady. Uznaŭlajusia ź vielmi dobraj chutkaściu, pracuju ź vielmi surjoznaj vahoj. Miarkuju, što na najbližejšym čempijanacie respubliki praz paŭtara miesiaca pakažu surjozny vynik. A 17 listapada na čempijanacie śvietu paŭtaru svoj alimpijski pośpiech. Dumaju, što ŭzimku, paśla čempijanatu śvietu, ja budu z tryma załatymi miedalami...
Vyśviatlajecca, što hałoŭny pryceł Aramnava — heta čempijanat Jeŭropy, jaki pavinien adbycca ŭ Minsku ŭ nastupnym hodzie.
— Na Baćkaŭščynie ja chacieŭ by pravieryć siabie na tryvałaść, ustanavić takija rekordy, jakija bolš nichto pabić nie zmoža. Svaim ziemlakam ja chacieŭ by pakazać, što takoje štanha i chto taki Andrej Aramnaŭ. Kab nito nie słuchaŭ nijakich plotak i ŭsie viedali mianie ŭ tvar. Chaciełasia b być mienš viadomym u płanie niehatyvu. Płanaŭ vielmi šmat napieradzie, treba ŭznaŭlać svaju hodnaść, troški zaplamlenuju roznaj łuchtoj. Ja budu dumać tolki ab sporcie, bieź jaho nasamreč navat niecikava.
— I što, ty ciapier cełymi sutkami znachodzišsia ŭ «Stajkach»?
— Uznimajusia ŭ 8.30. U 8.45 idu na pastrajeńnie. U 9.00 — na śniadanak. Da 12.00 maju asabisty čas, mahu trochi dramanuć, ŭznavić siły. Potym — ranišniaja treniroŭka. Jana vielmi ščylnaja, daje dobry tonus. Ciapier dadaŭ i druhuju treniroŭku ŭ dzień, jana pačynajecca ŭ 18.00. U volny čas pracuju nad saboj.
«Ros narmalnym dziciem, śpiavaŭ u carkoŭnym chory»
Pytajusia ŭ Andreja, jak siarod miljonaŭ asiłkaŭ mienavita jon zdoleŭ stać samym dužym. Bo nie treba mieć arlinaje voka, kab ubačyć — Aramnaŭ na Alimpijadzie ŭ Piekinie padniaŭ štanhu, jak hantelu.
— Usio ŭ mianie było narmalna, ź dziacinstva zvyčajnym dziciem ros,- — usmichajecca Andrej. — Śpiavaŭ u carkoŭnym chory svajho prychoda.
— Jak u carkoŭnym chory?
— Maci prychodziła ŭ carkvu. A mianie pakidała tam ža ŭ dziciačaj hrupie. My śpiavali. Niekatoryja rečy ja pamiataju i siońnia, ale vam praśpiavać nie mahu, daŭno nie sprabavaŭ. Ja čałaviek-viernik, absalutna. Liču heta narmalnym. Biez hetaha niama narmalnaha adčuvańnia žyćcia. A tak usio ŭsprymaješ adekvatna. Ciapier z-za napružanaha hrafika redka chadžu ŭ carkvu. Ale pra Boha zadumvajusia časta. Praŭda, pierad tym, jak padniać štanhu, dumaju tolki ab technicy i svaim samaadčuvanni.
— A kali ty adčuŭ, što možaš stać čempijonam?
— Dziakuj majmu susiedu, Viktaru Hrodzie. Jon spakojna kazaŭ mnie: u 20-hadovym uzroście ty ŭ pryncypie zmožaš pieramahčy na Alimpijadzie. Jaho słovy dakładna realizavalisia. Viktar sam byŭ talenavitym ciažkaatletam, ale kaliści atrymaŭ surjozuju traŭmu nahi. Jon taksama chacieŭ stać alimpijskim čempijonam, ale nie atrymałasia z-za traŭmy. Jon pryvioŭ mianie ŭ zału ciažkaj atletyki ŭ dzieviacihadovym uzroście. Ja imhnienna pačaŭ pakazvać dobry vynik. Z samaha dziacinstva ja byŭ hatovy stać alimpijskim čempijonam.
«U try hady vyciahnuŭ starejšaha brata z raki»
— Tvaje byłyja školnyja nastaŭniki kažuć, što Aramnaŭ vielmi mocna adroznivaŭsia ad inšych dziaciej.
— Z adnaho boku, ja byŭ samym zvačajnym. Z inšaha boku — asablivym. U try hady vyratavaŭ brata ad hibieli. Z im my abodva naradzilisia 17 krasavika. Tolki jon starejšy na čatyry hady. Žyli my kala Biareziny i adnojčy pajšli razam na rečku. Ja tolki navučyŭsia narmalna chadzić. U tyja časy kala raki stajali mosciki, ź jakich žančyny myli bializnu. U moscikach vyrazali śpiecyjalnyja dzirki dla pałaskańnia. I brat pravaliŭsia ŭ takuju dzirku. Ale zdoleŭ vynyrnuć z inšaha boku, a ja schapiŭ brata za ruku i zmoh jaho ŭtrymać, pakul nie prybieh niejki mužčyna i nas dvaich adtul nie dastaŭ. Ujaŭlaješ, jaki šok ja adčuŭ u try hady. Tady my prosta padumali: «Dobra, što ŭsio abyšłosia». A z časam ja asensavaŭ, što, mahčyma, heta było nie prosta tak, i ŭ mianie jość niejkija zdolnasci.
