Pačaŭsia sud nad eks-advakatam Andrejem Mačałavym. Jaho advakat adbyvaje 15-sutačny aryšt
U sudzie Leninskaha rajona Minska pačaŭsia razhlad kryminalnaj spravy suprać byłoha advakata Andreja Mačałava. Jaho abvinavačvajuć pavodle č. 1 art. 380 KK — vykarystańnie padroblenych dakumientaŭ, a mienavita advakackaha paśviedčańnia. Zajavu ŭ prakuraturu na Mačałava napisała sudździa Anžeła Kaściukievič, jakaja sudziła padabaronnuju advakata. Ciapier spravu suprać eks-advakata razhladaje sudździa Taćciana Šocik. Advakat Mačałava Vital Brahiniec ciapier adbyvaje administracyjny aršyt — 25 traŭnia jaho asudzili na 15 sutak aryštu za «niepadparadkavańnie milicyi», paśla taho, jak zatrymali «dla pravierki na datyčnaść da pratesnaj dziejnaści», paviedamlaje «Viasna»
U minułym červieni Mačałaŭ musiŭ abaraniać u sudzie minčanku Volhu Sinialovu, jakaja paprasiła źjechać z arendnaj kvatery prakurorku Alinu Kaśjančyk. Advakat pryjšoŭ na praces, dzie daviedaŭsia, što jaho pazbavili licenzii. Za heta jaho i buduć sudzić — za toje što pryjšoŭ, jak vyśvietliłasia, pa niesapraŭdnym advakackim paśviedčańni na sudovaje pasiadžeńnie.
Pra toje, što na Andreja Mačałava zaviedzienaja kryminalnaja sprava, jon daviedaŭsia ŭ listapadzie 2021 hoda:
«27 maja adbyłosia pasiadžeńnie dyscyplinarnaj kamisii kalehii advakataŭ, na jakim mnie abviaścili ab nakładańni dyscyplinarnaha spahnańnia. Patłumačyli, što da momantu vyklučeńnia z kalehii ja mahu praciahnuć svaju praktyku. Pa zakonie atrymlivajecca tak: pakul Saviet kalehii nie prymie rašeńnie pra tvajo vyklučeńnie, ty źjaŭlaješsia advakatam i možaš pracavać na ahulnych padstavach — heta adbyvałasia va ŭsich viadomych vypadkach maich kalehaŭ. Adpaviedna, paśla hetaha ja rassłabiŭsia i praciahnuŭ zajmacca abaronaj».
18 červienia Andrej Mačałaŭ pryjšoŭ u sud da svajoj padabaronnaj, Volhi Sinielovaj. Pavodle infarmacyi pravaabaroncaŭ, žančyna paprasiła źjechać sa zdymnaha žylla pamočnicu prakurora Alinu Kaśjančyk.
«Paśla abiedziennaha pierapynku sudździa Anžeła Kaściukievič paviedamiła mnie, što pa elektronnaj pošcie z kalehii pryjšoŭ list: advakatam ja ŭžo nie źjaŭlajusia. Mianie adchilili i paprasili syści. Zrazumieła, ja tak i pastupiŭ. Tolki paśla hetaha ŭžo na maju poštu kalehija dasłała paviedamleńnie, što ź jaje ja byŭ vyklučany jašče 30 traŭnia. Da hetaha nijakich padobnych apaviaščeńniaŭ ja nie atrymlivaŭ ni pa telefonie, ni ŭ mesendžary, ni lubym inšym sposabam. Ja prosta ničoha nie viedaŭ: byŭ upeŭnieny, što kalehija paviedamić mnie ŭ vypadku pryniaćcia takoj pastanovy», — tłumačyć eks-advakat.
