U Breście vynieśli prysud rasijskamu handbalistu, jaki mocna źbiŭ miascovaha žychara. Biełarusam za kamientary dajuć našmat bolš
Praces nad 25-hadovym hulcom handbolnaha kłuba «Danskija kazaki» — JUFU (Tahanroh) Alaksandram Sinicynym prachodziŭ na hetym tydni ŭ sudzie Maskoŭskaha rajona Bresta. Rasijski spartsmien byŭ zatrymany 10 žniŭnia kala restarana-karaokie «Žemčuh» i źmieščany ŭ izalatar časovaha ŭtrymańnia paśla kanfliktu na terytoryi hetaj ustanovy. Abvinavačvańnie jamu było pradjaŭlena pa č. 2 art. 339 KK RB (złosnaje chulihanstva), piša «Briestskaja hazieta».
Letam hetaha hoda «Danskija kazaki» praviali ŭ Breście mižsiezonny zbor. U žniŭni jany paŭdzielničali ŭ tradycyjnym «Kubku Biełhazprambanka». Paśla adnoj z hulniaŭ turniru kamanda adpačyvała ŭ karaokie-bary, dzie pamiž Sinicynym i rabotnikam ustanovy adbyŭsia kanflikt.
Pavodle viersii abvinavačańnia, Alaksandr Sinicyn, jaki znachodziŭsia ŭ niećviarozym stanie, pryblizna ŭ 5.10 ranicy 10 žniŭnia ŭdaryŭ, a zatym žorstka źbiŭ adnaho z supracoŭnikaŭ karaokie-bara paśla taho, jak toj zrabiŭ jamu zaŭvahu ab nieprystojnych pavodzinach: za niekalki chvilin da taho rasijanin spraŭlaŭ patrebu prosta pad dźviaryma ŭstanovy.
Paśla taho, jak pamiž abvinavačanym i paciarpiełym adbyłasia słoŭnaja svarka, rabotnik ustanovy pajšoŭ ŭsiaredzinu pamiaškańnia. Miarkujučy pa ŭsim, Sinicyn vyrašyŭ adpomścić bieraściejcu za zroblenuju zaŭvahu, paličyŭšy jaje abrazaj dla siabie. Jon paklikaŭ na dapamohu svaich tavaryšaŭ pa kamandzie Mikitu Dałhanava i Hleba Čarnova. Utroch jany stali vymańvać supracoŭnika ŭstanovy na vulicu, mocna stukali ŭ dźviery. Paśla taho, jak toj znoŭ vyjšaŭ, było žorstkaje źbićcio. Udary nanosiŭ Sinicyn.
Kali paciarpieły ŭpaŭ na ziamlu ŭ vyniku pieršaha mocnaha ŭdaru pa tvary, rasijanin nanios jamu jašče kala dziesiaci ŭdaraŭ rukoj pa hałavie i inšych častkach cieła i adzin udar nahoj. U vyniku supracoŭnik «Žemčuhu» apynuŭsia na balničnaj kojcy sa šmatlikimi pierałomami i inšymi cialesnymi paškodžańniami. Jon da hetaha času lečycca ad atrymanych traŭmaŭ i paškodžańniaŭ.
Miedycynski ahlad zatrymanaha handbalista, zrobleny prykładna praz try hadziny paśla incydentu, pakazaŭ 0,43 pramile ałkaholu ŭ kryvi.
Praz dva tydni paśla zatrymańnia hulca kiraŭnictva kamandy raspaŭsiudziła infarmacyju ab tym, što zdareńnie ŭ kłubie ličać «pravakacyjaj suprać rasijskaha hramadzianina». Hiendyrektar «Danskich kazakoŭ» Jaŭhien Siamak tak rastłumačyŭ pryčynu hetaj vysnovy: «Jość fakt, jaki paćviardžaje, što byli skazanyja takija słovy: «Vy, ruskija, preč adsiul». Adnak u materyjałach spravy hetaja viersija, vidavočna, nie znajšła svajho paćvierdžańnia.
Sam spartsmien svaju vinu całkam pryznaŭ i vykazaŭ «čystasardečnaje raskajańnie». Jon taksama zapłaciŭ paciarpiełamu bieraściejcu 13 tysiač rubloŭ u košt kampiensacyi maralnaj škody i vydatkaŭ na lačeńnie. Sam paciarpieły zajaviŭ, što pretenzij da Sinicyna nie maje.
7 kastryčnika sud vynies rasijaninu prysud — 3 miesiacy aryštu.
Kamientary