Kolki hrošaj hublaje dziaržava z adjezdam adnaho ajcišnika? Pasprabavali padličyć
Dniami stała viadoma, što kampanija Wargaming sychodzić ź Biełarusi: ofisy buduć zakryvacca, supracoŭnikaŭ pa mahčymaści buduć rełakavać. I heta daloka nie pieršaja bujnaja IT-kampanija, jakaja pakidaje krainu.
Prapahanda praciahvaje raspaviadać pra ajcišnikaŭ jak pra «nachabnikaŭ» i «parazitaŭ», pry hetym čamuści nie ŭličvajecca, kolki hrošaj biudžetu hetyja ludzi prynosiać svajoj pracaj. Pasprabavali padličyć samy ścipły siaredniemiesiačny ŭniosak, jaki hublajecca z adjezdam kožnaha takoha śpiecyjalista.
Adličeńni z zarobkaŭ
Zarobak u IT-śfiery zaležyć ad dośviedu i kampietencyj: džuniar (pačatkoviec) moža atrymlivać kala 800 dalaraŭ, u toj ža momant midły i sieńjory (daśviedčanyja śpiecyjalisty) — ad dźviuch tysiač dalaraŭ i vyšej.
Ale voźmiem siaredniuju ličbu. Zhodna z danymi na studzień 2022-ha (da ŭsich apošnich valutnych chistańniaŭ), siaredni zarobak biełaruskaha ajcišnika składaŭ $2365.
13% z hetaj sumy vyličvajecca na padachodny padatak, a mienavita ŭ našym kiejsie — 307,45 dalara. U Biełarusi padachodnaja staŭka adna dla ŭsich fizičnych asob, rezidenty PVT byli vyklučeńniem i płacili 9%, ale ź pieršaha studzienia 2021-ha hoda hetuju lhotu prybrali.
Unioski ŭ Fond sacyjalnaj abarony nasielnictva ŭ Biełarusi składajuć 35%. Ź ich 1% utrymlivajecca z zarobku pracaŭnika, a 34% źvierchu płacić u kaznu sama kampanija. Važnaja ahavorka dla śfiery IT: dla rezidentaŭ Parka vysokich technałohij abaviazkovyja strachavyja ŭnioski vyličvajucca nie z sumy ŭsioj zarpłaty, a ad siaredniaha zarobku pa krainie. Na luty 2022-ha jon składaŭ 1563 rubli. To-bok u FSZN ahułam pieraličvajem 547 rubloŭ (185,6 dalara).
Pachody ŭ kramu
Padatkovyja pastupleńni na hety momant składajuć 88,8% dachodaŭ respublikanskaha biudžetu. Akramia pramych padatkaŭ, usie hramadzianie, navat toj, chto nie pracuje, płaciać sa svajoj kišeni PDV — padatak na dadanuju vartaść (jaho jašče nazyvajuć padatkam na spažyvańnie). Heta adbyvajecca naŭprost padčas šopinhu.
Staŭki PDV mohuć być roznymi — 0% i 10% (lhotnyja), 20% i 25%. Asnoŭnaje značeńnie — heta akurat 20%. U biudžet krainy PDV pieraličvajecca pradaŭcami tavaraŭ, ale faktyčna jaho apłačvajuć spažyŭcy, bo hetaja suma ŭklučanaja ŭ finalny košt.
Dapuścim, biełarus ź siarednim ajcišnym zarobkam nabyvaje ŭ miesiac praduktaŭ na 500 rubloŭ (170 dalaraŭ). Charčovyja tavary zbolšaha (u tym liku dla dziaciej) traplajuć pad staŭku 10%. Heta značyć, što z 500 rubloŭ na padatki pojdzie 45,45 rubla (15,4 dalara).
Kali čałaviek vypivaje i palić, to aŭtamatam adšpilvaje źvierchu dziaržavie jašče niemałuju sumu — havorka idzie pra akcyzy. Akcyznyja marki jość na ałkaholi, kavie, harbacie, mabilnych telefonach i mnohich inšych tavarach.
