«Za adzin prajekt adnych uznaharodzili, a mianie pazbavili lhoty». Abituryjent BDUIR paskardziŭsia na rašeńnie Minadukacyi
Vypusknik Nacyjanalnaha dziciačaha technaparka śćviardžaje, što jaho pazbavili prava na lhotnaje pastupleńnie ŭ BDUIR, niahledziačy na paśpiachovy navukovy prajekt.
Vypusknik Nacyjanalnaha dziciačaha technaparka Maćviej Łysienka źviarnuŭsia da hramadskaści paśla taho, jak, pavodle jaho słoŭ, nie atrymaŭ rekamiendacyju dla lhotnaha pastupleńnia ŭ Biełaruski dziaržaŭny ŭniviersitet infarmatyki i radyjoelektroniki (BDUIR). Svajoj historyjaj jon padzialiŭsia ŭ TikTok, zaŭvažyła BGmedia.
Chłopiec śćviardžaje, što byŭ udzielnikam navukovaha prajekta ŭ technaparku, unios značny ŭkład u jaho raspracoŭku, ale ŭ vyniku nie atrymaŭ rekamiendacyi Naziralnaha savieta, jakaja dazvalaje pastupać biez ustupnych vyprabavańniaŭ.
Prajekt atrymaŭ pryznańnie, ale rekamiendacyju dali nie ŭsim
Pavodle słoŭ Maćvieja, padčas navučańnia ŭ Nacyjanalnym dziciačym technaparku jaho kamanda pracavała nad prajektam «Mabilny dyjahnastyčny robat-asistent dla kantrolu stanu patencyjna niebiaśpiečnych abjektaŭ na vytvorčaści».
«Ja ŭnios u hetuju raspracoŭku dastojny i važki ŭkład, adkazvaŭ za techničnuju i prahramnuju častku. Pa vynikach raboty byli apublikavanyja navukovyja artykuły ŭ zbornikach kanfierencyj, padrychtavanyja tłumačalnaja zapiska i prezientacyja», — śćviardžaje vypusknik.
Jon adznačaje, što prajekt atrymaŭ stanoŭčuju acenku i byŭ pradstaŭleny na aficyjnaj vystavie Nacyjanalnaha dziciačaha technaparka.
«12 maja 2026 hoda na aficyjnaj vystavie NDTP dla členaŭ Naziralnaha savieta ja asabista paśpiachova pradstaviŭ i abaraniŭ našu raspracoŭku pierad kamisijaj», — raspaviadaje chłopiec.
Pry hetym, pavodle jaho słoŭ, adna z udzielnic hetaj ža kamandy atrymała rekamiendacyju jašče hodam raniej i pastupiła va ŭniviersitet biez ustupnych ekzamienaŭ.
Što adkazali ŭ Minadukacyi
Paśla admovy ŭ vydačy rekamiendacyi Maćviej źviarnuŭsia ŭ dziaržaŭnyja orhany i asabista da ministra adukacyi.
Jak śćviardžaje vypusknik, u adkazie za podpisam namieśnika ministra adukacyi jamu paviedamili, što pryčynaj admovy stali zaŭvahi da abarony prajekta.
U pryvatnaści, havaryłasia, što padčas prezientacyi «niedastatkova vyrazna byli sfarmulavany mietadałahičnyja charaktarystyki», a taksama što «niedastatkova paćviardžałasia łohika pabudovy dakłada».
Taksama chłopcu paviedamili, što pierahlad rašeńnia Naziralnaha savieta dziejučymi narmatyŭnymi aktami nie praduhledžany.
«Adnych uznaharodzili, a inšaha pakinuli bieź lhoty»
Mienavita hetaje tłumačeńnie i vyklikała ŭ vypusknika najbolšaje abureńnie.
Na jaho dumku, uźnikaje supiarečnaść: kali prajekt sapraŭdy mieŭ nastolki istotnyja niedachopy, čamu raniej za jaho ŭžo byli ŭznaharodžanyja inšyja ŭdzielniki kamandy.
«Kali prajekt mieŭ takija krytyčnyja mietadałahičnyja niedachopy, to na jakoj padstavie Naziralny saviet užo vydaŭ pa im lhoty dvum inšym udzielnikam?» — zadajecca pytańniem chłopiec.
Jon taksama źviartaje ŭvahu, što vykładčyki vysoka aceńvali jaho pracu.
«Jak ahulnyja zaŭvahi da hrupavoha prajekta mohuć słužyć pryčynaj piersanalnaj admovy kankretna mnie, kali maje vykładčyki napisali mnie vydatnyja charaktarystyki, a siaredni bał i partfolia dypłomaŭ adpaviadajuć kryteryjam?» — adznačaje vypusknik.
Historyja stała viadomaj u sacsietkach
Historyja Maćvieja raspaŭsiudziłasia ŭ TikTok. U kamientarach pad dopisam mnohija karystalniki padtrymali chłopca. Inšyja, akramia hetaha, źviarnuli ŭvahu na prablemu prazrystaści pracedury vydačy rekamiendacyj vypusknikam Nacyjanalnaha dziciačaha technaparka.
Sam chłopiec śćviardžaje, što hatovy pradstavić usie dakumienty, jakija paćviardžajuć jaho słovy, u tym liku adkaz Minadukacyi, navukovyja publikacyi, materyjały prajekta i dypłomy.
«Atrymlivajecca, što za adzin i toj ža prajekt dziaržaŭnaja sistema moža zaachvocić adnych udzielnikaŭ, ale vystavić za dźviery inšaha, prykryŭšysia farmalnaj adpiskaj», — havorycca ŭ jahonym zvarocie.
Pakul Ministerstva adukacyi nie dało aficyjnaha adkazu na zvarot chłopca.
Kamientary