U Ispaniju pryjšła afrykanskaja śpioka — tam rekordnyja dla krasavika 38,7°C
Mietearałahičnaja słužba Ispanii ŭ čaćvier zarehistravała rekordna vysokuju dla krasavika tempieraturu. Paśla 5 viečara pa miascovym časie pavietra ŭ rajonie aeraporta Kardovy na poŭdni krainy prahrełasia da 38,7°C (Kardova i biez taho ličycca samym haračym horadam Jeŭropy), piša Bi-bi-si.
Sioleta krasavik u Ispanii vydaŭsia na redkaść haračym, u siarednim tempieratura tam na 10-15 hradusaŭ vyšej za zvyčajnuju dla hetaha času. Śpiecyjalisty tłumačać heta prychodam haračaha pavietra z Afryki, paśla čaho nastupiła biaźvietranaść, tamu śpioka tolki ŭzmacniałasia.
«Heta nienarmalna, tempieratura pavietra sioleta całkam vyjšła z-pad kantrolu», — zajaviŭ u intervju Bi-bi-si pradstaŭnik mieteasłužby Ispanii Kaetana Tores.
U suviazi ź niebyvałaj śpiokaj škoły ŭ Ispanii vymušanyja mianiać raskład, ciahniki mietro ŭ Madrydzie stali chadzić čaściej, kab ludzi nie zanadta doŭha čakali na raspalenych płatformach, a hramadskija basiejny sioleta buduć adkryty na miesiac raniej, čym zvyčajna, kab narod moh tam astudzicca.
Anamalnyja tempieratury, jakija rehistrujucca na hetym tydni ŭ Ispanii, mietearołahi tłumačać spałučeńniem niekalkich faktaraŭ.
Haračaje nadvorje, jakoje staić u Paŭnočnaj Afrycy, šturchaje chvalu śpioki ŭ Jeŭropu. Adnačasova vobłaść vysokaha cisku nad Ibieryjskim paŭvostravam i, jak vynik, biaschmarnaje nieba dazvalajuć soniečnym promniam bieśpieraškodna nahravać hlebu, jakaja ŭžo pierasochła i nie moža źnižać śpiakotu za košt vypareńniaŭ.
Sapraŭdy, ciapierašniaj chvali śpioki papiaredničała zaciažnaja zasucha ŭ mnohich rajonach Ispanii. Da prykładu, vadaschoviščy ŭ basiejnie raki Hvadałkvivir zapoŭnienyja tolki na 25%.
U sukupnaści ŭsio heta pahražaje mocnymi i zaŭčasnymi dla krasavika lasnymi pažarami, pryčym u zonie ryzyki znachodziacca šyrokija terytoryi. Letaś Ispanija ŭžo bolš za ŭsie jeŭrapiejskija krainy paciarpieła ad takich pažaraŭ.
Ciapier čytajuć
Chto tyja dva piersanažy, jakija nie pili ŭ mižvajennaj Vilni, jak Zośku Vieras abudzili ad letarhii i ci praŭdzivaja bajka pra Karatkieviča i restaran
Kamientary