The Times: Pientahon daŭ Ukrainie zialonaje śviatło na ŭdary dronami pa celach u Rasii

Praz toje, što ŭ kastryčniku Rasija pačała rehularnyja ataki mirnych žycharoŭ va Ukrainie, ministerstva abarony ZŠA pierahledzieła svaju acenku pahrozy hetaj vajny. U pryvatnaści, razmova idzie pra novyja dumki nakont taho, ci mohuć pastaŭki zbroi USU pryvieści da vajennaj kanfrantacyi pamiž RF i NATA.

Jak havorycca ŭ materyjale, heta ŭjaŭlaje saboj važnuju padzieju ŭ rasijskaj poŭnamaštabnaj vajennaj ahresii suprać Ukrainy, bo zaraz Vašynhton z bolšaj vierahodnaściu pastavić Kijevu zbroju bolšaj dalokaści.

«My ŭsio jašče vykarystoŭvajem tyja ž raźliki eskałacyi, ale strach pierad eskałacyjaj źmianiŭsia ŭ paraŭnańni z tym, jakim jon byŭ u pačatku. Ciapier usio pa-inšamu. Heta tamu, što acenka vajny źmianiłasia ŭ vyniku pakut i žorstkaści, jakija ŭkraincy cierpiać z boku rasijanaŭ», — skazała krynica vydańnia ŭ amierykanskim abaronnym viedamstvie.

Vašynhton ciapier mienš zaniepakojeny tym, što novyja dalnabojnyja ŭdary na terytoryi RF mohuć pryvieści da dramatyčnaj eskałacyi. Dahetul usie «zvarotnyja» ataki Maskvy ŭklučali zvyčajnyja rakietnyja ŭdary pa cyvilnych abjektach va Ukrainie.

Pierad hetym Pientahon z bolšaj aściarožnaściu staviŭsia da ŭkrainskich udaraŭ pa RF, bo bajaŭsia, što Kreml adkaža taktyčnaj jadziernaj zbrojaj abo nacelicca na susiednija krainy NATA.

Pry hetym Vašynhton nie źbirajecca publična padtrymlivać dalokija ŭdary USU ŭhłyb rasijskaj terytoryi. Aficyjnuju pazicyju Štataŭ u dačynieńni da ich na hetym tydni ahučyŭ dziaržsakratar Entani Blinkien, jaki adznačyŭ: «My nie zaachvočvali i nie dazvalali ŭkraincam nanosić udary ŭnutry Rasii».

U toj ža čas krynica ŭ Minabarony ZŠA skazała: «My nie kažam Kijevu: «Nie rabicie ŭdary pa rasijanach. My nie možam skazać im, što rabić. Im vyrašać, jak jany vykarystoŭvajuć svaju zbroju. Ale, kali jany vykarystoŭvajuć pastaŭlenuju nami zbroju, my nastojvajem tolki na tym, kab ukrainskija vajskoŭcy vykonvali mižnarodnyja zakony vajny i Ženieŭskuju kanviencyju».

«Heta adzinyja abmiežavańni», — padkreśliła krynica ŭ Pientahonie i dadała, što «nakolki im viadoma», Ukraina ich vykonvaje.

Ukrainskija siły ŭ ramkach hetych abmiežavańniaŭ ciapier viaduć bolš aktyŭnyja dziejańni suprać celaŭ na terytoryi RF. Ukraina starałasia vykarystoŭvać ułasnyja bieśpiłotniki, a nie zbroju, pastaŭlenuju ZŠA, dla naniasieńnia ŭdaraŭ.

Bieśpiłotniki, zasnavanyja na savieckich sistemach nazirańnia Tu-141 «Stryž», raspracavanych u 1970-ch hadach, byli pieraprahramavanyja, kab pavialičyć ich dalokaść i bojezapas dla zapusku na małoj vyšyni.

U materyjale havorycca, što takija madyfikavanyja Tu-141 byli zadziejničanyja na hetym tydni ŭ troch nalotach na vajskovyja bazy za 480 km ad rasijskaj miažy i na paliŭnyja baki prykładna za 130 km ad miažy z Ukrainaj, u kožnym vypadku jany ŭchilalisia ad srodkaŭ SPA. Drony mohuć lotać z chutkaściu kala 965 km/h na małoj vyšyni, jak kryłatyja rakiety.

• 41
• 0
• 2
• 1
• 1
• 3
• 3
• 0