— Ci praŭda, što ŭ ciabie na pravaj ruce było šeść palcaŭ?
— Praŭda. Ale ŭ svoj čas ja pryniaŭ rašeńnie zrabić apieracyju i adzin z palcaŭ vydalić. Sapraŭdy, ja ŭ dziacinstvie adroznivaŭsia ad inšych. Tamu, napeŭna, časam da mianie staviacca ź nieparazumieńniem. Nie zaŭvažyli, moža być, što ja indziha jaki-niebudź (śmiajecca). Heta ja tak, žartuju.
«Žyvu na 450 tysiač rubloŭ u miesiac»
Akazvajecca, zarablaje siońnia Andrej Aramnaŭ mienš za dajarku siaredniaha biełaruskaha kałhasa. Usio z-za taho ž incydenta z DAI.
— Ciažka žyć na 450 tysiač rubloŭ u miesiac, — uzdychnuŭ lepšy štanhist śvietu. — Hrošaj chapaje tolki na toje, kab zapłacić kamunalnyja płaciažy i papoŭnić rachunak na mabilniku. I ŭsio. Zarpłaty narmalnaj u mianie niama ŭžo paŭhoda. Žyvu na srodki, jakija zarabiŭ i skapiŭ raniej. A čamu zabrali stypiendyju, ja nie razumieju. Liču, što spaŭna zapłaciŭ za toje, što narabiŭ. Tak mocna, što... Ja ŭžo na padpitku jezdzić nie budu nikoli, słova honaru. Nie viedaju, čym jašče heta dakazać. Ja ŭžo zrazumieŭ heta, apraŭdaŭ tak, što nie viedaju. Ale vychavańnie praciahvajecca dahetul, i zarobak nie viartajuć. Ci ja, moža, nie zasłužyŭ? Dy i pakarali mianie niasłaba, usio ž atrymaŭ piać miljonaŭ štrafu. Chaciełasia b, kab usio skončyłasia, kab maja dobraja reputacyja ŭ vačach hramadstva ŭznaviłasia. Usie pavinny viedać, što ja vypraviŭsia i rychtujusia da čempijanatu śvietu. Mnie 21 hod, i ja adčuvaju, nakolki staŭ bolš darosłym. Pamyłki, jakija ja zrabiŭ u 20, nie paŭtaru nikoli.
— Nie kažy, z takim zarobkam na čempijanacie śvietu pralacieć možna na raz-dva...
— Majo finansavaje stanovišča nie dazvalaje pravodzić narmalnuju padrychtoŭku. U maich supiernikaŭ pierada mnoj pieravaha. Dumki i prablemy pieraškadžajuć žyć. Dla narmalnaj padrychtoŭki ja pavinien kuplać uznaŭlalnyja preparaty. Heta vialikaja suma ŭ dołarach. Biełaruskaja farmakałohija nie zaŭsiody adpaviadaje sučasnym standartam. A na 450 tysiač zarobku ničoha nie kupiš. U «Stajki» ja i viarnuŭsia tamu, što tut vielmi dobra i biaspłatna kormiać, jość dzie žyć. Ale nie viedaju, da čaho heta ŭsio pryviadzie. Pakul ja skiravany na toje, kab pastavić try novyja suśvietnyja rekordy na čempijanacie śvietu. Potym adpačnu tydzień i znoŭku pačnu treniravacca. Spadziajusia, žyć stanie lahčej. I matula nie budzie za mianie chvalavacca. Jana załaty čałaviek, u nas cudoŭnyja adnosiny. Ale z-za maich prablem i ŭ mamy zdaralisia prablemy sa zdaroŭjem.
R.S. Andrej paprasiŭ mocna jaho nie vychvalać, kab nie razzłavalisia treniery. Ale fakt zastajecca faktam. Pa formule Sinklera, jakoj karystajucca ŭ ciažkaj atletycy, mienavita Andrej Aramnaŭ źjaŭlajecca najlepšym štanhistam śvietu siarod usich vahavych katehoryj. Navat «žaleznyja» kitajcy, nad padrychtoŭkaj jakich pracujuć supierłabaratoryi, nie zmahli apiaredzić barysaŭskaha asiłka. Spadziajomsia, Andrej, usie tvaje prablemy minujuć i ščyra zyčym pośpiechaŭ!
Ciapier čytajuć
«U mianie tolki adna mara — viarnuć svajho Dzimku». Maci byłoha palitviaźnia Dźmitryja Hopty raskazvaje pra novuju biadu syna. I prosić zamaŭlać u jaje bolš tortaŭ, kab spravicca
Kamientary