Pretendenty na pasadu prezidenta Biełarusi Alaksandr Milinkievič i Ryhor Kastusioŭ zajaŭlajuć pra niebiaśpieku straty dziaržaŭnaha suvierenitetu Biełarusi.
«Biezadkaznyja i antydemakratyčnyja dziejańni ŭład nie tolki pieraškadžajuć zbližeńniu Biełarusi z abjadnanaj Jeŭropaj, ale i stvarajuć niebiaśpieku straty dziaržaŭnaj niezaležnaści», — havorycca ŭ sumiesnaj zajavie palitykaŭ, prymierkavanaj da hadaviny nadańnia Viarchoŭnym Savietam mocy kanstytucyjnaha zakona Dekłaracyi ab dziaržaŭnym suvierenitecie Respubliki Biełaruś (25 žniŭnia 1991 hoda).
U zajavie zaznačajecca, što «mnohija z pałažeńniaŭ Dekłaracyi tak i nie byli ŭvasobleny ŭ realnym žyćci». «Z 1994 hoda ŭ Biełarusi pabudavana aŭtarytarnaja madel dziaržavy, jakaja parušaje pravy i svabody biełarusaŭ, hrebuje narodnym volevyjaŭleńniem i ŭsialak strymlivaje raźvićcio demakratyčnaj hramadzianskaj supolnaści», — zajaŭlajuć apazicyjnyja palityki.
Razam z tym, padkreślivajuć Milinkievič i Kastusioŭ, «sučasnaja suvierennaja jeŭrapiejskaja dziaržava — heta demakratyčnaja dziaržava, u jakoj ułada ažyćciaŭlajecca narodam, a nie ŭźniesienym nad usimi dyktataram». «Takaja dziaržava biare ŭdzieł u ahulnajeŭrapiejskich inicyjatyvach, što budujucca na pryncypach pavahi pravoŭ čałavieka i demakratyčnych svabod», — havorycca ŭ zajavie.
«Šlach da sapraŭdnaj niezaležnaści i demakratyi ŭ Biełarusi — heta šlach u abjadnanuju Jeŭropu. Niezaležnaść Biełarusi, pabudova demakratyi i jeŭrapiejski kirunak raźvićcia našaj krainy — uzajemaźviazanyja kaštoŭnaści», — padkreślivajuć namieśnik staršyni Partyi BNF Ryhor Kastusioŭ i lider ruchu «Za Svabodu» Alaksandr Milinkievič.
Kamientary