Masavy rasstreł mabilizavanych pad Biełharadam. Što viadoma na hety momant?
U subotu na vajskovym palihonie ŭ Biełharodskaj vobłaści adbyłosia masavaje zabojstva. Aficyjnyja krynicy nazvali zdareńnie «teraktam» i zajavili pra 11 achviar, telehram-kanały pišuć, što zabitych u dva razy bolš.
«Mieduza» sabrała ŭsio, što viadoma na hety momant.
Minabarony Rasii aficyjna zajaviła, što ŭ subotu padčas zaniatkaŭ pa ahniavoj padrychtoŭcy z udziełam dobraachvotnikaŭ dvoje hramadzian «adnoj z krain SND» adkryli ahoń pa asabovym składzie. Stralajučyja, pavodle viersii Minabarony, byli zabityja.
Krynica telehram-kanała Sota śćviardžaje, što tych, chto stralaŭ, było troje i adnamu ź ich nibyta ŭdałosia źbiehčy. Pa nieaficyjnych źviestkach, zabojstva adbyłosia ŭ pieršaj pałovie dnia; Minabarony abjaviła pra jaho tolki ŭviečary.
Rasijskija «patryjatyčnyja» telehram-kanały pišuć, što strałki, mierkavana, byli ŭradžencami Tadžykistana. Aficyjna heta nie paćvierdžana. «Mieduza» zaznačaje, što ŭ vieraśni ŭłady Rasii vyrašyli padavać rasijskaje hramadzianstva ŭ sproščanym paradku zamiežnikam, jakija zaklučyli kantrakt na słužbu va ŭzbrojenych siłach RF.
Minabarony RF acharaktaryzavała toje, što adbyłosia, jak terakt. Śledčy kamitet aficyjna ab raspačynańni spravy nie paviedamlaŭ. Pavodle infarmacyi «Kommiersanta», viedamstva raspačała spravu pa artykule «zabojstva»; artykuł ab terakcie «moža dadacca», piša hazieta.
Hubiernatar Branskaj vobłaści Viačasłaŭ Hładkoŭ nazvaŭ toje, što zdaryłasia «strašnaj padziejaj» i skazaŭ, što «zahinuli i paranienyja mnohija vajskovasłužboŭcy». Jon padkreśliŭ, što žycharoŭ Biełharadskaj vobłaści siarod achviar niama.
Na palihonie Sołaci znachodziacca mnohija mabilizavanyja z Branskaj vobłaści — i raniej jany skardzilisia na prablemy. Sa słoŭ surazmoŭcy Sota, jaki prysutničaŭ na strelbiščy padčas zabojstva, vynikaje, što žychary Branskaj vobłaści jość i siarod paciarpiełych. U pačatku kastryčnika Sota pisała, što bolš za sto mabilizavanych žycharoŭ Branskaj vobłaści z palihona Sołaci admaŭlajucca jechać va Ukrainu, niahledziačy na pahrozy z boku načalstva. Śćviardžałasia, što ich chočuć adpravić u nastup na stračany US RF u pačatku kastryčnika Liman.
15 kastryčnika byŭ apublikavany videazvarot da Uładzimira Pucina siemiarych žančyn z Fokina Branskaj vobłaści, svajaki jakich byli mabilizavanyja i, pavodle ich słoŭ, biez padrychtoŭki adpraŭleny na pieradavuju — chacia jany «padpisvalisia» nie na heta, a na abaronu «svajoj Branskaj vobłaści». U videazvarocie zhadvajucca i aficery z vajskovaj častki ŭ Sołaciach, jakija, jak vynikaje sa słoŭ adnoj z žančyn, pahražajuć mabilizavanym kryminalnaj adkaznaściu za admovu «być harmatnym miasam».
Ciapier čytajuć
Chto tyja dva piersanažy, jakija nie pili ŭ mižvajennaj Vilni, jak Zośku Vieras abudzili ad letarhii i ci praŭdzivaja bajka pra Karatkieviča i restaran11
Kamientary