Što viadoma?
U rasijskim samalocie Ił-76, jaki raźbiŭsia dniami ŭ Sudanie, byŭ ekipaž z hramadzian RF i Biełarusi. Pra heta piša ŭkrainski błohier Dzianis Kazanski, jaki apublikavaŭ u svaim telehram-kanale list, nakiravany siemjam zahinułych. Pa infarmacyi žurnalista, zahinuli try rasijaniny i adzin biełarus, źviarnuŭ uvahu Reform.news.
U śpisie zahinułych paznačanyja:
-
Katlaroŭ Dźmitryj (RF);
-
Danskich Dźmitryj (RF);
-
Jahoraŭ Dźmitryj (RF);
-
Hraznoŭ Alaksandr (Biełaruś).
U liście, jaki padpisaŭ dyrektar Maskoŭskaha ofisa abaronna-pramysłovaj sistemy Sudana Chasan Machamied Chasan Machamied Džek, paviedamlajecca, što zaraz viaducca pracedury dla akazańnia padtrymki paciarpiełym i ich siemjam.
«Udakładnienyja abstaviny incydentu buduć paviedamlenyja pa miery źjaŭleńnia aficyjnaj infarmacyi. Ažyćciaŭleńnie ŭsich nieabchodnych dziejańniaŭ, u tym liku vypłaty kampiensacyj i akazańnia ekstrannaj padtrymki siemjam paciarpiełych, buduć ažyćciaŭlać dypłamatyčnyja pradstaŭnictvy Respubliki Sudan u Rasijskaj Fiederacyi i Respublicy Biełaruś. Pasolstva i abaronna-pramysłovaja sistema Respubliki smutkujuć razam z vami i prymajuć usie mahčymyja miery dla akazańnia dapamohi i padtrymki», — havorycca ŭ tekście.
Jak paviedamlaŭ Sudan Tribune, 4 listapada Sudanskaja armija prainfarmavała, što vajenny transpartny samalot paciarpieŭ krušeńnie ŭ rajonie Babanusy (štat Zachodni Kardafan) z-za techničnaj niaspraŭnaści. Pa danych vajskoŭcaŭ, uvieś ekipaž zahinuŭ. Akramia taho, armiejskija padraździaleńni paviedamili pra źniščeńnie bieśpiłotnika ŭ tym ža rajonie.
Pavodle infarmacyi armii, samalot dastaŭlaŭ hruzy padraździaleńniam, akružanym siłami chutkaha reahavańnia (RSF) u Babanusie. Paśla zaviaršeńnia apieracyi ŭ samalota ŭźnikła «raptoŭnaja niaspraŭnaść pravaha kryła», z-za čaho jon straciŭ kiravańnie, zahareŭsia i ŭpaŭ za niekalki dziasiatkaŭ kiłamietraŭ na zachad ad vajennaj bazy. Ekipaž, pa słovach vajskoŭcaŭ, paśpieŭ advieści samalot ad pazicyj armii i tak praduchilić dadatkovyja straty.
Siły chutkaha reahavańnia (RSF), u svaju čarhu, śćviardžajuć, što źbili nad Babanusaj samalot «Ił-76» i apublikavali videa z pałajučymi abłomkami. Śćviardžałasia, što ŭvieś piersanał na borcie zahinuŭ.
Telegram-kanały, źviazanyja z vajennymi RF, zajaŭlali, što samalotam kiravaŭ rasijski hramadzianski ekipaž, jaki pracavaŭ pa kantrakcie.
Kamientary