«Jakoje dačynieńnie heta maje da vychavańnia lubovi da Radzimy?» Ministru adukacyi nie spadabałasia zahadka pra elfaŭ
U Biełarusi da 2027 hoda płanujuć pieravydać padručniki. Pa słovach ministra adukacyi Andreja Ivanca, jany majuć być «prasiaknutyja honaram» za krainu pa ŭzory savieckaha času, piša Reform.by.
«My siońnia, Ministerstva adukacyi, bačym hetuju prablemu, što vychavaŭčy patencyjał u našych padručnikach zadziejničany tolki z tak zvanym nacyjanalnym kantentam.
Ale nam treba śmialej iści nasustrač, nie bajacca słova «ideałohija», nie bajacca słova «patryjatyčnaje vychavańnie» i vykarystoŭvać tyja teksty, jakija ŭ kožnaj staroncy, u kožnym radku luboha padručnika buduć sapraŭdy pryvivać luboŭ da Radzimy, luboŭ da pracy, spačuvańnie i pavahu da ludziej, da žyvioł, luboŭ da pryrody.
Usio heta i jość składniki vychavańnia našaha padrastajučaha pakaleńnia», — zajaviŭ jon u prahramie «Pytańnie numar adzin» na telekanale «Biełaruś 1».
«Niaprostaja praca, i my razumiejem, što ŭvadnačas jaje zrabić vielmi składana, ale takuju
ambicyjnuju zadaču my pierad saboj stavim dla taho, kab usie navučalnyja vydańni, jakija my budziem pieravydavać, byli maksimalna nabližanyja da taho ŭzoru abo da taho ideału, jaki byŭ u saviecki čas», — dadaŭ ministr.
Dla prykładu jon uziaŭ padručnik pa ruskaj movie dla druhoha kłasa i začytaŭ zadańnie.
«Paŭlik i Alonka znajšli kartu lasnych elfaŭ, na jakoj paznačana, dzie schavany skarb. — Jakoje praviła vykarystoŭvali elfy, kab zašyfravać darohu da skarbu? Dapamažy dzieciam pračytać kartu». Heta značyć dla dziaciej, napeŭna, heta cikavaje zadańnie, ale jakoje dačynieńnie heta maje da vychavańnia lubovi da Radzimy?» — zadaŭsia pytańniem ministr.
«Pytańnie nie tolki ŭ nacyjanalnym kantencie. Siońnia ŭ našych padručnikach davoli vialikaja kolkaść infarmacyi pra našy pradpryjemstvy, pra naš realny siektar ekanomiki, pra našu pryrodu, pra našy słavutaści, ale my pavinny napramuju kazać, my abaviazanyja hanarycca našaj krainaj. My abaviazanyja hanarycca tym, što dasiahnuła naša kraina za hady niezaležnaści ŭ taki karotki pieryjad. Dzieści my jašče saromiejemsia pra heta hučna ŭ poŭny hołas kazać.
A heta pavinna być napisana ŭ padručniku absalutna na kožnaj staroncy, tamu što my pa pravu hanarymsia našaj krainaj, my pa pravu hanarymsia našym narodam. I my pa pravu hanarymsia tym, što ŭ nas taki prezident, jaki vybudavaŭ tuju palityku, jakaja dazvoliła nam siońnia ŭ vielmi niaprostych hieapalityčnych umovach zachavać mirnaje nieba nad hałavoj i roskvit u našaj krainie», — zajaviŭ jon.
Ministru zadali pytańnie, kali źjaviacca takija padručniki.
«Pieravydańnie liniejki padručnikaŭ u nas zapłanavana da 2027 hoda ŭklučna. Vidavočna, što da hetaha času my pavinny ŭsiu hetuju liniejku pry pieravydańni maksimalna nablizić da tych uzoraŭ, jakija byli ŭ saviecki čas», — adkazaŭ jon.
Ciapier čytajuć
«70% mastakoŭ u čornych śpisach». Mastak Siarhiej Hrynievič paśla tryumfu ŭ Vieniecyi raskazaŭ pra hady maŭčańnia i pra toje, na jakim śviecie jon apynuŭsia1515
Kamientary