Tusk i hrodziency na kaleniach: rasijskaja prapahanda vykarystoŭvaje FOTA 18-hadovaj daŭniny, kab abrazić Ukrainu
Abrańnie Donalda Tuska premjer-ministram Polščy zapuściła novuju chvalu chejtu z boku rasijskaj prapahandy, jakaja daŭno nazyvaje jaho rusafobam. Cikavy fakt: hod za hodam dla dyskredytacyi palityka i stvareńnia fejkaŭ vykarystoŭvajecca fota, jakoje było zroblena ŭ Biełarusi ŭ 2005 hodzie.
Zdymak, na jakim ludzi stajać na kaleniach pierad Donaldam Tuskam, rehularna źjaŭlajecca na rasijskich sajtach i roznych pablikach z dopisami, jakija, pa zadumcy prapahandystaŭ, pavinny abražać hramadzian Ukrainy. Śćviardžajecca, nibyta heta ŭkraincy, jakija vyprošvajuć dapamohu ŭ Zachadu.
Ale ž nasamreč zdymku amal 20 hadoŭ — i pierad Tuskam na kaleniach stajać žychary Hrodna, a nie ŭkraincy. Palityk, jaki ŭ toj čas byŭ vice-śpikieram polskaha Siejma, pryjazdžaŭ u 2005 hodzie ŭ Biełaruś dla taho, kab padtrymać aktyvistaŭ miascovaha Sajuza palakaŭ (SPB).
U toj hod biełaruskija ŭłady admovilisia pryznavać abrańnie na pasadu kiraŭnika arhanizacyi Anžaliki Borys i inicyiravali stvareńnie praŭładnaj struktury z adnajmiennaj nazvaj. U Hrodnie Tusk vystupiŭ na mitynhu SPB, adrazu paśla jakoha dvuch aktyvistaŭ zatrymali.
Biełaruskija ŭłady byli vielmi niezadavolenyja takim učynkam polskaha vice-premjera i navat abvinavacili jaho va ŭmiašańni va ŭnutranyja spravy krainy. Pomścić praciahnuli i tym, chto byŭ u SPB — prajšła chvala pieratrusaŭ i zatrymańniaŭ.
Ale Tusk nie supakoiŭsia i pradstaviŭ Anžaliku Borys kiraŭnikam jeŭrapiejskich struktur, čym nadaŭ lehitymnaści niedziaržaŭnamu Sajuzu palakaŭ Biełarusi.
U 2007 hodzie, kali Donald Tusk znoŭ chacieŭ pryjechać u Biełaruś, jaho mašynu nie prapuścili praź biełaruskuju miažu. Tady biełaruski KDB zrabiŭ zajavu, što Tusk viedaŭ ab svaim statusie non-hrata, ale naŭmysna pajšoŭ na skandał, kab pavysić papularnaść svajoj partyi pierad vybarami.
Sioleta amierykanski časopis Politico nazvaŭ Donalda Tuska samym upłyvovym čałaviekam Jeŭropy.
Čytajcie taksama:
Novy polski premjer Donald Tusk pradstaviŭ svoj budučy ŭrad
Cichanoŭskaja pavinšavała Tuska z abrańniem na pasadu premjera Polščy
Politico nazvaŭ samych upłyvovych ludziej śvietu. Na pieršym miescy ŭ Jeŭropie čałaviek, jaki pakul nie zajmaje nijakaj pasady
Były ministr kultury Rusłan Čarniecki znajšoŭ sabie padpracoŭku9
Kamientary