Dyk ci pajedzie Niedasiekaŭ na Alimpijadu? Voś čaho čakać ad asłableńnia spartovaha banu

Asnoŭnaja ideja takaja: vykankam MAK raić mižnarodnym spartovym fiederacyjam dapuskać da mižnarodnych spabornictvaŭ atletaŭ z rasijskimi ci biełaruskimi pašpartami, ale pry hetym spartoŭcy musiać vystupać u niejtralnym statusie. U toj ža čas nie staić pytańnie ab dopusku biełarusaŭ i rasijan u kamandnych vidach sportu, a taksama ab dopusku tych, chto padtrymlivaje vajnu va Ukrainie, i supracoŭnikaŭ siłavych struktur.

Rekamiendacyi MAK nie datyčać Alimpijad 2024 i 2026 hadoŭ, bo pa ich rašeńni buduć pryniatyja asobna. Ale ž adznačym, što, kab trapić na Hulni, spartoviec pavinien atrymać alimpijskuju licenziju na adnym z adpaviednych mižnarodnych turniraŭ, i kali jon nie budzie da ich dapuščany, to nie trapić i na Alimpijadu.

Dla biełaruskaha i rasijskaha sportu ciapierašnija rekamiendacyi — nie samy horšy vynik. Bolšaść tych spartoŭcaŭ, chto zastaŭsia pa-za turnirami paśla pačatku vajny, dakładna zmohuć tudy viarnucca, bo papiarednija sankcyi, u adroźnieńnie ad ciapierašnich, całkam vykidali ź mižnarodnych turniraŭ hramadzian Biełarusi i Rasii. Ukraina, Polšča i krainy Bałtyi i ciapier vystupali suprać taho, kab źniać spartovy ban.

Tatalny ban dla spartoŭcaŭ z rasijskimi i biełaruskimi pašpartami zakranuŭ i tych atletaŭ, jakija paśla padziej 2020-ha vykazalisia suprać režymu i nie padtrymali vajnu. Bolšaść ź ich była vymušanaja emihravać, bahata chto skončyŭ karjeru, bo nie mieŭ mahčymaści praciahnuć vystupy i treniroŭki.

Rašeńnie MAK pakidaje šerah pytańniaŭ. Naprykład, jak budzie vyznačacca, padtrymlivaje spartoviec vajnu ci nie? Adnym z adkazaŭ mahło b być publičnaje asudžeńnie vajny abo padpisańnie adpaviednaha dakumienta nakštałt Antyvajennaj dekłaracyi spartoŭcaŭ, raspracavanaj hod tamu Biełaruskim fondam spartovaj salidarnaści.

Ale bolš imaviernym padajecca inšy vynik: na turniry aŭtamatyčna pajeduć usie atlety, chto nie vystupaŭ u padtrymku vajny adkryta i niedvuchsensoŭna. Ale ci buduć mižnarodnyja spartovyja fiederacyi prysłuchoŭvacca da rekamiendacyj MAK? Mižnarodnaja asacyjacyja lohkaatletyčnych fiederacyj, naprykład, nie žadaje dapuskać da svaich turniraŭ nikoha z rasijan i biełarusaŭ.

Inšaje pytańnie datyčyć atletaŭ, jakija naležać da siłavych struktur. Patłumačym: kali toj ci inšy spartoviec pracaŭładkavany va ŭmoŭnym KDB, ale heta nie značyć, što jon chodzić tudy na słužbu. Atletaŭ, i nie tolki ŭ Biełarusi, paprostu prypisvajuć da takich struktur, i tyja płaciać im zarobki, sam ža spartoviec u toj čas pryśviačaje siabie treniroŭkam i turniram.

Pra jakich kankretna spartoŭcaŭ idzie havorka? Voś tolki niekalki samych viadomych imion, prypisanych da biełaruskich Uzbrojenych sił:

• Dzinara Smolskaja — bijatłanistka, alimpijskaja čempijonka — 2018 u žanočaj estafiecie;
• Ali Šabanaŭ — pradstaŭnik volnaj baraćby;
• Nastaśsia Škurdaj — płyŭčycha, čempijonka Jeŭropy — 2019 siarod junijoraŭ;
• Maksim Niedasiekaŭ — lohkaatlet, srebrany pryzior čempijanatu Jeŭropy — 2018, bronzavy pryzior Alimpijady-2020;
• Nastaśsia Prakapienka — piaciborka, udzielnica čatyroch Alimpijad, bronzavaja pryziorka Alimpijady;
• Alina Tałaj — lohkaatletka, pryziorka čempijanatu śvietu.

Amal usie ź ich, za vyklučeńniem Nastaśsi Škurdaj i Aliny Tałaj, tym ci inšym čynam vystupali ŭ padtrymku režymu Łukašenki.

Jość takija spartoŭcy i ŭ inšych siłavych strukturach. Naprykład, u MUS ličycca lohkaatletka Nastaśsia Mirončyk-Ivanova, adna z samych aktyŭnych prychilnic dziejnaj biełaruskaj ułady.

Zhodna z rekamiendacyjami MAK, takija spartoŭcy nie pavinny atrymać dostup da mižnarodnych turniraŭ. Ale zastajecca inšaje pytańnie: ci nie pastaviacca mižnarodnyja fiederacyi da svajoj pracy farmalna? Jakim čynam budzie harantavana vykanańnie na praktycy rekamiendacyj MAK? I ci moža jano ŭvohule być harantavana?

Pakul rašeńnie MAK vyklikaje bolš pytańniaŭ, čym adkazaŭ.

«Bali i abdymanki z Łukašenkam — nie palityka?» Spytali ŭ sumlennych spartsmienaŭ, ci varta źniać spartovy ban z Rasii i Biełarusi

Alena Leŭčanka i Alaksandra Hierasimienia aburylisia spartovym fondam, jaki vykarystoŭvaje ich imiony. Tam adkazali

Hienprakuratura budzie vyrašać, kamu sa spartoŭcaŭ z «čornaha śpisa» dazvolić vystupać

• 1
• 0
• 1
• 10
• 3
• 1
• 4
• 0