Pamiatajecie historyju pra chatnich pacukoŭ u centry Minska? Čym usio skončyłasia
Na minułym tydni ŭ tyktoku źjaviŭsia rolik, źniaty na vulicy Kulman: u kadry niekalki pacukoŭ roznaha koleru i ŭzrostu vybiahajuć z-pad kusta i navat nie bajacca ludziej.
«Jak vas tut šmat!» — usklikała aŭtar rolika. Dziaŭčyna vykazała zdahadku, što hryzunoŭ vykinuli — z vyhladu pacuki chutčej nahadali dekaratyŭnych. Častka kamientataraŭ pahadzilisia i navat vykazali zdahadku, što heta moža być za paroda.
Vybrosili domašnich krys na Kulman(
Paśla ahałoski ratavać hryzunoŭ padachvocilisia vałanciory: budučyja chałady pacuki mahli nie pieražyć. Śpiarša złavić atrymałasia nie ŭsich pacukoŭ, ale niadaŭna vałanciory raspaviali pra pośpiech vyratavalnaj apieracyi, piša Onliner.by.
Žurnalisty taksama źviarnulisia da śpiecyjalistaŭ, jakija paćvierdzili zdahadki kamientataraŭ: pacuki vidavočna chatnija. Na heta pakazvaje afarboŭka i navat pavodziny: z-za pačućcia niebiaśpieki dzikija hryzuny nie pojduć na kantakt z čałaviekam.
— Adnaznačna, niejki biessaromny čałaviek vykinuŭ chatnich hadavancaŭ. I vidavočna nie paru dzion tamu, kali ŭličyć, što my bačym nie tolki darosłych asobin, ale i małych, jakija vyvielisia, chutčej za ŭsio, u nary, jakuju žyvioły zrabili ŭ karaniach dreŭ. Marazy jany pieranosiać drenna, i kali ich nie adłavić, to, chutčej za ŭsio, žyvioły zahinuć, — adznačyła ekśpiert.
Jak ratavali pacukoŭ?
Paśla taho jak rolik zavirusiŭsia (ciapier u videa bolš za 250 tysiač prahladaŭ), na historyju źviarnuli ŭvahu vałanciory. Niekalkich hryzunoŭ tady ŭdałosia vyratavać. Hryzunami zajmalisia pradstaŭniki vałanciorskaha atrada «RATuj!».
Miarkujučy pa ŭzroście, pacukoŭ vykinuli prykładna 2-3 miesiacy tamu. Starejšyja padletki dvuchmiesiačnyja, małyja zusim maleńkija, tolki pačali sami vychodzić z nary. Chutčej za ŭsio, naradzilisia ad adnoj i toj ža darosłaj pacučychi.
— Dakładna ŭpeŭnieny: zastalisia dva čornyja padletki i dvoje ci troje małych. Darosłych pacukoŭ my nie bačyli ni razu. Spadziajemsia, što jany jašče žyvyja i prosta aściarožničajuć. Ale da nas vychodzili tolki dzieci, — kazała tady Maryna.
Čym usio skončyłasia?
Na hetym tydni vałanciory raspaviali, što narešcie ŭdałosia złavić usich hryzunoŭ. Usiaho vyratavali 12 pacukoŭ.
— Vyłavić atrymałasia ŭsich. My nazirali za tymi, chto vychodziŭ, i ŭsie, kaho bačyli, papalisia. My taksama pakinuli zbožža hłyboka ŭ nary, i za try dni jaho nichto nie kranuŭ. Pakul ža pacuki byli tam, korm chutka zaciahvaŭsia ŭ hłybiniu, — raspaviała Onlíner pacukavod vałanciorskaha atrada «RATuj!» Maryna. — Pacuki ŭsie zdarovieńkija i čystyja. U małych jość nievialikija prablemy sa stravavańniem, ale heta chutka vyrašajecca pravilnym prykormam. Ź psichikaj u ich usio ŭ paradku: usie adaptavalisia, ručnyja i łaskavyja.
Pa damach nikoha pakul nie razdavali, usio pad nahladam u vałancioraŭ. Častka pacukoŭ užo na broni, adkormlivajucca, karanciniacca i na nastupnym tydni pajeduć u novaje žyćcio. Chtości nazaŭždy zastaniecca ŭ vałancioraŭ, astatnija buduć šukać dom. U nas zaŭsiody jość žadajučyja ŭziać małych abo sterylnych dziaŭčynak, tamu pavinny prystroicca dosyć chutka.
Ciapier čytajuć
U Aleksandryi Łukašenka pasadziŭ da siabie 23‑hadovuju pryhažuniu20
U Aleksandryi Łukašenka pasadziŭ da siabie 23‑hadovuju pryhažuniu
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam3030
Kamientary