Pa słovach Andreja Mačałava, praź miesiac sudździa Kaściukievič napisała zajavu ŭ prakuraturu. U joj havaryłasia, što juryst pryjšoŭ u sud ź niesapraŭdnymi dakumientami. Sa spravaj u viedamstvie raźbiralisia doŭha, paŭhoda. Mačałaŭ ličyć, praces zaciahnuŭsia, tamu što składu złačynstva «ŭ pryncypie nie było».
«Zatym svaim volevyjaŭleńniem prakuror Zavodskaha rajona Minska Kułakoŭski raspačaŭ kryminalnuju spravu. Toje abvinavačvańnie, jakoje mnie staviać u vinu, nie ŭjaŭlaje vialikaj hramadskaj niebiaśpieki. Jaho mohuć rasśledavać paru tydniaŭ, maksimum — miesiac. Ale ŭ vyniku ŭsio zaciahnuli. Materyjały spravy iduć u chranałahičnym paradku, i kali ja ź imi znajomiŭsia, ubačyŭ, što pa spravie apytali ŭsich śviedak. Z dakumientaŭ było vidavočna: nichto mnie ni pra što nie paviedamlaŭ, — dadaje juryst. — Zrazumieła, što heta pamyłka kalehii, jany zabylisia paviedamić mnie naviny. Ale, mabyć, nie prydumali ničoha lepšaha, čym skazać, što raz ja ŭžo byŭ na dyscyplinarnaj kamisii, značyć, pra ŭsio viedaŭ. Heta i pakłali ŭ asnovu majho abvinavačvańnia, a ŭ listapadzie 2021 hoda jašče i zabaranili vyjazdžać z krainy».
Jak raspavioŭ sam Andrej Mačałaŭ błohu «Otražienije», sud nad im pavinien prajści na pačatku nastupnaha tydnia, tym časam jaho advakata Vitala Brahinca 25 maja asudzili na 15 sutak aryštu za «niepadparadkavańnie milicyi».
«Vital abaraniaje mianie z samaha pieršaha dopytu. Jon musić vyjści na volu ŭviečary ŭ aŭtorak. A pieršaje pasiadžeńnie pa majoj spravie budzie ŭ paniadziełak, ab 11-j ranicy. Adpaviedna, ja paprašu sud adkłaści praces. Dziažurnaha advakata mnie abaviazanyja pryznačyć tolki ŭ tym vypadku, kali moj abaronca nie zmoža ŭdzielničać u spravie bolš za try dni», — kaža Mačałaŭ.
Siońnia Mačałaŭ zajaviŭ u sudovym pracesie ab adkładzie sudovaha pasiadžeńnia da 8 červienia, adnak sudździa Taćciana Šocik hetaje chadajnictva adchiliła. Paśla hetaha Mačałaŭ zajaviŭ advod sudu, jaki taksama byŭ adchileny.
Sudom taksama było pryniata rašeńnie ab zabieśpiačeńni abarony šlacham vykliku dziažurnaha advakata. U praces, niahledziačy na piarečańni Mačałava, była ŭklučanaja advakatka Natalla Kanoda. Sud pradastaviŭ tolki 20 chvilin dla aznajamleńnia z materyjałami kryminalnaj spravy.
Paśla pierapynku eks-advakat zajaviŭ chadajnictva ab admovie ad abarony dziaržaŭnaj advakatkaj, adnak sud hetuju admovu nie pryniaŭ. Taksama Mačałaŭ zajaviŭ chadajnictva ab pradastaŭleńni pierapynku na troje sutak dla vyvučeńnia materyjałaŭ spravy novym advakatam i ŭzhadnieńnia pazicyi, adnak sud i heta chadajnictva adchiliŭ, matyvujučy heta tym, što ŭ abarony dastatkova času dla padrychtoŭki pazicyi i pradastaviŭ pierapynak jašče na 20 chvilin.
Mačałaŭ abaraniaŭ palitźniavolenuju žurnalistku Kaciarynu Barysievič i šmatdzietnuju maci Volhu Załatar. Jamu pahražaje da dvuch hadoŭ «chimii».
Kamientary