Amierykanskaja demakratyja vyznaje adasableńnie dziaržavy ad relihii, darma što navat na amierykanskim dalary napisana «Na Boha my spadziajemsia».
Ciapier vyśviatlajecca, što spadziavacca na Boha, moža, dobra i karysna, ale prymušać pałahacca na jaho ŭ časie nadzvyčajnaha stanoviščaŭ — niezakonna.
Hetaja historyja pačałasia ŭ 2006 hodzie, kali zakanadaŭčy orhan štata Kientuki vyrašyŭ dadać parahraf da zakona ab stvoranym paśla padziejaŭ 11 vieraśnia ministerstvie ŭnutranaj biaśpieki. Toj zakon pastanaŭlaŭ, što «Boh — usiemahutny, i bieź jaho nivodzin hramadzianin nie abaronieny pierad abliččam luboj pahrozy». Cikava, što ŭ ramkach hetaha sprečnaha zakona nad uvachodam u budynak minsiterstva unutranaj biaśpieki musiła źjavicca šylda: «Biaśpieka krainy nie moža być dasiahnutaja biez apiryšča na Ŭsiemahutnaha Boha». Nieŭzabavie paśla pryjma zakona dziesiać hramadzianaŭ-ateistaŭ padali pietycyju ŭ Fiederalny sud Kientuki, kab skasavać padobnaje pałažeńnie — na ich dumku takaja farmuloŭka parušaje adasableńnie dziaržavy ad relihii.
I voś sioleta ŭsiemahutny Boh pakidaje zakon ab ministerstvie ŭnutranaj biaśpieki Kientuki. Na hetym tydni federalny sud pastanaviŭ, što tak, sapraŭdy, padobnaje pałažeńnie piarečyć amierykanskaj kanstytucyi.
«Kali my navat dapuścim, što bolšaść žycharoŭ štatu pałahajucca na Boha, što jon abaronić ich u čas biaśpieki, u hetaj spravie dziaržavie nielha čynić hramadzianam prymusy», — skazaŭ fiederalny sudździa Tomas Uinhiejt.Ale historyja z boskim apiryščam peŭna budzie mieć svoj praciah. Zakanadaŭca Tom Rajnier, były śviatar, z čyjej inicyjatyvy i była pryniaty sprečny zakon u 2006 hodzie, maje namiery abskardzić novuju pastanovu fiederalnaha suda. «U sudzie ličuć, što pałažeńnie spryjaje prasoŭvańniu relihii ŭ hramadstvie. Ale ž Boh — nie relihija. Boh — heta Boh… Treba zrazumieć, što Boh sapraŭdy isnuje. Siarod baćkoŭ-zasnavalnikaŭ dziaržavy nie znojdziecca nivodnaha, chto by nie vieryŭ u boskaje isnavańnie».
Kamientary