U Sudanie paŭstancy źbili samalot ź biełaruskim vajskovym lotčykam. Voś što pra jaho viadoma

U Sudanie praciahvajecca hramadzianskaja vajna. Kanflikt idzie pamiž uradavymi vojskami i Siłami chutkaha reahavańnia (SCHR) — mahutnym vajskovym farmavańniem, jakoje kaliści ŭvachodziła ŭ skład armii, ale paśla stała samastojnaj siłaj. Da niadaŭniaha času Siły chutkaha reahavańnia padtrymlivała Rasija, u tym liku PVK «Vahnier».

Dniami paŭstancy źbili rasijski transpartny samalot, jaki pieravoziŭ niešta na patreby ŭrada Sudana. Ekipaž zahinuŭ — heta troje rasijan i adzin biełarus, Alaksandr Hraznoŭ.

Hraznovu 62 hady. Z 1980 pa 1985 hady jon vučyŭsia ŭ Irkuckim vajskovym avijacyjna-techničnym vučyliščy. Byŭ vajskoŭcam.

U Hraznova dvoje darosłych dziaciej — dačka i syn.

Doŭhi čas Hraznoŭ pracavaŭ u rasijskaj transpartnaj firmie «Avijakon Cytatrans» (Aviacon Zitotrans). Jany pieravoziać hruzy pa ŭsim śviecie — raniej pracavali i ŭ Jeŭrasajuzie.

Pavialičyć

Siarod admietnych hramadzianskich hruzaŭ, jakija jany pieravozili, — hienieratary vahoj bolš za 40 ton, słany i viertaloty. Supracoŭničali jany i z AAN, pieravoziačy hruzy ŭ zony vajennych kanfliktaŭ i stychijnych biedstvaŭ.

Ale ŭ dziejnaści kampanii jość i druhi bok. «Avijakon» maje licenziju na transparciroŭku jadziernych materyjałaŭ i radyjeaktyŭnych rečyvaŭ, a taksama rekamiendavana Mintransam Rasii dla pieravozki vajskovaj pradukcyi. Sa studzienia 2023 hoda kampanija pad sankcyjami ZŠA za pieravozku abstalavańnia dla PVK «Vahnier» i rasijskaj armii. Kampanija sprabuje abychodzić sankcyi, vykarystoŭvajučy firmy-prakładki ŭ roznych krainach.

Krainy, u jakich pracuje kampanija, — siabroŭskija režymu Pucina. Naprykład, miesiac tamu samalot kampanii pryvioz z Rasii niejki hruz u Vieniesuełu akurat padčas abvastreńnia adnosinaŭ z ZŠA.

Naprykład, podpis da adnaho z fota Hraznova: «Demakratyčnaja dapamoha dla vybaraŭ u Konha, vierasień 2011». Na hetych vybarach pieramoh dziejučy prezident Žozef Kabiła, a naziralniki i apazicyja zajavili pra vielizarnyja falsifikacyi.

Pavialičyć

Biełaruski lotčyk pracavaŭ u kampanii minimum z 2011 hoda. Zarpłata ŭ jaho dobraja — tak, u 2017‑m jon atrymlivaŭ da $12 tysiač na miesiac.

Za apošnija 10 hadoŭ Hraznoŭ lotaŭ hramadzianskimi avijalinijami nie mienš za 81 raz. Kirunki — Kitaj (21 pieralot), Bałharyja (13 pieralotaŭ), AAE (7 pieralotaŭ), Indyja (5 pieralotaŭ), Bachrejn (5 pieralotaŭ), Biełaruś (4 pieraloty), Iran (4 pieraloty), Jehipiet (4 pieraloty), Turkmienistan (3 pieraloty), Sierbija (3 pieraloty), Irak (3 pieraloty), Kaba-Vierde (3 pieraloty), Uhanda (2 pieraloty), Narviehija (2 pieraloty), Charvatyja (2 pieraloty), Azierbajdžan (2 pieraloty), Turcyja (2 pieraloty), Mjanma (2 pieraloty), a taksama pa adnym pieralocie ŭ Kyrhyzstan, Isłandyju, Estoniju, Małdovu, Saudaŭskuju Araviju, Katar i Pakistan.

Padarožžy byli chobi lotčyka. U sacsietkach Hraznoŭ vykładaŭ zdymki z roznych krain, u tym liku i ź Jeŭrasajuza. Na niekatorych fota jon ź siamjoj.

Pavialičyć

• 14
• 2
• 3
• 3
• 2
• 1
• 1
• 1