Pradstaŭničy desant ź Vieniesueły

Siońnia ŭ Minsku projdzie pasiadžeńnie biełaruska‑vieniesuelskaj kamisii vysokaha ŭzroŭniu. Delehacyja Vieniesueły na čale ź vice‑prezidentam, sustaršynioj kamisii Ramonam Karysalesam prybyła ŭ Biełaruś napiaredadni viečaram.

Pavodle infarmacyi biełaruskaha MZS, u skład delehacyi taksama ŭvajšli pradstaŭniki ministerstvaŭ zamiežnych spraŭ, navuki, technałohij i siaredniaj pramysłovaści, enierhietyki i nafty, sielskaj haspadarki i ziamiel, navakolnaha asiarodździa Vieniesueły.

Biełaruski bok na pieramovach uznačalić pamočnik prezidenta pa asablivych daručeńniach, sustaršynia kamisii Viktar Šejman.

U pasiadžeńni taksama voźmuć udzieł pradstaŭniki ŭrada, parłamienta, Vyšejšaha haspadarčaha suda, ministerstvaŭ zamiežnych spraŭ, abarony, finansaŭ, infarmacyi, lasnoj haspadarki, enierhietyki, handlu, adukacyi, architektury i budaŭnictva, pramysłovaści, sielskaj haspadarki i charčavańnia, justycyi, achovy zdaroŭja, Dziaržaŭnaha kamiteta pa navucy i technałohijach, Dziaržaŭnaha vajenna‑pramysłovaha kamiteta, kancernaŭ «Biełnaftachim» i «Biełdziaržcharčapram», Nacyjanalnaha banka, Dziaržaŭnaha kamiteta pa majomaści, Minharvykankama i šerahu inšych arhanizacyj.

Padčas pasiadžeńnia płanujecca abmierkavać stan i pierśpiektyŭnyja napramki sacyjalna‑ekanamičnaha raźvićcia Biełarusi i Vieniesueły, šlachi dalejšaha ŭmacavańnia miždziaržaŭnaha dyjałohu na ŭsich uzroŭniach, paviedamiła pres‑słužba biełaruskaha MZS.

Buduć taksama razhledžany chod realizacyi prajektaŭ handlova‑ekanamičnaha i navukova‑techničnaha supracoŭnictva dźviuch krain i pytańni raźvićcia dahavorna‑pravavoj bazy.

Členy vieniesuelskaj delehacyi naviedajuć šerah ministerstvaŭ, kancernaŭ i dziaržarhanizacyj Biełarusi.

Nahadajem, na pres‑kanfierencyi 1 lipienia pasoł Vieniesueły ŭ Biełarusi Amieryka Dyjas Nuńjes paviedamiŭ pra vizit u Biełaruś prezidenta Vieniesueły Uha Čaviesa. Vizit zapłanavany na kaniec žniŭnia — pačatak vieraśnia.

Dypłamat taksama paviedamiŭ, što vizit u adkaz biełaruskaha prezidenta ŭ Vieniesuełu zapłanavany na śniežań 2009 hoda.»Całkam mahčyma, što padčas vizitu adbudziecca adkryćcio novych sumiesnych zavodaŭ u Vieniesuele», — skazaŭ pasoł.

Damoŭlenaść ab sustrečy ŭ bližejšy čas była dasiahnutaja 20 červienia padčas telefonnaj razmovy Alaksandra Łukašenki z Uha Čaviesam. Pavodle paviedamleńnia pres‑słužby prezidenta Biełarusi, razmova adbyłasia pa inicyjatyvie vieniesuelskaha boku.

Apošni raz Uha Čavies naviedaŭ Biełaruś u lipieni 2008 hoda.

BiełaPAN

• 0
• 0
• 0
• 0
• 0
• 0
• 0
• 0