Ispanija, Jehipiet, Tadžykistan: dzie adpačyvajuć prapahandysty
Paśla dvuch hadoŭ zakrytych z-za pandemii miežaŭ u hetym siezonie źjaviłasia peŭnaje pasłableńnie dla turystaŭ. Miežy pryadkrylisia, ale nie dla ŭsich biełarusaŭ. Naprykład, pradstaŭnikam siłavoha błoku zahadali zrabić bijamietryčnyja pašparty i abmiežavali im vyjezd. Tyja ž supracoŭniki dziaržaŭnych ŚMI pavinny «trymać marku»: śpis «varožych krain» — heta vam nie žarty. Tym bolš, što niekatorym ź ich Zachad adkazaŭ uzajemnaściu i zanios u sankcyjnyja śpisy. Dzie ž u hetym siezonie adpačyvali prapahandysty? Piša baj.by.
Ihar Tur
Žurnalist, palityčny ahladalnik ANT.
Udzielnik prahram «Prapahanda», «Antyfejk», «Hałoŭny.Tur», «Kontury» i inšych vystupaje prapahandystam režymu Łukašenki.
Tur trapiŭ u šosty pakiet sankcyj Jeŭrasajuzu razam z Hładkaj i Azaronkam.
Uznaharodžany miedalom Francyska Skaryny «za prafesijanalizm i asabisty ŭniosak u raźvićcio dziaržaŭnaj infarmacyjnaj palityki i nacyjanalnaj žurnalistyki» supracoŭnik ANT u červieni adpačyŭ u Jehipcie.
Spyniŭsia ŭ 5-zorkavym hateli BARCELO TIRAN SHARM u Šarm-El-Šiejchu.
Paśla adpačynku ŭ krainie piramid Ihar napisaŭ na svajoj staroncy ŭ fejsbuku: «Kali b u mianie była mahčymaść zabaranić niešta adno ludziam va ŭsim śviecie na ich ža karyść — ja, nie razvažajučy, zabaraniŭ by ŭsim ludziam u śviecie pisać kamientaryi ŭ internecie. Navat achviaravaŭšy mahčymaściu pračytać ad ludziej z časam «dziakuj» za hetaje rašeńnie ŭ kamientaryjach».
Alaksiej Dzierman
Publicyst, palityčny ahladalnik, hałoŭny redaktar partała imhoclub.by
A jašče jon aŭtar prahramy «Dzierman.Smysły» na STB, u jakoj horača pryzyvaje prykłaści ŭsie namahańni, kab «vylečyć ukraincaŭ ad nacyzmu, viarnuć im zdarovy rozum, viarnuć Ukrainu ŭ słavianskuju siamju.
Prykmietnyja i inšyja zakliki Dziermana. Voś tolki niekatoryja ź ich: začyścić Akademiju navuk ad nacyjanalistaŭ, jakija padtrymlivajuć śviatkavańnie ŭtvareńnia BNR, zaniacca čystkaj piataj kałony, zabaranić bieła-čyrvona-bieły ściah, «biehłym» ščyra pakajacca i viarnucca.
A voś jak adreahavaŭ Dzierman na prapanovu asobnych krain Jeŭrasajuza nie vydavać turystyčnyja vizy rasijanam i biełarusam.
«Vy tam užo zusim achranieli, jeŭrapiejskija žychary nieba? Mienavita tamu ja ŭvioŭ suprać ich piersanalnyja sankcyi, ni rubla nie patraču na vizy i pajezdki da ich. Chaj lepš zamiest ruskich da ich jeduć našy blizkaŭschodnija i afrykanskija siabry, kab pryvieści hetych abarziełych rasistaŭ u pačućcio», — napisaŭ Dzierman na svajoj staroncy ŭ fejsbuku.
Leta ahladalnik pravioŭ, miarkujučy pa fota, u Azii. Svaje rubli Dzierman pakinuŭ u Tadžykistanie, Kyrhyzstanie dy Kazachstanie.
Ale navat adpačynak na Issyk-Kuli nie pieraškadžaŭ dumać ab śvierchzadačy sučasnaha etapu — «pačać intehracyju krain byłoj Manholskaj impieryi, kab minimiziravać upłyŭ Zachadu i Jeŭropy na ich».
Maksim Osipaŭ
Litaratar, aŭtar publikacyj na SB.BY
Pazicyja Osipava, biez sumnieńniaŭ, — prarasijskaja. Rasija dla jaho — heta «matuška» i «supierdziaržava».
Niahledziačy na toje, što, pa jaho ž pryznańni ŭ fejsbuku, pierałajaŭsia z ukrainskimi rodzičami i ciapier nie maje ź imi znosinaŭ (akramia adzinaha brata), jon praciahvaje raspaviadać pra zładziejski režym va Ukrainie i padtrymlivaje «śviatoje rašeńnie Rasii vykaranić fašyzm».
