«Cieły lažać paŭsiul». U vyniku katastrafičnaj pavodki ŭ Livii ŭžo naličyli bolš za 5300 zahinułych
U horadzie Derna byli zmytyja cełyja kvartały. Na mohiłkach znachodzicca bolš za 700 ciełaŭ, jakija čakajuć apaznavańnia, a miascovyja pradstaŭniki achovy zdaroŭja zajavili, što tysiačy čałaviek źnikli bieź viestak.
Pa słovach ministra ŭnutranych spraŭ va ŭradzie ŭschodniaj častki Livii, jakoha cytujuć miascovyja ahienctvy, zahinuła jak minimum 5300 čałaviek, paviedamlaje Bi-bi-si.
Inšyja krynicy hetuju ličbu pakul nie paćviardžali, ale vidavočna, što zahinułych — tysiačy.
Asnoŭnyja achviary i razbureńni pryjšlisia na partovy horad Derna na ŭschodzie krainy — u im pad naporam vady prarvała dźvie płaciny.
Ministr achovy zdaroŭja administracyi, jakaja kantraluje ŭschod Livii, raniej zajaviŭ, što paćvierdžana śmierć bolš za 3000 čałaviek. «Kolkaść źnikłych bieź viestak ličycca tysiačami, a kolkaść zahinułych, jak čakajecca, dasiahnie 10 000», — zajaviŭ Asman Abdel Džalil telekanału «Al-Masar».
U Dernie byli zmytyja cełyja kvartały. Na mohiłkach znachodzicca bolš za 700 ciełaŭ, jakija čakajuć apaznavańnia, a miascovyja pradstaŭniki achovy zdaroŭja zajavili, što tysiačy čałaviek źnikli bieź viestak.
«Situacyja ŭ horadzie stanovicca ŭsio bolš trahičnaj, kančatkovych statystyčnych źviestak ab kolkaści achviar niama, — skazaŭ Džalil. — Mnohija rajony pakul niedastupnyja».
Chikiem Abu Škiŭat, ministr hramadzianskaj avijacyi ŭ niepryznanym uradzie Uschodniaj Livii, zajaviŭ, što situacyja ŭ Dernie katastrafičnaja.
«Cieły lažać paŭsiul: u mory, u dalinach, pad budynkami, — skazaŭ Škiŭat ahienctvu Reuters u telefonnaj razmovie paśla naviedvańnia horada. — Ja nie pierabolšvaju, kali kažu, što 25% horada źnikła. Mnohija, mnohija budynki razburanyja».
«Kančatkovyja straty buduć vielmi, vielmi vialikimi», — dadaŭ jon.
Tamier Ramadan, pradstaŭnik Mižnarodnaj fiederacyi tavarystvaŭ Čyrvonaha Kryža i Čyrvonaha Paŭmiesiaca ŭ Livii, na bryfinhu ŭ Ženievie nazvaŭ kolkaść zahinułych vielizarnaj.
Baraćba z pavodkaj, pavodle jaho słoŭ, «vychodzić za ramki mahčymaściaŭ urada, hramadstva i naroda», i dla taho, kab dać rady jaje nastupstvam, spatrebicca mižnarodnaja dapamoha.
Śpiecyjalisty i raniej papiaredžvali, što płaciny ŭ Dernie moža prarvać. Ale kali heta adbyłosia, žycharam nichto nie paviedamiŭ.
Na videa, raspaŭsiudžanym u sacsietkach, vidać, jak ludzi malili ab dapamozie i kryčali, kali vada zatapiła ich damy. Patoki vady źmiali mašyny na vulicach.
Adzin žychar Derny, Chuzajfa al-Chasadzi, raspavioŭ telekanału «Al-Chura», što adnoj z abstavin trahiedyi staŭ reljef miascovaści: «Hłybinia niekatorych dalin, u jakich źbirajecca vada, kala 400 mietraŭ. Tamu, kali płacina prarvałasia, vada vyrvałasia jak atamnaja bomba, i vosiem mastoŭ i žyłych damoŭ całkam abvalilisia».
Pradstaŭnik upraŭleńnia nadzvyčajnych situacyj Livii Usama Ali zajaviŭ: «Usia vada nakiravałasia ŭ rajon niedaloka ad Derny, jaki ŭjaŭlaje saboj harystuju prybiarežnuju zonu… damy ŭ dalinach, jakija znachodzilisia na linii zatapleńnia, byli źniesienyja mocnymi patokami kałamutnaj vady, u jakich nieślisia zatoplenyja aŭtamabili i śmiećcie».
«Umovy nadvorja nie byli dobra vyvučanyja, nie była praviedziena evakuacyja siemjaŭ, jakija mahli apynucca na šlachu štormu i ŭ dalinach», — skazaŭ jon.
Akramia Derny, taksama paciarpieli harady Bienhazi, Susa i Al-Madž na ŭschodzie krainy.
Padčas vyratavalnych rabot źnikła siamiora vajskoŭcaŭ livijskaj armii.
Ułady na ŭschodzie Livii ŭviali kamiendanckuju hadzinu, a škoły i kramy zahadali začynić.
Ciapier čytajuć
Błohier Siaroha z Rasii pryjechaŭ na Zybickuju z kachanaj błohierkaj Aniečkaj. Vynik: źbity im biełarus u komie, a Siaroha na 5,5 hoda za kratami10
Kamientary