Fiermier-chipstar vyrašyŭ pradavać kaściumy z hierbami Biełarusi i Rasii. Ceny kaśmičnyja
Nazar Mielnikaŭ sprabuje pradavać «patryjatyčnyja» vieluravyja kaściumy pa 750 rubloŭ.
Čatyry hady tamu Nazar razam z bratam stvaryli sielskahaspadarčaje pradpryjemstva ŭ Červieńskim rajonie — «Ahra-Łukoml». Chłopcy pačali vyroščvać roznyja jahady — durnicy, čornyja parečki, kłubnicy dy japonski bružmiel.
Sioleta ŭ studzieni Nazar raskazvaŭ pra rekord: razam sa svaimi supracoŭnikami (vosiem čałaviek) za 10 hadzin vysadziŭ vosiem hiektaraŭ jahadnych kustoŭ. Z hetym dasiahnieńniem jon i trapiŭ u Knihu rekordaŭ Biełarusi.
Užo płanuje novy rekord — na hety raz z ablapichaj.
Braty zadumalisia pra kantaktny zaapark i zaviali žyvioł. Užo jość trusy i vjetnamskija parasiaty, ładnaja čarada kozačak, u tym liku redkaj pakistanskaj parody kamory, a taksama bolš za 10 šatłandskich karoŭ i bykoŭ parody abierdzin-anhus.
Nazar aktyŭna viadzie błoh u instahramie, dzie pakazvaje ramantyčnaje žyćcio fiermiera. Tam u mužčyny 102 tysiačy padpisčykaŭ.
U dadatak da hetaha Nazar aktyŭna kamunikuje z čynoŭnikami. Niadaŭna jon chvaliŭsia, što razam ź Ministerstvam adukacyi «vybudavaŭ płan raźvićcia patryjatyčnaj i aryjentavanaj na sielskuju haspadarku dziejnaści, nakiravanaj na źmianšeńnie kadravaha hoładu ŭ važnych dla ekanomiki siektarach».
Svaju bijahrafiju chłopiec raskazvaje tak: usio žyćcio pražyŭ u Minsku, pa vyšejšuju adukacyju pajechaŭ u Maskvu, ale stamiŭsia ad šumnaha horada (choć i padkreślivaje, što Rasiju palubiŭ) i tamu viarnuŭsia na radzimu.
Jak i šmat chto z maładych ludziej, chacieŭ zarablać šmat — tamu razhladaŭ ajci-śfieru i sielskuju haspadarku. Ale ź pieršym nie załadziłasia. A voś niša ź jahadami akazałasia praściejšaj.
Ciapier ža Nazar vyrašyŭ pasprabavać siabie jašče ŭ adnoj śfiery. Jon paviedamiŭ pra stvareńnie brenda adzieńnia Insomnia. Hałoŭnaja jaho fiška — dziaržaŭnaja simvolika Biełarusi i Rasii.
Pakul što Nazar z honaram demanstruje ŭ instahramie spartyŭnyja kaściumy ź vieluru z aficyjnymi hierbami dziaržaŭ. Pazicyjanuje jon svaje tvory jak adzinyja ŭ krainie patryjatyčnyja kaściumy.
Adkul uźnikła takaja ideja? Nazar tłumačyć, što ŭ Rasii bačyŭ šmat ludziej u kaściumach z hierbami dy ściahami, i ździŭlaŭsia, što ŭ Biełarusi takoha niama. Voś i vyrašyŭ źmianić situacyju. Kaža, patryjatyzm pavinien prajaŭlacca i ŭ vybary adzieńnia.
Za abhierbavanyja apranachi pryjdziecca zapłacić ažno 750 rubloŭ. Nazar spadziajecca, što ŭ chutkim časie jaho navinki źjaviacca ŭ dziaržaŭnych kramach krainy.
Ciapier čytajuć
Ukraina ŭpieršyniu adkazała na rasijskija ataki na składy «Novaj pošty» simietryčnymi ŭdarami pa chabach «Vajłdbieryz». Padmaskoŭny zhareŭ daščentu1111
Kamientary
paraŭnańnie ajci i SH pa dachodnaści i "prastacie" naŭvohuł paviesialiła.