Vaskrasienski choča, kab Pačobuta pryjechaŭ zabirać asabista Sikorski

Łukašenkaŭski prapahandyst Juryj Vaskrasienski śćviardžaje, što biełaruski režym prapanoŭvaŭ vysłać ź Biełarusi Andžeja Pačobuta ŭ ramkach rasijska-amierykanskaha abmienu źniavolenymi. U Minsku chacieli, kab biełaruska-polskaha žurnalista ź Biełarusi vyviez asabista kiraŭnik MZS Polščy Radasłaŭ Sikorski. Pra heta Vaskrasienski zajaviŭ u efiry jutub-strymu 4 vieraśnia, adkazvajučy na pytańni Ryhora Azaronka, zaŭvažyŭ Reform.news.

Prapahandysty abmiarkoŭvali pamiłavańnie 30 palitviaźniaŭ. Vaskrasienski niekalki razoŭ prahavaryŭ tezis ab žadańni atrymać u abmien na vyzvaleńnie častki palitviaźniaŭ niejkija sastupki z boku Zachadu.

«Nam vielmi chočacca pačuć, što ŭ adkaz na karyść i dabryniu z boku kiraŭnika dziaržavy jany prapanujuć naŭzamien», — skazaŭ Vaskrasienski.

Zatym uspłyła tema biełaruska-polskaha palitviaźnia Andžeja Pačobuta. Vaskrasienski zajaviŭ, što Pačobuta prapanoŭvali adpuścić u ramkach rasijskaha-amierykanskaha abmienu, ale zabrać jaho pavinien byŭ asabista ministr zamiežnych spraŭ Polščy Radasłaŭ Sikorski.

«Słuchajcie, z Pačobutam — heta… ja dahetul znachodžusia ŭ šoku. Jany mianie 4 hady abchodžvali: «vyciahni Borys (Anžalika Borys — aktyvistka polskaj mienšaści ŭ Biełarusi), Pačobuta, vyciahni Borys, Pačobuta». Kali łaska, pa Borys — my sustrelisia ź jaje mamaj, skłali list, my pieradali list — Borys vyjšła.

Pa Pačobutu — 18 sustreč u mianie było z časovym pavieranym u spravach Polščy. Voś ciapier źjaviłasia ŭnikalnaja mahčymaść.

Zabiarycie hety bałast. Padčas ździełki pa abmienie prapanavali-admovilisia, admovilisia, potym pačali chłusić. Dobra. Ja dapuskaju, jak my ŭ adnym z efiraŭ abmiarkoŭvali, što amierykancy, jany nie ličać palakaŭ roŭnymi sabie, heta ich absłuha ŭschodniejeŭrapiejskaja…

Mahčyma, jany im navat nie paviedamili. Dobra. Ale my to vam paviedamili, my heta skazali i Sikorskamu. Ja telefanuju biaskonca byłomu časovamu pavieranamu Vajciachoŭskamu. Jon nie padymaje słuchaŭku. Ja napisaŭ Sikorskamu publična ŭ sacyjalnaj sietcy: «Zabiraj, zabiraj, padymaj zad i zabiraj».

Kali ty dumaješ, my za kimści budziem biehać z hetym Pačobutam? Nie. Značyć, jon adsiedzić uvieś termin. A moža atrymaje jašče i druhi, kali budzie drenna siabie pavodzić u kałonii. Nu što vy na samaj spravie jak dziciačy sad. Padymi ty zad, pryjedź u Minsk i zabiary ty hetaha Pačobuta. My što, pavinny biehać za taboj? Tamu z Pačobutam, ja, ščyra kažučy, u lutaści, nakolki jany jaho nie pavažajuć i nie pavažajuć uvieś polski narod», — zajaviŭ prapahandyst.

Vaskrasienski viadomy tym, što vykarystoŭvajecca dla manipulacyi hramadskaj dumkaj i imitacyi palityčnaha dyjałohu režymu Łukašenki z hramadzianami Biełarusi. Jon uvachodzić u skład tak zvanaj kamisii pa pamiłavańni. Vaskrasienski nieadnarazova publična chłusiŭ.

Varta nahadać, u kancy žniŭnia polski prezident Andžej Duda zajaviŭ, što polski bok sapraŭdy abmiarkoŭvaŭ mahčymaść vyzvaleńnia palitviaźnia žurnalista Andžeja Pačobuta ŭ ramkach rasiejska-amierykanskaha abmienu.

«Času na pieramovy nie było. Kali b abmien zabłakavali i vyśvietliłasia, što heta było suprać voli Andžeja Pačobuta, u nas uźnikła b vielmi surjoznaja prablema», — pryznaŭsia Duda.

• 2
• 2
• 0
• 7
• 0
• 0
• 4
• 0