Usiaho za adnu bazavuju vieličyniu — 45 rubloŭ — čarhovy raz vystavili na prodaž siadzibu z bolš čym 200‑hadovaj bahataj historyjaj. Abjekt znachodzicca ŭ Čačersku Homielskaj vobłaści i pradajecca praz elektronnuju placoŭku Biełaruskaj univiersalnaj tavarnaj biržy.
Raniej budynak užo nieadnarazova sprabavali pradać. Pačynałasia ŭsio z taho, što Čačerski rajvykankam vystaŭlaŭ siadzibu za 860 tysiač rubloŭ. Paśla canu źnizili ŭdvaja, a ŭrešcie dajšli i da taho, kab sprabavać zbyć choć za adnu bazavuju vieličyniu — achvotnych, adnak, pakul tak i nie znachodziłasia.
Pomnik architektury XIX stahodździa, jaki spałučaje rysy ramantyzmu i poźniaj hotyki, znachodzicca ŭ Čačersku na skryžavańni vulic Uljanava i Internacyjanalnaj. U kampazicyju ansambla ŭvachodziać siadzibny dom, reštki parku, haspadarčych pabudoŭ i stajni.
Siadziba — heta dvuchpaviarchovy cahlany asabniak H-padobnaj formy płoščaj 1129 kvadratnych mietraŭ. Budynak zakansiervavany i doŭhi čas nie vykarystoŭvajecca, adnak raniej u im byli ŭsie nieabchodnyja kamunikacyi: centralnaje aciapleńnie, kanalizacyja, vodazabieśpiačeńnie, elektryčnaść i vientylacyja. Da siońnia zachavalisia i elemienty byłoj raskošy — paŭkruhłyja vokny ź lištvami, dekaratyŭny karniz, bałkony i letniaja terasa z ažurnym čyhunnym lićciom.
Budavać siadzibu pačaŭ u 1774 hodzie pieršy rasijski namieśnik u Biełarusi hienierał-fieldmaršał hraf Zachar Čarnyšoŭ. U pačatku XX stahodździa ŭ budynku siadziby raźmiaščałasia ziemskaja škoła druhoj stupieni, jakaja paśla 1925 hoda była pierafarmatavanaja ŭ biełaruskuju škołu ź siamiu kłasami adukacyi.
Paśla Druhoj suśvietnaj vajny ŭ byłym pałacy funkcyjanavali viačerniaja škoła, biblijateka dla dziaciej, Dom pijanieraŭ, historyka-etnahrafičny muziej. Apošnim tut raźmiaščaŭsia Čačerski rajonny centr ramiostvaŭ, falkłoru i etnahrafii.
Kupić pomnik architektury možna praz aŭkcyjon, jaki projdzie ŭ elektronnym farmacie na sajcie Biełaruskaj univiersalnaj tavarnaj biržy 31 sakavika. Padać zajaŭku na ŭdzieł u aŭkcyjonie treba da 26 sakavika.
Budynak maje status historyka-kulturnaj kaštoŭnaści treciaj katehoryi. Na ramontna-restaŭracyjnyja raboty siadziby advodzicca dva hady paśla kupli.
U Čačersku znoŭ sprabujuć pradać za biescań staradaŭniuju siadzibu
Hrafskuju siadzibu ŭ Čačersku vystavili na prodaž treci raz, užo praktyčna zadarma
U Čačersku skončyli adnaŭleńnie ratušy, pabudavanaj favarytam Kaciaryny II dla natchnionaha Łondanam «idealnaha horada»
U Čačersku vystavili na tarhi hrafskuju siadzibu
Błohier Siaroha z Rasii pryjechaŭ na Zybickuju z kachanaj błohierkaj Aniečkaj. Vynik: źbity im biełarus u komie, a Siaroha na 5,5 hoda za kratami10
Kamientary