Siabroŭka Viktara Łukašenki rychtujecca adkryć treciaje bistro ŭ Minsku
Niadaŭna Ludmiła Niaronskaj taksama pabudavała ŭ stalicy rybny zavod.
U śniežni 2025 hoda na terytoryi Minskaha technaparka adkryłasia bistro «Rybny dom «Marskija siezony»». Druhoje bistro raźmiaściłasia ŭ minskim HC «Pieršy nacyjanalny». Treci restaran sietki budzie ŭ staličnym mikrarajonie Łošyca, paviedamlaje Office Life.
Bistro raźvivaje kampanija «Marskaja Manufaktura», źviazanaja z «Marskimi siezonami» biełaruskaj biznesvumien Ludmiły Niaronskaj.
Ustanovy pracujuć u farmacie kram z kuchniaj. Heta značyć, što na ich terytoryi jość pryłaŭki z tavarami, jak u zvyčajnaj kramie, a taksama kuchnia i pasadačnyja miescy, jak u restaranie.
Što tyčycca mieniu, to ŭ im jość, naprykład, supy tom-jam i bujabies za 23 rubli, sašymi z fareli i tunca za 24 rubli, tartar z fareli z huakamole za 24 rubli, roznyja roły i haračyja stravy. Akramia hetaha, u kramie možna kupić lubuju syruju rybu — i jaje adrazu tam pryhatujuć na hryli. Košt takoj pasłuhi — 6 rubloŭ.
Pavodle źviestak handlovaha rejestra, jašče adzin rybny dom adkryjecca na Ihumienskim trakcie ŭ minskim mikrarajonie Łošyca. Kampanija ŭžo pačała šukać tudy supracoŭnikaŭ. Tak, na rabota.by zaraz aktyŭnyja vakansii pradaŭca-kasira i aficyjanta-barmiena. Im hatovyja płacić 2 tysiačy rubloŭ na ruki.
«Marskaja Manufaktura» była stvorana ŭ lipieni 2025 hoda ŭ Minsku. Jaje asnoŭny vid dziejnaści — restarany. Kampanija zarehistravanaja pa tym ža adrasie, što i «Marskaja havań». Jaje dyrektaram źjaŭlajecca Ludmiła Niaronskaja. U druhoj pałovie 2025 hoda kampanija kupiła płoščy rybakompleksu zbankrutavanaj «Biełryby» pa vuł. Ściebnieva ŭ Minsku.
Akramia sietki bistro «Rybny dom «Marskija siezony»», kampanija «Marskaja Manufaktura» kiruje stałovaj «Marskija siezony», jakaja raźmieščana pa adrasie byłych płoščaŭ zbankrutavanaj «Biełryby».
U kancy listapada 2025 hoda ŭ «Kaladzičach» adkryŭsia rybapierapracoŭčy zavod kampanii «Marskija siezony». Jaho mahutnaść — 5,849 tysiačy ton rybnaj pradukcyi ŭ hod. Płošča — 3,286 tysiačy «kvadrataŭ».
Kamientary