Indyjskaja armija atrymała pieršuju partyju dronaŭ «Miratvorac». Bieśpiłotnik u Indyi atrymaŭ nazvu Agniveg («Ahnivieh»), jon zdolny raźvivać chutkaść da 450 kiłamietraŭ za hadzinu i pryznačany dla ŭdaraŭ pa radarach, štabach dy inšych abjektach.
Indyjskaja armija papoŭniłasia bolš jak sotniaj reaktyŭnych dronaŭ-kamikadze, jakija ŭ Indyi padajuć jak «ajčynnuju» zbroju i prykład palityki «Make in India». Adnak «ajčynnaść» tut vielmi ŭmoŭnaja: udarny bieśpiłotnik «Ahnivieh» — heta faktyčna pierajmienavany biełaruski «Miratvorac», raspracoŭka kanstruktarskaha biuro «Indeła», jakoje ciapier znachodzicca pad sankcyjami Jeŭrasajuza. U aficyjnych zajavach kampanii SMPP i ŭ indyjskich miedyja biełaruskaje pachodžańnie nie zhadvajuć — jano vynikaje tolki ź infarmacyi krynic u abaronnych strukturach.
Ab pieradačy pieršaj partyi bieśpiłotnikaŭ Agniveg («Ahnivieh») paviedamiła vydańnie The Print sa spasyłkaj na indyjskuju kampaniju SMPP. Pavodle infarmacyi vydańnia, vajskoŭcy atrymali 106 aparataŭ, ź jakich 100 pryznačanyja dla bajavoha vykarystańnia, a jašče šeść — dla padrychtoŭki apierataraŭ.
«Ahnivieh» («Miratvorac») adnosicca da kłasa baražujučych bojeprypasaŭ — udarnych bieśpiłotnikaŭ, jakija časta nazyvajuć dronami-kamikadze. Takija aparaty paśla zapusku mohuć peŭny čas znachodzicca ŭ pavietry ŭ pošukach celi, a paśla atakujuć jaje i źniščajucca razam z bajavoj častkaj.
Pavodle zajaŭlenych charaktarystyk, bieśpiłotnik z turbareaktyŭnym ruchavikom maje razmach kryłaŭ 2,8 mietra, niasie bajavuju častku masaj 10 kiłahramaŭ, raźvivaje chutkaść da 450 kiłamietraŭ za hadzinu i moža dziejničać na adlehłaści da 180 kiłamietraŭ.
The Indian Army gets delivery of 106 kamikaze drones, with 180-km range, from SMPP Limited to boost its deep-strike capabilities in a contested battlefield, countering enemy signal jamming and spoofing operations.https://t.co/3XI1kUl9bH
Kampanija taksama śćviardžaje, što bieśpiłotnik ustojlivy da srodkaŭ radyjoelektronnaj baraćby i nie moža być adchileny ad kursu šlacham padmieny navihacyjnych sihnałaŭ. Pavodle raspracoŭščykaŭ, paśla vyznačeńnia celi jon zdolny vykonvać całkam aŭtanomnyja misii i nanosić vysokadakładnyja ŭdary biez udziełu čałavieka.
U SMPP zajaŭlajuć, što źjaŭleńnie «Ahnivieha» pavinna dapamahčy indyjskaj armii zakryć pramiežak pamiž mahčymaściami dalnabojnaj artyleryi i rakietnych kompleksaŭ. Bieśpiłotnik pryznačany dla paražeńnia takich celaŭ, jak kamandnyja punkty, radyjołakacyjnyja stancyi, łahistyčnyja vuzły i inšyja važnyja abjekty vajennaj infrastruktury.
Pavodle infarmacyi kampanii, padčas vyprabavańniaŭ «Ahnivieh» pakazaŭ kruhavoje vierahodnaje adchileńnie mienš za piać mietraŭ navat va ŭmovach radyjoelektronnych pieraškod i imitacyi padmieny sihnałaŭ navihacyi.
Krynicy The Print u abaronnych i siłavych strukturach śćviardžajuć, što pieršapačatkova hety bieśpiłotnik byŭ raspracavany ŭ Biełarusi kampanijaj KB «Indeła», jakaja supracoŭničaje z SMPP. Dla indyjskaj armii jon byŭ abrany paśla vyprabavańniaŭ na palihonie Pakcharan u 2025 hodzie.
Adznačym, što «Indeła» (ci AAT «Bieśpiłotnyja viertaloty») i jaje hałoŭny kanstruktar Uładzimir Čudakoŭ ciapier znachodziacca pad sankcyjami šerahu krain.
The Print taksama paviedamlaje, što supracoŭnictva pamiž KB «Indeła» i SMPP adbyvajecca ŭ ramkach pahadnieńnia ab pieradačy technałohij. Na pieršym etapie indyjskaja kampanija ŭžo łakalizavała vytvorčaść bajavoj častki bieśpiłotnika. U dalejšym pa miery rostu zakazaŭ SMPP pavinna atrymać dostup da ŭsio bolšaj kolkaści vytvorčych technałohij, uklučajučy technałohii vytvorčaści turbareaktyŭnaha ruchavika.
Krynicy vydańnia taksama paviedamili, što SMPP užo prapanavała indyjskaj armii bieśpiłotnik-kamikadze nastupnaha pakaleńnia. Pavodle ich źviestak, novaja madel pavinna raźvivać chutkaść da 750 kiłamietraŭ za hadzinu, što amal u paŭtara razu bolš za pakazčyk ciapierašniaha «Ahnivieha».
Padrabiaznaści pra novuju sistemu pakul nie raskryvajucca. Nieviadoma taksama, ci budzie jana stvaracca ŭ supracoŭnictvie ź biełarusami. Adnak sama zajava pakazvaje, što indyjski bok razhladaje ciapierašni prajekt nie jak razavuju zakupku, a jak asnovu dla raźvićcia cełaha siamiejstva vysokachutkasnych udarnych bieśpiłotnikaŭ.
Ciapier čytajuć
Radzilnyja damy spaborničajuć, u kaho 3 lipienia narodzicca bolš dziaciej16
Kamientary