Hruzija kančatkova vyjšła sa składu SND

18 žniŭnia zaviaršyłasia jurydyčnaja pracedura afarmleńnia vychadu Hruzii sa składu Sadružnaści Niezaležnych Dziaržaŭ. Ź siońniašniaha dnia kraina nie źjaŭlajecca členam hetaj rehijanalnaj arhanizacyi, stvoranaj u 1991 hodzie dvanaccaćciu postsavieckimi respublikami.

Pra vychad krainy z SND MZS Hruzii paviedamiła notaj Vykankamu Sadružnaści 18 žniŭnia 2008 hoda, u pryvatnaści pra pastanovy parłamienta ad 14 žniŭnia, zhodna ź jakim spynili dziejańnie ŭ adnosinach da Hruzii Pahadnieńnie ab stvareńni SND ad 8 śniežnia 1991 hoda, Statut SND ad 22 studzienia 1993 hoda i Pahadnieńnie ab stvareńni ekanamičnaha sajuza ad 24 vieraśnia 1993 hoda. Ab tym, što Hruzija vychodzić z SND, abviaściŭ 12 žniŭnia na mitynhu ŭ Tbilisi prezident Michaił Saakašvili u znak pratestu suprać uvachodžańnia rasijskich vojsk na terytoryju Paŭdniovaj Asiecii.

Artykuł 9 Statuta SND havoryć: «Dziaržava‑člen maje prava vyjści z Sadružnaści. Pra taki namier dziaržava‑člen paviedamlaje piśmova depazitaryju sapraŭdnaha Statuta za 12 miesiacaŭ da vyjścia. Abaviazacielstvy, jakija ŭźnikli ŭ pieryjad udziełu u dadzienym Statucie, źviazvajuć adpaviednyja dziaržavy da ich poŭnaha vykanańnia».

19 žniŭnia 2008 hoda hruzinski bok aficyjna zajaviŭ pra namier zastacca ŭdzielnikam šerahu dahavoraŭ i pahadnieńniaŭ, padpisanych u miežach Sadružnaści. Jak patłumačyli BiełaPAN u Vykankamie, heta moža datyčyć tolki dakumientaŭ z adkrytym subjektnym składam.

Pavodle dadzienych na 18 žniŭnia 2008 hoda, Hruzija źjaŭlałasia ŭdzielnicaj 598 z 1.317 pryniatych u SND dakumientaŭ; ź ich 112 dahavoraŭ i pahadnieńniaŭ byli padpisanyja na ŭzroŭni kiraŭnikoŭ dziaržaŭ i kiraŭnikoŭ uradaŭ i tolki 76 majuć adkryty subjektny skład, astatnija 36 — abmiežavany subjektny skład.

Jak napiaredadni paviedamiŭ BiełaPAN dyrektar arhanizacyjnaha departamienta Vykankama SND Siarhiej Kamianiecki,

technična vychad Hruzii sa składu Sadružnaści ŭ jaho minskaj štab‑kvatery budzie aformleny ŭ vyhladzie źniaćcia ściahoŭ hetaj krainy ŭ vialikaj zale i faje budynka na Kirava,17.

Pieršy namieśnik vykanaŭčaha sakratara SND Uładzimir Harkun admoviŭsia BiełaPAN prakamientavać vychad Hruzii sa składu Sadružnaści.

Sajt Vykanaŭčaha kamiteta SND pakul zastajecca ŭ raniejšym vyhladzie — siarod ściahoŭ dziaržaŭ — udzielnic jość i ściah Hruzii.

• 0
• 0
• 0
• 0
• 0
• 0
• 0
• 0