Ujavim, što ajcišnik abmiažoŭvajecca tym, što vykurvaje 15 pačkaŭ cyharet za miesiac. Ahułam heta 300 cyharet i 18,8 rubla (6,4 dalara) za ich dziaržavie.
Suviaź i aŭto
Taryf «Jasna 100» ad «Biełtelekama» kaštuje ciapier 40 rubloŭ 90 kapiejek u miesiac, pakiet «Bieź limita» dla telefona ad A1 — 27,18 rubla na miesiac. Z hetaha hramadzianami taksama płacicca padatak na elektrasuviaź: z nazvanych sum vychodzić 15,7 rubla ($5,3).
Śpiecyjalist z dobrym zarobkam z vysokaj dolaj vierahodnaści budzie mieć svajo aŭto. Pa pieršaje, aŭto treba zapraŭlać. Staŭki akcyzaŭ na paliva dosyć vialikija. Kali ŭjavić, što na aŭto čałaviek jeździć na pracu i ź jaje, a na vychadnych vybirajecca na Minskaje mora ci na rynak, to jon prajazdžaje minimum 30 kiłamietraŭ u dzień ci 900 za miesiac. Siaredni raschod paliva ŭ horadzie — 10 litraŭ na 100 kiłamietraŭ. Kali zapraŭlać mašynu 90 litrami štomiesiačna, dziaržavie adličycca kala 215 rubloŭ (73 dalary).
Taksama treba płacić za samo prava vyjechać na darohu. Staŭka transpartaha padatku zaležyć ad mnohich faktaraŭ — pierš-napierš, na jaje ŭpłyvaje pamier mašyny. Za aŭto vahoj da 1,5 tony za hod treba addać 61 rubiel (heta piać rubloŭ u miesiac ci $1,7).
Padatak na nieruchomaść
Ź niadaŭnich časoŭ uładalniki navat adnoj kvatery taksama abaviazanyja płacić za svaje ŭładańni. Ujavim, što kvatera našaha ajcišnika ŭ Minsku maje płošču 50 «kvadrataŭ». Z ulikam staŭki padatku (81 kapiejka za «kvadrat») pryjdziecca zapłacić 40,5 rubla na hod (1,2 dalara ŭ miesiac).
Varta adznačyć, što kali śpiecyjalist zdymaje kvateru ci dom pa aficyjnaj damovie, to z hetaha taksama spahaniajecca padatak, jaki arendadaŭcy ŭličvajuć u canie. Staŭka vyznačajecca za kožny pakoj: za adzin u Minsku musiš płacić 36,8 rubla štomiesiac (12,5 dalara).
Što ŭ vyniku?
Ahułam vychodzić minimum 600 dalaraŭ padatkaŭ z adnaho čałavieka za miesiac. I heta tolki častka z usich mahčymych unioskaŭ. Tut, naprykład, nie ŭličvajecca hrupa tavaraŭ z PDV u 20%, padatak na ziamlu, mytnyja pošliny z tavaraŭ, zakazanych z-za miažy (naprykład, z AliExpress), pachody ŭ kaviarni i mnohaje inšaje.
Taksama varta nie zabyvać, što mnohija ajcišniki zarablajuć bolš za $2365. Prosta ciapier u Biełarusi šukajuć śpiecyjalistaŭ na pazicyi z zarobkam 3200, 4000 dałaraŭ i vyšej.
Plus vialikaja dola ajcišnikaŭ maje siemji i — kali jany rełakujucca, to adrazu z žonkami (mužami) i dziećmi.
Da taho ž čaściej rełakujucca nie džuniary, a midły i sieńjory, čyje zarobki značna vyšejšyja.
«Naša Niva» adnaŭlaje zbor danataŭ — padtrymać prosta
Čytajcie jašče:
«Da 80% usioj biełaruskaj IT-haliny źniknie». Tysiačy prahramistaŭ ź siemjami biahuć ź Biełarusi prosta ŭ hetyja chviliny
Ciapier čytajuć
Hety biełarus daśleduje rak — voś što jon kaža pra SPF ad miełanomy, navukovy prahres i samy składany ŭ lačeńni rak3
Kamientary