Biełarus u Sierbii rychtavaŭ prarasijskich aktyvistaŭ dla destabilizacyi ŭ Małdovie
Pavodle infarmacyi čarnahorskaha vydańnia Vijesti, napiaredadni parłamienckich vybaraŭ u Małdovie, jakija prajšli 28 vieraśnia, biełarus Alaksandr Hantaroŭ razam z rasijaninam Siarhiejem Andrejenkavym na terytoryi kompleksu Sunčana reka niedaloka ad sierbskaha horada Łoźnica ŭ pieryjad ź lipienia pa vierasień navučyli bolš za 150 prarasijskich aktyvistaŭ raspaznavańniu bajavych celaŭ i stralbie, piša «Radyjo Svaboda».
Padrychtoŭka, jak paviedamlajecca, była arhanizavanaja z metaj zryvu parłamienckich vybaraŭ u Małdovie ŭ vypadku vyniku, niespryjalnaha dla prarasijskich sił.
Vajskovyja instruktary dvojčy vyjazdžali ŭ Čarnahoryju ź Sierbii, kab nie parušać zakanadaŭstva, bo rasijanie i biełarusy mohuć znachodzicca ŭ Sierbii bieź vizy tolki 30 dzion.
Viadoma, što Siarhiej Andrejenkaŭ padčas poŭnamaštabnaha ŭvarvańnia armii RF va Ukrainu ŭ 2022 hodzie pracavaŭ daradcam kiraŭnika vajskova-cyvilnaj administracyi akupavanaj terytoryi Charkaŭskaj vobłaści Ukrainy.
Pierad parłamienckimi vybarami małdaŭskaja palicyja praviała šerah pieratrusaŭ, u vyniku jakich byli zatrymanyja 74 čałavieki, jakija padazrajucca ŭ prachodžańni padrychtoŭki ŭ Sierbii pry kaardynacyi rasijskich śpiecsłužbaŭ z metaj pravakacyi hvałtu i masavych biesparadkaŭ. Hetaja hrupa asob vyvučała taktyku praryvu palicejskich kardonaŭ, vykarystańnie humovych dubinak, pryjomy abychodžańnia z ahniastrelnaj zbrojaj.
Jeŭrakamisija rasśleduje, jakim čynam dziasiatki hramadzian Małdovy prajšli ŭ Sierbii takoje navučańnie. Palicyja Sierbii zatrymała dvuch hramadzian pa padazreńni ŭ arhanizacyi i finansavańni łahiera kala Łoźnicy.
Pavodle danych śledstva, adzin z aryštavanych padazrajecca ŭ vypłacie praz svaje kampanii kala 10 tysiač jeŭra instruktaram vajenizavanaj padrychtoŭki.
Małdova pakazała, jak Pucinu i Łukašenku možna davać pa zubach i ŭ hibrydnaj vajnie
BiełdziaržSMI i kanały siłavikoŭ sprabavali budaražyć Małdovu razam z rasijanami. Voś što z hetaha vyjšła
Małdavanie Biełarusi hałasavali nie tak, jak małdavanie Rasii. Upłyŭ prajeŭrapiejskich nastrojaŭ u biełaruskim hramadstvie?
Na vybarach u Małdovie pieramahła prajeŭrapiejskaja partyja prezidenta Sandu, prarasijskaja apazicyja prajhrała
Ciapier čytajuć
Łukašenka zaklikaŭ žycharoŭ Homielščyny nie chvalavacca z-za ŭltymatumu Zialenskaha adnosna retranślataraŭ50
Kamientary