BATE adarvaŭsia ad kankurentaŭ na 12 punktaŭ

Sioletni futbolny čempijanat Biełarusi nie cikavy nie tym, što BATE adarvaŭsia ad kankurentaŭ na dziesiatak bałaŭ (plus minus punkt-dva), a ŭ tym, što nichto z dahaniajučych nie moža pa-sapraŭdnamu kinucca ŭ pahoniu. Kab siadzieć na chvaście, trapać niervy zaŭziataram barysaŭskaha kłuba. Nu kab tak, jak u Jeŭropie. Kłuby, što karaskajucca na pjedestał, padajuć ź jaho i źmianiajuć adzin druhoha.

Voś i pierad hetym 15-m turam kamandy, što zajmali 2-je, 3-je i 4-je miesca družna ŭziali – i nie vyjhrali.

Jak tut nie zhadać minuły siezon u premjer-lizie, kali ŭ pahoniu za «Livierpulem» i «Čełsi» kinulisia «Chałł», «Arsienał», «Astan Viłła» i, kaniečnie, prysnuŭšy na pačatku siezona MIU.

Pieršym syšli tady z dystancyi «tyhry» dy tak, što «Chałł» ledź nie vyvaliŭsia ŭ čempijonšyp, vyratavaŭšysia ŭ apošnim tury. Potym syšoŭ z dystancyi kłub ź Birminhiema, potym – z «biełaruskaha rajona» Łondana, zatym, časova, «Čełsi», pokul nie zvolniŭ Skałary i nie ŭziaŭ na jaho miesca, u dobraachvotna-prymusovuju arendu, Chidzinka. Čym skončyłasia pahonia, viadoma. Trecim zapar čempijonstvam ManJunajted.

BATE – vielmi simpatyčny kłub, i ničoha kiepskaha ŭ tym, što jon stanie ŭ čaćvierty raz zapar čempijonam (a naohuł šosty ŭ svajoj historyi) niama. Ale chočacca, kab choć niechta puściŭsia za im u pahoniu, siadzieŭ na chvaście, trapaŭ niervy. U tym liku i dziela taho, kab BATE nie zachvareŭ na zornuju chvarobu, i kab nie zdarałasia bolej kazusaŭ, jak u vypadku z «Vientśpiłsam».

Da niadzieli, matčaŭ 15-ha tura, adryŭ barysaŭskaha kłuba ad pieraślednikaŭ składaŭ dzieviać bałaŭ, ad niadzieli 20 hadzin 26 chvilin – užo 12 bałaŭ.

BATE ŭ Barysavie pieramoh FK «Minsk» – 1:0, na 71-j chvilinie vyznačyŭsia Pavał Niachajčyk, a voś try asnoŭnyja kankurenty tak i nie zmahli naradzić adnu pieramohu na troch.

«Tarpieda» Žodzina (było 2-je miesca) prajhrała «Hranitu» (było pieradapošniaje miesca) – 1:3, «Dniapro» (3-je miesca) sastupiŭ «Niomanu», jaki ciapier vyjšaŭ na 2-je miesca, – 1:2.

«Dynama» Minsk na stadyjonie ŭ Kuncaŭščynie zhulaŭ uničyju sa «Smarhońniu» – 1:1. U pieršym kruzie hetyja kamandy taksama zhulali ŭničyju.

Na 3-je miesca ciapier vyjšaŭ «Naftan», jaki pieramoh MTZ-RIPA (2:1) i adpraviŭšy kłub u zonu vyletu.

Inšyja vyniki: «Šachcior» – Dynama Brest – 1:1, «Viciebsk» – «Homiel» – 1:0.

Turnirnaje stanovišča: BATE – 37, «Nioman», «Naftan», «Tarpieda» – 25, «Dynama» Minsk – 24, «Dniapro» – 23, «Šachcior» – 22, «Dynama» Brest – 21, «Minsk» – 19, «Homiel» – 18, «Viciebsk», «Hranit» – pa 16, MTZ-RIPA – 15, «Smarhoń» – 7.

Hałoŭnaja intryha ciapier palahaje ŭ tym, chto vylecić u pieršuju lihu.

Nu i cikava, chto trapić u nastupnym hodzie ŭ Lihu Jeŭropu. Toje ž bresckaje «Dynama» taksama zachoŭvaje šancy, hledziačy na toje, jak kamandy ź vierchniaj častki tablicy družna hublajuć bały.

• 0
• 0
• 0
• 0
• 0
• 0
• 0
• 0