Rečyva, jakim zabili Navalnaha, sintezavaŭ centr «Sihnał». Jon ža ŭdzielničaŭ u atručeńni palityka ŭ 2020 hodzie
Navukoŭcy navukova-daśledčaha centra «Sihnał», jaki dapamahaŭ arhanizavać atručeńnie Alaksieja Navalnaha «Navičkom» u 2020 hodzie, schavana apublikavali ŭ 2015 hodzie artykuł pra sintez anałahaŭ epibatydzinu, vyjaviła «Ahienctva».
U publikacyi aŭtary pradstaŭleny jak supracoŭniki pryvatnaj kampanii, adnak dziakujučy ŭciečkam i ich minułym publikacyjam udałosia vyśvietlić, što 6 z 7 udzielnikaŭ publikacyi — štatnyja supracoŭniki «Sihnała». Niekatoryja ź ich adyhrali važnuju rolu ŭ pracy nad prymianieńniem «Navička» i inšych atručvalnych rečyvaŭ.
Artykuł byŭ apublikavany ŭ časopisie «Vieśnik Akademii Navuk. Chimičnaja sieryja». U im prapanujecca zručny i bolš chutki «adnastadyjny mietad sintezu» anałahaŭ epibatydzinu.
U artykule śćviardžajecca, što jaho aŭtary — supracoŭniki TAA «Łabaratoryja vysokich technałohij». Nasamreč jany nie byli supracoŭnikami hetaj łabaratoryi, śviedčać uciečki.
Zatoje šeść ź siami suaŭtaraŭ — štatnyja supracoŭniki NC «Sihnał». Heta chimiki Ihar Babkin, Siarhiej Hałan, Hieorhij Nazaraŭ i Alaksiej Aksionaŭ, Volha Judzina (viadoma, što jana staršy navukovy supracoŭnik 22‑j łabaratoryi navukova-vytvorčaha adździeła), a taksama Alaksiej Łamanaŭ (zahadčyk 23‑j łabaratoryi navukova-vytvorčaha adździeła).
«Ahienctvu» nie ŭdałosia ŭstanavić suviaź z «Sihnałam» tolki adnaho suaŭtara — pałkoŭnika Michaiła Hucaluka. Jon — načalnik adździeła arhanizacyi navukovaj pracy i padrychtoŭki navukova-piedahahičnych kadraŭ u Vajskovaj akademii radyjacyjnaj, chimičnaj i bijałahičnaj abarony.
Ananimny rasijski chimik u kamientaryi The Insider pradkazaŭ, što epibatydzin sintezavali mienavita ŭ «Sihnale».
«Mahčyma, epibatydzin atrymali nie ŭ Dziaržaŭnym navukova-daśledčym instytucie chimičnych technałohij, a ŭ «Sihnale»: reakcyja Dylsa — Aldera, abarona aminahrupy i cyklizacyja — heta ŭsio napramak Babkina, a atrymańnie karfientaniłu, paładyj na vuhali — heta moh rabić Siarhiej Hałan», pišacca ŭ tym artykule.
Čym viadomyja aŭtary artykuła?
Sintezam anałaha epibatydzinu hrupaj kiravaŭ mienavita zhadany ananimnym chimikam Babkin, pisaŭ viadučy navukovy supracoŭnik Instytuta arhaničnaj chimii RAN Anatolij Vieraščahin. U «Sihnale» Babkin pracuje jak minimum ź siaredziny 2010-ch, śviedčać uciečki. U 2000‑ch Babkin paśpiavaŭ papracavać u Vajennaj akademii radyjacyjnaj, chimičnaj i bijałahičnaj abarony (RCHBZ) i, jak i dyrektar «Sihnała» Artur Žyraŭ, u 27‑m navukovym centry Minabarony.
Babkin — suaŭtar patenta 27‑ha NC Minabarony na «Sposab atrymańnia mietył4-[(3,4-dychłaryfienił)acetyłu]-3-[(1-pirrolidynił)mietył]-1-pipierazinkarbaksilatu». Heta rečyva adnosicca da taho ž kłasa, što i karfientanił i ramifientanił — taksiny, jakija rasijskija śpiecsłužby vykarystoŭvali pry zachopie teatralnaha centra na Dubroŭcy padčas terakta 2002 hoda (ad nastupstvaŭ prymianieńnia «usyplalnaha» hazu tady zahinuli bolš za sto zakładnikaŭ).
Hałan i Nazaraŭ — ekśpierty ŭ halinie nanainkapsulacyi, vyvučeńniem jakoj vielmi aktyŭna zajmalisia ŭ «Sihnale».
Nanainkapsulacyja — heta technałohija ŭpakoŭvańnia nanačaścic rečyva ŭ abałonku ź inšaha rečyva. Vierahodna, vykarystoŭvałasia pry prymianieńni «Navička». Z dapamohaj nanainkapsulacyi možna zamaskiravać jad, schavać jaho simptomy i ŭskładnić dyjahnaz. Hałan i Nazaraŭ vyvučali nanačaścicy jak sposab dastaŭki «lekarskich srodkaŭ» da roznych tkanak arhanizma, u pieršuju čarhu da kletak niervovaj sistemy.
Pa stanie na 2019 hod Hałan sumiaščaŭ pracu ŭ «Sihnale» z pasadaj navukovaha supracoŭnika dziaržaŭnaha Naučna-daśledčaha vyprabavalnaha instytuta vajennaj miedycyny (jaho kiraŭnik Siarhiej Čapur kansultavaŭ słužačych HRU, jakija atrucili Siarhieja i Juliju Skrypalaŭ).
Jašče adzin suaŭtar artykuła «Sihnała» Alaksiej Aksionaŭ u inšych navukovych pracach apisvaje ekstrakcyju roznych rečyvaŭ z raślin, u tym liku što rastuć u ekzatyčnych miescach. Siarod ich — karani zamanichi ščacinistaj (Oplopanax horridus) z Paŭnočnaj Amieryki i kara karycy (Cinnamomum) z Kitaja, Vjetnama, Indaniezii i z Šry-Łanki.
Kamientary