U niadzielu rasijskija vojski atakavali Zaparožža ŭdarnymi bieśpiłotnikami. Adzin z dronaŭ paceliŭ prosta ŭ hiniekałahičnaje adździaleńnie miedustanovy. Maštabnaj trahiedyi ŭdałosia paźbiehnuć tolki dziakujučy tamu, što pacyjentki i lekary svoječasova spuścilisia ŭ schovišča. Tym nie mienš, biez paranienych nie abyšłosia, paviedamlaje Ministerstva achovy zdaroŭja Ukrainy.
Pavodle źviestak MAZ, u momant udaru ŭ schoviščy miedustanovy znachodziŭsia 31 čałaviek: 15 supracoŭnikaŭ i 16 žančyn, siarod jakich byli try paradzichi ź niemaŭlatami. Heta vyratavała ich ad niepaźbiežnaj hibieli, bo asnoŭny ŭdar pryjšoŭsia akurat pa lačebnym korpusie, dzie vybuch vyklikaŭ pažar.
Adnak pa-za miežami schovišča zastavalisia ludzi ŭ susiednich pamiaškańniach. Ranieńni atrymali lekarka, miedsiastra i pacyjent pryvatnaj stamatałahičnaj kliniki, jakaja mieściłasia ŭ hetym ža kompleksie. Usich traich u stanie siaredniaj ciažkaści špitalizavali. Ahułam paśla ataki na miedustanovu viadoma pra šaściarych paciarpiełych.
«Pucin vajuje nasupierak mirnym namahańniam»
Udar pa balnicy vyklikaŭ vostruju reakcyju ŭ Kijevie. Ministr zamiežnych spraŭ Andrej Sibiha padkreśliŭ, što Rasija idzie na eskałacyju teroru navat tady, kali suśvietnaja supolnaść abmiarkoŭvaje mažlivyja mirnyja pieramovy.
«Pucin praciahvaje vajavać z cyvilnymi hramadzianami — nasupierak mirnym namahańniam. Tolki siła moža prymusić jaho spynić ahresiju i teror. U cisku na Maskvu i padtrymcy Ukrainy nie pavinna być paŭz», — zajaviŭ Sibiha.
Teror praciahvaŭsia ŭvieś dzień
Ahulnaja kolkaść paciarpiełych u Zaparožžy za niadzielu vyrasła. Praź niekalki hadzin paśla ataki na radzilniu jašče adzin rasijski dron udaryŭ pa horadzie, paraniŭšy dźviuch žančyn i dzicia.
Upaŭnavažany ŭ pravach čałavieka Dźmitryj Łubiniec adznačyŭ, što ŭdar pa hiniekałahičnym adździaleńni byŭ śviadomym napadam na žančyn i jašče nienarodžanych dziaciej:
«Dla RF nie isnuje nijakich čyrvonych linij. Za kožnaje takoje złačynstva pavinna nastupić adkaznaść».
Nastupstvy dla miedustanovy
U vyniku traplańnia ŭ lakarni vybityja vokny, paškodžany fasad i źniščanaje miedycynskaje abstalavańnie. Pažar, jaki ŭspychnuŭ na druhim paviersie, udałosia patušyć.
Pacyjentki, jakich vyratavała schovišča, byli nieadkładna pieraviedzienyja ŭ inšyja adździaleńni i špitali horada. Ciapier psichołahi pracujuć z paradzichami, jakija pieražyli najmacniejšy stres. Rasijski bok, niahledziačy na videadokazy razburanych pałat, praciahvaje śćviardžać, što nanosić udary tolki pa vajskovych abjektach.
Chto tyja dva piersanažy, jakija nie pili ŭ mižvajennaj Vilni, jak Zośku Vieras abudzili ad letarhii i ci praŭdzivaja bajka pra Karatkieviča i restaran11
Kamientary