A jašče Maksim Osipaŭ vielmi lubić parazvažać pra svabodu słova na Zachadzie, jakaja, na jaho dumku, zadušanaja, pra biesčałaviečnaść i fašyzacyju našych susiedziaŭ.
Tamu zrazumieła, čamu svoj adpačynak Osipaŭ ciapier pravodzić u «zvyšdziaržavie», dakładniej — u Sankt-Pieciarburhu.
Pieršaja ekskursija Osipava — u Finski zaliŭ. Choć zdalok i adnym vokam pahladzieć, jak fašyzujecca i zahnivaje Zachad. Potym budzie što raspavieści čytačam «SB».
Maryja Piatraška
Palityčnaja ahladalnica Biełteleradyjokampanii, redaktarka adździeła zamiežnaj infarmacyi
Maryja Piatraška paśla padziej 2020 hoda stała adnoj z hałoŭnych viadučych BT. Čaho tolki nie pačuješ u prahramach hetaj ahladalnicy: śpiecapieracyja pa abaronie Danbasa całkam adpaviadaje mižnarodnamu pravu, u Jeŭropu viartajecca Siarednieviečča, Rasija spynić adnapalarny bandycki śvietaparadak, i hetak dalej. Asobnyja vykazvańni navat i nie nazavieš pracaj sapraŭdnaha palityčnaha ahladalnika, bolš padobna na repliki «kanapnych ekśpiertaŭ».
Miarkujučy pa sacsietkach možna zrabić vysnovy, što Piatrašcy hetym letam było nie da adpačynku. Ale ŭsio ž u Picier jana zavitała, kab, pa jaje ž słovach, pahladzieć parad VMF Rasii z nabiarežnaj.
Svajo zachapleńnie rasijskimi vajennymi biełaruskaja ahladalnica padmacavała słovami: «Skazać, što heta moc i siła — ničoha nie skazać. Niezdarma Rasija, viedajučy pra zadumy Vašynhtona i namiery Kijeva ŭdaryć, udaryła pieršaj».
Pavieł Łazavik
Tele— i radyjoviadučy, namieśnik dyrektara infarmacynaha i hramadska-palityčnaha viaščańnia Pieršaha nacyjanalnaha kanała Biełaruskaha radyjo.
Pavieł Łazavik asabliva nie byŭ zaŭvažany ŭ raspaŭsiudžvańni naratyvaŭ biełaruskaj prapahandy. Jano i zrazumieła, u im bolš žyvie pradprymalnik, čym miedyjščyk. Svaje staronki ŭ sacsietkach Pavieł vykarystoŭvaje nie tolki, kab pościć fota, ale i kab rekłamavać svaje pasłuhi — viadučaha na mierapryjemstvach, viasiellach, viečarynach.
Ale svaju pazicyju «hołas» Biełradyjo ŭsio ž akreśliŭ: «Žurnalistyka — heta nie «kvietački niuchać» i raspaviadać pra novyja vidy raślin, heta zaŭsiody stvarać i nie rabić raźjadnańniaŭ pamiž ludźmi i narodami».
Asabliva Łazaviku padabajucca novyja «lidary mierkavańniaŭ», jakija źjavilisia na telebačańni paśla 2020 hoda.
Sapraŭdnymi žurnalistami jon ličyć tuju ž Maryju Piatrašku, Ihara Tura, Ludmiłu Hładkuju, Ksieniju Lebiedzievu — viadomych pravadnikoŭ biełaruskaj dziaržprapahandy.
Sam Pavieł Łazavik hetym letam dobra adpačyŭ — trapiŭ u sapraŭdnuju zamiežnuju vandroŭku. Byŭ u Ispanii i Partuhalii.
U sakaviku ŭ jaho taksama atrymałasia adpačyć — u Armienii.
-
U Varšavie zatrymali biełarusa i palaka, jakija zdymali mierapryjemstvy biełaruskaj dyjaspary dla prapahandystaŭ
-
«U mianie tolki adna mara — viarnuć svajho Dzimku». Maci byłoha palitviaźnia Dźmitryja Hopty raskazvaje pra novuju biadu syna. I prosić zamaŭlać u jaje bolš tortaŭ, kab spravicca
-
Pamior eks-pasoł Valeryj Bryloŭ
Ciapier čytajuć
«U mianie tolki adna mara — viarnuć svajho Dzimku». Maci byłoha palitviaźnia Dźmitryja Hopty raskazvaje pra novuju biadu syna. I prosić zamaŭlać u jaje bolš tortaŭ, kab spravicca
Kamientary