Rubinaŭ: «Vyniki CT — heta realnaja acenka ŭzroŭniu padrychtoŭki abituryjentaŭ»

Sioleta ŭpieršyniu padčas praviadzieńnia pryjomnaj kampanii ŭ krainie nie było vyjaŭlena surjoznych karupcyjnych parušeńniaŭ.

Pavodle słoŭ Anatola Rubinava, kab całkam likvidavać hlebu dla karupcyi, usie ekzamieny dla abituryjentaŭ siarednich śpiecyjalnych navučalnych ustanoŭ, jakija pastupajuć na asnovie bazavaj adukacyi, u budučym hodzie mohuć prajści ŭ piśmovaj formie, pryčym pa centralizavanych zadańniach, padrychtavanych śpiecyjalistami Respublikanskaha instytuta kantrolu viedaŭ, u vyznačanyja Ministerstvam adukacyi dni. Hetaja prapanova ŭtrymlivajecca ŭ spravazdačy pa vynikach raboty dziaržkamisii na imia kiraŭnika našaj dziaržavy.

U biahučym hodzie siarednija śpiecyjalnyja navučalnyja ŭstanovy ŭpieršyniu pravodzili svaje piśmovyja ŭstupnyja ispyty pa centralizavanych zadańniach. Byŭ raspracavany i zaćvierdžany poŭny ałharytm dziejańniaŭ, skiravany na achovu kanfidencyjalnaści infarmacyi: ad momantu dastaŭki ekzamienacyjnych materyjałaŭ u navučalnuju ŭstanovu, ich zachoŭvańnia da raśpiačatvańnia kanviertaŭ i tyražavańnia zadańniaŭ. Adnak mnohija ź siarednich śpiecyjalnych navučalnych ustanoŭ addali pieravahu vusnym ispytam, heta značyć, pakinuli mahčymaść dla peŭnych manieŭraŭ.

«U budučyni ŭsie abituryjenty pavinny być u roŭnych umovach, a ŭ ścienach SSNU treba pakinuć tolki ekzamieny pa tvorčaści…», — padzialiŭsia svaim bačańniem hetaj situacyi Anatol Rubinaŭ.

Taksama ŭ nastupnym hodzie ekśpierymient, jaki pravodziŭsia dva hady ŭ Biełaruskaj dziaržaŭnaj akademii muzyki i Biełaruskaj dziaržaŭnaj akademii mastactvaŭ, moža raspaŭsiudzicca i na tvorčyja śpiecyjalnaści inšych VNU, naprykład, Biełaruskaha dziaržaŭnaha ŭniviersiteta kultury i mastactvaŭ. Jak viadoma, na centralizavanym teściravańni abituryjenty tvorčych śpiecyjalnaściaŭ zdajuć dźvie dyscypliny: adnu ź dziaržaŭnych moŭ i historyju Biełarusi. Plus tvorčyja ispyty niepasredna ŭ navučalnaj ustanovie. «Vaha» dźviuch dyscyplin centralizavanaha teściravańnia ŭ ahulnaj sumie bałaŭ, zaroblenych na ŭstupnych ispytach, raniej była vielmi istotnaja, i niaredka navat vydatnyja muzyčnyja, artystyčnyja ci mastackija zdolnaści nie mahli stać dla adoranych maładych ludziej propuskam u koła studentaŭ. Tamu ŭ paradku ekśpierymientu było vyrašana pavialičyć «vahu» tvorčych dyscyplin. Zaličeńnie ŭ hetyja dźvie VNU ažyćciaŭlałasia na padstavie ahulnaj sumy bałaŭ, padličanaj pa vynikach praviadzieńnia troch etapaŭ ustupnych ispytaŭ pa pradmiecie «tvorčaść», siaredniaha bała sumy bałaŭ, atrymanaj pa vynikach CT, i siaredniaha bała dakumienta ab adukacyi.

— Kali b abituryjenty pastupali pa raniejšaj sistemie, to mnohija ź ich, zrazumieła, prajści b nie zmahli, a tak my dali šanc samym talenavitym, — upeŭnieny Anatol Rubinaŭ.

