Mer Kijeva: Horadu nie chapaje 30% elektraenierhii, kałaps moža adbycca ŭ luby momant
Mer Kijeva Vital Kličko zajaviŭ u intervju ahienctvu Reuters, što ŭkrainskaj stalicy nie chapaje prykładna traciny nieabchodnaj joj elektraenierhii, i sistema moža abrynucca ŭ luby momant.
Ź siaredziny kastryčnika armija RF rehularna pravodzić masiravanyja abstreły ŭkrainskaj enierhietyčnaj infrastruktury, sprabujučy paškodzić elektrastancyi i raźmierkavalnyja mahutnaści. U Kijevie ŭviedzienyja viejernyja adklučeńni elektraenerhii, u niekatorych vypadkach uładam davodzicca pravodzić avaryjnyja adklučeńni.
«My nie havorym pra kałaps, ale jon moža adbycca ŭ lubuju siekundu, tamu što ŭ lubuju siekundu rasijskija rakiety mohuć razburyć krytyčnuju infrastrukturu ŭ našym rodnym horadzie Kijevie i nie tolki ŭ Kijevie, u inšych haradach taksama, — skazaŭ Kličko. — Ciapier u Kijevie ŭ nas deficyt enierhii prykładna 30%».
Siarhiej Kavalenka, kiraŭnik kampanii «Jasna», jakaja pastaŭlaje elektraenierhiju i haz u Kijevie, udakładniŭ, što ciapier stalica atrymlivaje «974 MVt ź nieabchodnych 1600».
«Situacyja praciahvaje być składanaj, i abmiežavańni ciapier — heta adzinaja mahčymaść nie zrabić usio jašče horš», — napisaŭ Kavalenka ŭ fejsbuku.
Jon patłumačyŭ, što ciapier kraina maje značny deficyt u hienieracyi elektraenierhii. Pa słovach Kavalenki, da vajny ŭ enierhasistemie Ukrainy 55% vytvorčaści elektryčnaści prychodziłasia na atamnyja elektrastancyi, CES i CEC — 29%, hidraelektrastancyi — 7% i 9% — na adnaŭlalnyja krynicy enierhii.
Ale ciapier atamnyja elektrastancyi pracujuć nie ŭ poŭnaj miery, tak jak najbujniejšaja ź ich, Zaparožskaja AES, akupavanaja rasijanami, nie pastaŭlaje enerhiju.
Pry hetym u vyniku rasijskich udaraŭ taksama paškodžanyja CES, jakija vykarystoŭvajucca «dla chutkaha bałansavańnia hienieracyi i spažyvańnia», patłumačyŭ Kavalenka. «Tamu sprabujuć vykarystoŭvać hidraelektrastancyi, ale, jak my viedajem, jany patrabujuć času na adnaŭleńnie», — praciahnuŭ kiraŭnik kampanii «Jasna».
«Usie siły enierhietykaŭ ciapier nakiravany na adnaŭleńnie. Ramonty praciahvajucca. Tamu varta prajavić ciarpieńnie», — zaklučaje Kavalenka.
Kamientary