Vacłaŭ Havał: Ja hatovy baranić niezaležnaść Biełarusi pobač ź Milinkievičam
Siońnia lider abjadnanych demakratyčnych sił Biełarusi Alaksandr Milinkievič sustreŭsia ŭ Prazie z byłym prezidentam Čechii Vacłavam Havełam.
Siońnia lider abjadnanych demakratyčnych sił Biełarusi Alaksandr Milinkievič sustreŭsia ŭ Prazie z byłym prezidentam Čechii Vacłavam Havełam.
Na sustrečy palityki abmianialisia dumkami adnosna bolš apieratyŭnaj i jefektyŭnaj pracy jeŭrapiejskich struktur z hramadzianskaj supolnaściu ŭ Biełarusi, źmianšeńnia koštu šenhienskich vizaŭ dla biełarusaŭ. Alaksandr Milinkievič u razmovie z Vacłavam Havełam adznačyŭ važnaść ćviordaj pazicyi Jeŭropy ŭ dačynieńni da pahrozy straty niezaležnaści Biełarusi.
Vacłaŭ Haveł adreahavaŭ na słovy Alaksandra Milinkieviča vielmi emacyjna:
– Kali pahroza niezaležnasi Biełarusi budzie realnaj, ja hatovy stać pobač z Alaksandram Milinkievičam i baranić jaje, - skazaŭ znakamity čech.
Alaksandr Milinkievič padziakavaŭ Vacłavu Havełu za zaprašeńnie ŭziać udzieł u Forumie i adznačyŭ, što dla jaho Haveł «źjaŭlajecca maralnym aŭtarytetam i ŭzoram sapraŭdnaha palityka».
Siońnia ž lider abjadnanych demakratyčnych sił Alaksandr Milinkievič pravioŭ pieramovy z premjer-ministram Čechii Mirekam Tapalanekam. Češski kiraŭnik zapeŭniŭ Alaksandra Milinkieviča ŭ dalejšaj palityčnaj padtrymcy demakratyčnaha ruchu ŭ Biełarusi i pašyreńni supracoŭnictva z hramadzianskaj supolnaściu krainy.
Jak adznačyŭ spadar Tapalanek, Čechija budzie dapamahać represavanym studentam i pradstaŭlać im miescy ŭ češskich VNU, z dapamohaj radyjo Svaboda, centralnaja siadziba jakoha znachodzicca ŭ Prazie, akazvać infarmacyjnuju padtrymku demakratyčnaj Biełarusi, a taksama spryjać raźvićciu niezaležnaha telebačańnia dla Biełarusi, jakoje pačnie viaščać z nastupnaha hodu.
U svaju čarhu lider abjadnanych demakratyčnych sił Alaksandr Milinkievič vykazaŭ nieabchodnaść infarmacyjnaj i maralnaj padtrymki palitźniavolenych u Biełarusi, i, u najbolšaj stupieni, moładzievaha aktyvista Paŭła Krasoŭskaha, jakomu pahražaje śmiarotnaje pakarańnie. Biełaruski palityk zaklikaŭ taksama źviarnuć uvahu mižnarodnaj supolnaści na masavuju haładoŭku viernikaŭ pratestanckaj carkvy ŭ Minsku.
Nahadajem, što lider abjadnanych demakratyčnych sił Alaksandr Milinkievič pradstaŭlaje Biełaruś na mižnarodnym «Forumie-2000», jaki raspačaŭsia 8 kastryčnika ŭ Prazie. Udzieł u Forumie biaruć bolš za 50 viadomych u śviecie palitykaŭ i kulturnych dziejačoŭ.
Kamientary