Paćvierdžanyja straty Rasii ŭ vajnie suprać Ukrainy pieravysili 200 tysiač čałaviek
Pavodle padlikaŭ žurnalistaŭ Ruskaj słužby Bi-bi-si i vydańnia «Miedyjazona» na asnovie adkrytych danych, paćvierdžanyja straty Rasii ŭ vajnie suprać Ukrainy pieravysili 200 tysiač čałaviek. Za čatyry hady kanfliktu zahinuli jak minimum 200 186 rasijskich vajskoŭcaŭ.
Najbolšaja kolkaść zahinułych prypadaje na dobraachvotnikaŭ — bolš za 74 tysiač čałaviek. Dalej iduć kantraktniki, asudžanyja, mabilizavanyja, a ŭ častcy vypadkaŭ prynaležnaść da kankretnaj katehoryi ŭstanavić nie ŭdałosia.
Bolš za ŭsio zahinułych zafiksavana ŭ Baškartastanie, Tatarstanie i Śviardłoŭskaj vobłaści. Siarod rehijonaŭ z najbolšymi stratami taksama Krasnadarski kraj i Čalabinskaja vobłaść. U Maskvie pakazčyk strat adzin z samych nizkich u krainie. Najbolš vysokija adnosnyja straty adznačajucca ŭ Buracii i Tyvie.
Žurnalisty adznačajuć, što 2025 hod staŭ najbolš kryvavym dla rasijskaha vojska. Choć aficyjna paćvierdžanaja ličba zahinułych u hetym hodzie nižejšaja za papiaredni, ahulnaja kolkaść nieapracavanych źviestak śviedčyć, što vynikovaja ličba moža pieravysić 90 tysiač čałaviek.
Paviedamlajecca taksama, što z pačatku ŭvarvańnia zahinuli kala siami tysiač rasijskich aficeraŭ, u tym liku 13 hienierałaŭ. Častka ź ich była metanakiravana likvidavanaja ŭ Maskoŭskim rehijonie z kanca 2024 hoda.
Mižnarodnyja arhanizacyi i zachodnija raźviedki padajuć značna bolšyja acenki ahulnych strat Rasii — da sotniaŭ tysiač zahinułych i bolš za miljon paranienych. Pavodle niekatorych źviestak, u 2025 hodzie štomiesiačna z pola boju vybyvała kala 35 tysiač rasijskich vajskoŭcaŭ. Taksama paviedamlajecca, što paśla pačatku novaha hoda tempy papaŭnieńnia rasijskaj armii kantraktnikami mohuć być nižejšymi za ŭzrovień strat.
Kamientary