Anatol Rubinaŭ kanstatavaŭ, što členaŭ dziaržaŭnaj kamisii nie moža nie chvalavać, jak peŭnaja častka moładzi stavicca da pastupleńnia ŭ VNU i vybaru śpiecyjalnaści. Na što, cikava, spadziajucca maładyja ludzi, jakija pakidajuć aŭdytoryju na praciahu pieršych 30 chvilin z pačatku centralizavanaha teściravańnia? Jany abo zdajuć pustyja błanki adkazaŭ, abo sprabujuć uhadać pravilny adkaz, abo ŭvohule pakidajuć u błankach niecenzurnyja słovy… A kolkaść takich vypadkovych ludziej dachodzić na niekatorych pradmietach da 20 pracentaŭ ad ahulnaj kolkaści tych, chto pryjšoŭ na teściravańnie… Miž inšym, ich vynik taksama ŭpłyvaje na siaredni bał udzielnikaŭ teściravańnia.

— Nie budu chavać, što my nazirali sioleta źnižeńnie siaredniaha bała na CT pa mnohich pradmietach (prykładna na 2,5 adzinki), za vyklučeńniem hieahrafii, historyi Biełarusi i hramadaznaŭstva, — pryznaŭsia staršynia dziaržaŭnaj kamisii. — Kolkaść abituryjentaŭ, jakija nabrali nizkija bały, na žal, pavialičvajecca. Tak, na teściravańni pa matematycy 20 bałaŭ i mienš nabrali 62 pracenty jaho ŭdzielnikaŭ (u 2009 hodzie — 58 pracentaŭ i ŭ 2008 hodzie — 57 pracentaŭ). Pa fizicy nie zmahli pieraadoleć barjer u 20 bałaŭ 73 pracenty z tych, chto zdavaŭ hety pradmiet (letaś — 70 pracentaŭ, a ŭ 2008 hodzie — 66 pracentaŭ). Naturalna, nas cikavili pryčyny takoha stanovišča. Moža być, testy byli składanyja ci formuła padliku bałaŭ u nas niedaskanałaja? Na dumku niezaležnych ekśpiertaŭ, tych ža repietytaraŭ, jakija źjaŭlajucca niezacikaŭlenymi asobami, testy nie byli zvyšskładanymi, i źmiest zadańniaŭ nie vychodziŭ za ramki školnaj prahramy. Zatym my praanalizavali sistemu padliku bałaŭ pry praviadzieńni teściravańnia ŭ inšych krainach i pierakanalisia, što naša sistema — nie horšaja. Značyć, pryčyny źnižeńnia bałaŭ na CT treba šukać u padrychtoŭcy pretendentaŭ na studencki bilet. U hetym hodzie ŭ CT udzielničali 170 tysiač abituryjentaŭ, a sa škoł vyjšła 88 tysiač vypusknikoŭ. Vychodzić, što bolš za pałovu abituryjentaŭ zakončyli škoły ŭ papiarednija hady. Možna mierkavać, što nie ŭsie ź ich dobra padrychtavalisia. Mnohija byli pieršapačatkova nacelenyja na płatnuju zavočnuju formu navučańnia. Tamu vyniki centralizavanaha teściravańnia — heta realnaja acenka ŭzroŭniu padrychtoŭki sioletnich abituryjentaŭ. Adnak, chaču padkreślić, što kali vy pahledzicie na vyniki zaličanych na dzionnuju biudžetnuju formu navučańnia, to tam vy nie ŭbačycie abituryjentaŭ ź nizkimi bałami. Zusim inšaja situacyja — na zavočnaj i płatnaj formach navučańnia…

Pazityŭnaj tendencyjaj možna ličyć toj fakt, što vypuskniki sielskich škoł pa vynikach centralizavanaha teściravańnia zusim niaznačna adstajuć ad haradžan, i heta pry adsutnaści ŭ sielskaj miascovaści instytuta repietytarstva: roźnica ŭ siarednich bałach haradžan i viaskoŭcaŭ składaje ŭ zaležnaści ad pradmieta ad 0,3 da 5 bałaŭ (letaś jana była ad 0,9 ad 6 bałaŭ). Heta, na dumku Anatola Rubinava, śviedčyć u pieršuju čarhu pra pavyšeńnie jakaści padrychtoŭki ŭ sielskich škołach i vyraŭnoŭvańnie startavych mahčymaściaŭ abituryjentaŭ z haradoŭ i sielskaj miascovaści. A, naprykład, u Biełdziaržuniviersitecie na 28 śpiecyjalnaściach z 55 u vychavancaŭ sielskich škoł byli navat bolš vysokija bały, čym u haradžan, tamu zaličeńnie adbyvałasia tam pa ahulnym konkursie. Zakranuŭšy temu asobnaha konkursu dla sielskich abituryjentaŭ, Anatol Rubinaŭ spyniŭsia na adnym upuščeńni: dla hetaj katehoryi abituryjentaŭ nižniaja miaža nie ŭstanoŭlena. Tamu, naprykład, na ramana-hiermanskuju fiłałohiju ŭ BDU zmoh pastupić abituryjent ź sielskaj miascovaści, jaki mieŭ u svaim bahažy 207 bałaŭ. Jon prosta byŭ adziny, chto išoŭ pa asobnym konkursie. A abituryjenty-haradžanie, jakija mieli na 90 bałaŭ bolš, prajści na biudžet nie zmahli. Napeŭna, heta nie zusim pravilna.

