Varšaŭski bar-šop WIN ź biełaruskimi karaniami trapiŭ u hid «Mišlen»
Varšaŭski vinny bar-šop WIN, adkryty kamandaj biełaruskich imparcioraŭ vina Enoterra, uvajšoŭ u śpis ustanoŭ hida Michelin Guide Bib Gourmand 2026. Uznaharoda prysudžajecca restaranam z vysokaj jakaściu kuchni pa dastupnych cenach, piša Reform.news.
Navinoj padzialiŭsia na svajoj staroncy ŭ Instagram suzasnavalnik Enoterra i WIN Alaksandr Mazalaka.
«Poŭny samych składanych i niečakanych vyklikaŭ i dośviedu adrezak šlachu. Praciah budzie», — napisaŭ jon.
WIN mieścicca ŭ varšaŭskim rajonie Vola. Za kuchniu adkazvajuć šef Matevuš Karkoška i su-šef Adam Kubiš. Kamanda Enoterra zajmajecca impartam i dystrybucyjaj vinaŭ ad nievialikich siamiejnych vinarobniaŭ.
«Nie dziŭna, što WIN, stvorany pa inicyjatyvie imparciora vina, źjaŭlajecca abaviazkovym miescam dla naviedvańnia dla ŭsich amataraŭ vina. Na pieršym paviersie raźmieščany bar, łaunž, hastranom i krama, dzie možna aznajomicca z asartymientam z bolš čym 300 vinaŭ, uklučajučy vydatny vybar vinaŭ z krain Centralnaj i Uschodniaj Jeŭropy. Na druhim paviersie znachodzicca ŭtulnaje bistro ŭ styli minimalistyčnaha šyku, dzie padajuć stravy pa dastupnych cenach, staranna skampanavanyja tak, što ich tonka zbałansavanyja smakavyja adcieńni stvarajuć idealnuju harmoniju. Usie členy našaj zachoplenaj kamandy dobra raźbirajucca ŭ vinie i z zadavalnieńniem dapamohuć vam zrabić vybar», — havorycca ŭ apisańni ŭstanovy na sajcie hida.
Cyrymonija ŭznaharodžańnia adbyłasia 27 maja ŭ Krakavie. Sioleta hid Michelin upieršyniu achapiŭ usiu Polšču całkam, a nie tolki asobnyja harady i rehijony.
Varšava ŭvajšła ŭ hid z 38 restaranami, uklučajučy 4 sa zorkami Michelin. Usiaho ŭ Polščy naličvajecca 11 restaranaŭ z zorkami. U katehoryju Bib Gourmand sioleta ŭklučany 10 varšaŭskich ustanoŭ, 4 ź jakich atrymali ŭznaharodu ŭpieršyniu.
Bib Gourmand — asobnaja ŭznaharoda Michelin Guide dla ŭstanoŭ z dobraj kuchniaj pa razumnaj canie. Inśpiektary aceńvajuć jakaść inhredyjentaŭ, techniku i smak, stabilnaść, kancepcyju kuchni i suadnosiny cany i jakaści. Simvał uznaharody — uśmiešlivy čałaviečak Bibendum («Bib»), maskot Michelin.
Michelin Guide vydajecca z 1900 hoda. Inśpiektary ananimna naviedvajuć restarany i aceńvajuć jakaść kuchni, servis i suadnosiny cany i jakaści.
Chto tyja dva piersanažy, jakija nie pili ŭ mižvajennaj Vilni, jak Zośku Vieras abudzili ad letarhii i ci praŭdzivaja bajka pra Karatkieviča i restaran11
Kamientary