Šmatdzietnamu baćku-vachtaviku z Mazyra, jakoha chacieli pazbavić baćkoŭskich pravoŭ, udałosia viarnuć dziaciej
«Pieršy čas budu pad vialikim kantrolem».
Andrej raskazaŭ svaju historyju vydańniu «Silnyje Novosti» ŭ listapadzie. Jon byŭ u adčai: jaho chacieli pazbavić baćkoŭskich pravoŭ za toje, što jon kiepska hladzieŭ za dziećmi.
Mužčyna jeździć pracavać vachtami na Daloki Uschod, jaho žonka złoŭžyvaje ałkaholem, a siaredni syn trapiŭ u zakrytuju śpiecškołu: z pomsty adnakłaśniku «zaminiravaŭ» handlovy centr.
Starejšamu dziciaci ŭžo spoŭniłasia 18 hadoŭ, a małodšaja dačka ŭvieś hety čas znachodziłasia ŭ sacyjalnym prytułku.
Ale dniami prajšoŭ sud, dzie abmiarkoŭvali pytańni ab pazbaŭleńni Andreja i jaho žonki baćkoŭskich pravoŭ. Rašeńnie ŭsio ž taki vynieśli na karyść mužčyny — jon padzialiŭsia padrabiaznaściami.
«Advakatka znajšła niejkuju normu ŭ zakonie, pavodle jakoj mnie nie zabaroniena pakidać dziaciej na babulu», — raspavioŭ Andrej.
Jamu skazali, što «pieršy čas jon budzie pad vialikim kantrolem». Jon zapeŭnivaje, što da hetaha hatovy.
Praz 15 dzion, kali rašeńnie suda ŭstupić u siłu, Andrej zabiare dačku z prytułku i pierajedzie ź joj da svajoj maci. Siastra mužčyny taksama paabiacała dapamahać. Dziaŭčynku daviadziecca pieravieści ŭ inšuju škołu — tuju, što ŭ dvuch krokach ad doma babuli, Andrej užo damoviŭsia pra heta.
Žonku baćkoŭskich pravoŭ pazbavili, adnak jana moža bačycca ź dziećmi. Pavodle słoŭ Andreja, «jamu ŭdałosia advadzić jaje tavaryšaŭ pa ałkaholi», i zaraz žančyna nie pje, trymajecca. Kali za hod u jaje nie budzie parušeńniaŭ i prahułaŭ na pracy, jość šancy adnavicca ŭ pravach — Andrej hatovy z hetym dapamahać.
Što tyčycca vachtavych kamandzirovak mužčyny, jon choča pasprabavać zachavać ich. Dla hetaha jamu treba znajści zakonnuju mahčymaść pieradavać apieku nad dziećmi na niekalki miesiacaŭ, pakul pracuje. Kali nie atrymajecca, daviadziecca zvolnicca i pašukać vakansii doma. Andreju padabajecca jaho praca: kaža, kiraŭnictva aktyŭna išło nasustrač, pakul doŭžylisia razbory, dasyłała nieabchodnyja dakumienty.
«Spadziajusia, što znajdu vyjście pa zakonie», — skazaŭ mužčyna.
Kamientary