Jakija źviestki biełarusaŭ uciakli ŭ sietku praz uzłom bujnych kram
Siońnia stała viadoma, što ŭ sieciva «ŭciakli» źviestki kala 730 tysiač karystalnikaŭ internet-kramy «Vostraŭ čyścini». Paru dzion tamu ŭzłamali «Buślik», vykraŭšy źviestki 220 tysiač biełarusaŭ. Raspaviadajem, jakija mienavita źviestki biełarusaŭ trapili ŭ adkryty dostup.
Dla kramy «Vostraŭ čyścini» heta druhaja ŭciečka za apošni hod. Minuły raz źlita było kala 150 tysiačaŭ zapisaŭ. My vyvučyli minułuju bazu, i voś što tam utrymlivajecca (śćviardžajecca, što źviestki ŭ novaj takija ž):
imia, proźvišča, numar telefona, elektronnaja pošta i adras žycharstva. Časta nijakaj infarmacyi niama, bo hetyja źviestki nieabaviazkovyja i ludzi ich nie ŭkazali.
Taksama byli ŭzłamany sierviery i skradzieny asabistyja źviestki 220 tysiač biełarusaŭ z kramy Buslik.by. Tam utrymlivajucca imiony, numary telefonaŭ i adrasy elektronnaj pošty (kali vy ich ukazali).
A jakija jašče źviestki pra biełarusaŭ «uciakli» letaś?
Najbujniejšaja ŭciečka pra biełarusaŭ u minułym hodzie źviazanaja z kramaj «Susiedzi». U joj źviestki 630 tysiač biełarusaŭ (telefon, imia, adras, data naradžeńnia). Paśla jaje — baza servisu dastaŭki ježy just-eat.by, u jakoj amal 240 tysiač numaroŭ (da ich pryviazany taksama adras). Paźniej — baza «Jandeks.Ježy», u jakoj 206 tysiač unikalnych telefonaŭ biełarusaŭ razam ź imionami i adrasami. Jašče adna baza — rasijski servis sietkavaha markietynhu NL International. Tam utrymlivajucca danyja dziasiatkaŭ tysiač biełarusaŭ (imia i proźvišča, telefon, jemejł, adras), a dla dyleraŭ NL — i numar pašparta.
Adbyvalisia i mienšyja źlivy źviestak — ź Biełhazprambanka (42 tysiačy zapisaŭ) i Nacyjanalnaha centra markietynhu i kanjunktury cen (55 tysiač zapisaŭ). Uklučna z raniejšaj uciečkaj, u asnoŭnym z rasijskich servisaŭ, varta kanstatavać, što ŭ siecivie dastupnyja niejkija źviestki amal pra luboha biełarusa, jaki karystajecca pasłuhami bujnych kampanij.
U čym niebiaśpieka i što možna zrabić?
Niebiaśpieka ŭ tym, što luby čałaviek u vypadku «źlićcia» vašych danych moža skarystacca hetymi źviestkami suprać vas. Da prykładu, viedajučy vaša proźvišča, adšukać vaš telefon abo aktualny adras žycharstva (u niekatorych navat numar pašparta). Taksama takija źviestki — heta asnoŭnaja krynica infarmacyi dla servisaŭ «prabić» ludziej, jakimi karystajucca ŭ tym liku i biełaruskija śpiecsłužby.
Kali vy chočacie abaranicca ad uciečki, to prosta nie ŭkazvajcie vašy sapraŭdnyja danyja va ŭsich servisach. Kali vy ŭžo patrapili ŭ takuju situacyju, to adziny varyjant — źmianić tuju infamacyju, što trapiła ŭ sieciva.
«Naša Niva» — bastyjon biełaruščyny
PADTRYMAĆCiapier čytajuć
Ukraina ŭpieršyniu adkazała na rasijskija ataki na składy «Novaj pošty» simietryčnymi ŭdarami pa chabach «Vajłdbieryz». Padmaskoŭny zhareŭ daščentu1010
Kamientary