Biełarusy, jakija jeździać na radzimu na aŭto ź jeŭrapiejskaj rehistracyjaj, mohuć stracić na miažy niekalki socień jeŭra 

Za staroje aŭto z 3-litrovym ruchavikom treba pakinuć 15 tysiač jeŭra na miažy

Biełarusy, jakija žyvuć u Jeŭropie, musiać pakidać davoli bujnyja sumy pry pierasiačeńni miažy, kab mieć mahčymaść ujechać u krainu na svaim aŭto, zarehistravanym za miažoj. Kali mašyna zarehistravanaja za miežami Mytnaha sajuza, treba pakidać finharantyju — sumu, roŭnuju mytnym zboram za ŭvoz dla nastupnaj rehistracyi ŭ Biełarusi.

Naprykład, kali čałaviek jedzie na radzimu na aŭtamabili 2018 hoda vypusku z abjomam ruchavika 1,4 litra, to ŭ jakaści finharantyi jamu treba budzie pakinuć 2380 jeŭra, a kali, naprykład, mašyna budzie starejšaja za 5 hod, a pad kapotam — ruchavik z abjomam 3 litry, to ŭ jakaści finharantyi daviadziecca pakinuć užo 15 tysiač jeŭra.

Raniej zakład pakidali i viartali ŭ adnoj i toj ža valucie (naprykład, u jeŭra). Z 25 lipienia takaja mahčymaść źnikła. Ciapier biełarusy musiać unosić finharantyju ŭ biełaruskich rublach pa kursie Nacbanka na dzień rehistracyi pasažyrskaj mytnaj dekłaracyi. Zvarot hrošaj adbyvajecca ŭ takim ža paradku. 

Navat kali za čas pajezdki kurs rubla adnosna jeŭra ci dalara zastajecca niaźmiennym, čałaviek u lubym vypadku zhubić peŭnuju častku hrošaj, praz toje, što pry ŭjeździe ŭ Biełaruś jon budzie mieniać valutu na rubli, a pry vyjeździe znoŭ mianiać rubli na valutu. U zaležnaści ad abjomu ruchavika i hodu vypusku aŭtamabila straty na kanviersii mohuć składać ad niekalkich dziesiatkaŭ da niekalkich socień jeŭra. 

Płacić musiać nie ŭsie

Jość katehoryja biełarusaŭ, kamu nie treba pakidać finharantyju. Heta ŭłaśniki pašparta sieryi RR abo tyja, chto maje admysłovy štamp u pašparcie ŭnutranaj sieryi. 

Opcyja sa štampam źjaviłasia ź vieraśnia 2021 hoda. Atrymać štamp možna chutčej, čym novy pašpart, ale sama pracedura atrymańnia štampa i pašparta sieryi RR pa sutnaści amal ničym nie adroźnivajecca. Jurydyčnyja nastupstvy ŭ abodvuch vypadkach adnolkavyja. 

Pavialičyć

U lubym vypadku vam treba prajści praceduru afarmleńnia pastajannaha pražyvańnia za miežami Biełarusi. Zrabić heta možna, jak znachodziačysia ŭ Biełarusi, tak i za jaje miežami. Tym, chto maje mahčymaść zrabić heta ŭnutry krainy, treba źviartacca ŭ adzieł pa hramadzianstvie i mihracyi. Tym, chto choča rabić heta z-za miažy, — źviartacca ŭ konsulstva. 

Kab atrymać admysłovy štam ci pašpart sieryi RR, treba nie mieć nijakich zapazyčanaściej pierad dziaržavaj, nie być płacielščykam alimientaŭ, nie mieć dziejnaha IP i h.d. Jašče adzin važny momant — heta adsutnaść prapiski ŭ Biełarusi, jakaja hublajecca paśla prachodžańnia pracedury afarmleńnia pastajannaha pražyvańnia za miežami Biełarusi. 

Praz vyšej apisanyja minusy vynikaje, što iści na taki krok maje sens tolki ŭ tym vypadku, kali vy čałaviek źbirajecca praciahły čas žyć za miažoj, a nie tolki dziela taho, kab jeździć u Biełarusi na nierazmytnienym aŭto.

• 2
• 0
• 4
• 14
• 2
• 3
• 21
• 0