Ułady tak začyścili vystavu «Art-Minsk», što navat łukašenkaŭcam nie padabajecca
«Mis Biełaruś-2023» Eleanora Kačałoŭskaja naviedała vystavu «Art-Minsk» i rasčaravana pryznałasia, što joj było sumna praz pusteču ŭ halerei. A pryčyna hetaha prazaičnaja: palityčnaja cenzura.
Pryhažunia padzialiłasia ŭražańniami ad vystavy ŭ storys: «U hetym hodzie adrazu adznačyła ścipłaść «Art-Minska». Pryjemna było ŭbačyć novyja karciny ŭžo viadomych mastakoŭ. I sumna było, što adčuvajecca pustata ŭ halerei». Eleanora taksama adznačyła, što jaje favarytkaj užo nie pieršy hod źjaŭlajecca mastačka Alesia Skarabahataja. Karcina, jakaja spadabałasia madeli, nazyvajecca «Ramantyčnaja viačera» i kaštuje 31 500 rubloŭ.
Udzielnikaŭ vystavy sapraŭdy stała mienš. Pryčyna prazaičnaja: cenzura. Pieršy skandał, źviazany z hetym, adbyŭsia ŭ 2022‑m hodzie. Tady amal u apošni momant pierad uračystym adkryćciom vystavy z Pałaca mastactvaŭ u Minsku terminova vynosili raboty mastakoŭ, jakich paličyli «ideałahična nienadziejnymi» — pad katok cenzury trapili niekalki dziasiatkaŭ tvorcaŭ.
«Naša Niva» na ŭmovach ananimnaści pahavaryła z adnym z mastakoŭ, jaki trapiŭ u katehoryju «niepažadanych». Surazmoŭca kaža, što pa jaho padlikach praz cenzuru ŭ Biełarusi vykraślili z kulturnaha žyćcia nie mienš za paŭsotni tvorcaŭ.
Ale jon adznačaje, što ŭ hetym hodzie «Art-Minsk» jamu spadabaŭsia:
— Ščyra kažučy, ja liču, što ekspazicyja lepšaja, čym u minuły raz, jość šmat cikavych prac. Kali kamuści z naviedvalnikaŭ padałosia, što ŭ halerei «pustata» — dyk heta moža i dobra. Raźvieska sioleta dobraja, bo jość prastora. Zrazumieła, što cenzura ciapier davoli žorstkaja: kamisija ŭsio prahladaje niekalki razoŭ — pieršy raz paśla adboru prac i druhi, kali jany ŭžo raźviešanyja.
Jak kaža mastak, za dva hady z vystavy amal całkam źnikli pracy, pryśviečanyja biełaruskaj rečaisnaści:
— Ciapier na «Art-Minsku» sustrenieš chutčej pracy pra prablemy suśvietnaha maštabu, čym pra biełaruski paradak dnia. To-bok hetaja vystava pierastała źjaŭlacca niejkim zrezam ci pakazčykam žyćcia. Heta chutčej abhortka.
Nahavory i stukactva, pakaznaja łajalnaść, kvaterniki i mižsabojčyki. Apublikavany vyniki apytanki dziejačaŭ kultury ŭnutry Biełarusi
«Kali dziaržava pierapisvaje historyju, to čamu ja nie mahu zamianić Lenina Betmienam?» Hutarka z mastakom Bielskim, jaki trapiŭ u niamiłaść Minkulta
«Niezadavalniajučaje pakryćcio». Čamu ŭ Minsku źnikli viadomyja hrafici?
Adkryłasia virtualnaja vystava mastackich tvoraŭ, źniatych z ekspazicyi «Art-Minska»
Ciapier čytajuć
Błohier Siaroha z Rasii pryjechaŭ na Zybickuju z kachanaj błohierkaj Aniečkaj. Vynik: źbity im biełarus u komie, a Siaroha na 5,5 hoda za kratami10
Kamientary