Jašče adna balučaja tema — isnavańnie lhotaŭ dla peŭnych katehoryj abituryjentaŭ. Skažam, pa-za konkursam mohuć pastupać dzieci-siroty. U Biełdziaržuniviersitecie na śpiecyjalnaść «palitałohija» zmahli pastupić u hetym hodzie lhotniki, jakija mieli ŭsiaho 118 bałaŭ (pa troch pradmietach CT plus siaredni bał atestata), choć dla inšych abituryjentaŭ prachadny bał byŭ 348. Pryčym lhotniki zaniali 40 pracentaŭ biudžetnych miescaŭ. A na śpiecyjalnaści «biznes-administravańnie» zmoh pastupić abituryjent, jaki mieŭ 109 bałaŭ u ahulnaj sumie, zatoje abituryjenty, jakija nabrali bolš za 300 bałaŭ, znoŭ-taki nie prajšli (prachadny bał byŭ 336). U ciapierašnich praviłach pryjomu jość adna ahavorka: lhotny pryjom moža ažyćciaŭlacca tolki na tych śpiecyjalnaściach, dzie ŭ papiaredni hod konkurs byŭ 5 i bolš čałaviek na miesca. Ale heta pałažeńnie vidavočna sastareła, bo siońnia na tych śpiecyjalnaściach, dzie zaličeńnie adbyvajecca tolki pa vynikach CT, treba kiravacca nie siarednim konkursam, a prachadnymi bałami.

— Miarkuju, što jość peŭnaja katehoryja maładych ludziej, jakim patrabujecca dziaržaŭnaja padtrymka, ale akazvać takuju padtrymku bolš pravilna było b padčas ich navučańnia: heta moža być harantavanaje miesca ŭ internacie, stypiendyjalnaja padtrymka, materyjalnaja dapamoha, ale na ŭvachodzie ŭ VNU nikomu nielha rabić nijakich skidak. Na pieršym płanie pavinny być usio ž taki viedy, — dadaŭ Anatol Rubinaŭ.

U hałoŭnym adukacyjnym viedamstvie krainy nie chavajuć, što vialikaja kolkaść lhotnych katehoryj abituryjentaŭ uskładniaje i raspracoŭku aŭtamatyzavanaj sistemy zaličeńnia. Ministr adukacyi Alaksandr Radźkoŭ paviedamiŭ, što takaja sistema raspracoŭvajecca śpiecyjalistami Biełaruskaha dziaržaŭnaha ŭniviersiteta infarmatyki i radyjoelektroniki i Respublikanskaha instytuta kantrolu viedaŭ z ulikam suśvietnaj praktyki.

— U Azierbajdžanie, dzie ŭžo daŭno dziejničaje aŭtamatyzavanaja sistema, nie isnuje na ŭvachodzie ŭ VNU nijakich lhotaŭ. I navat nieviduščyja ludzi zdajuć tam testy, vykananyja šryftam Brajla, — dadaŭ Alaksandr Radźkoŭ, — u toj čas jak u našaj krainie dla abituryjentaŭ z asablivaściami psichafizičnaha raźvićcia stvarajucca śpiecyjalnyja ŭmovy dla zdačy ekzamiena niepasredna ŭ VNU. Im nie treba ŭdzielničać razam z usimi ŭ centralizavanych ispytach.

Alaksandr Radźkoŭ patłumačyŭ, što aŭtamatyzavanaja sistema zaličeńnia abapirajecca na sistemu pryjarytetaŭ abituryjenta. Abituryjent sam ukazvaje ŭ śpiecyjalnaj formie tyja navučalnyja ŭstanovy ci tyja śpiecyjalnaści, kudy b jon chacieŭ pastupić: pieršy pryjarytet, druhi, treci i hetak dalej. A aŭtamatyzavanaja sistema ŭličvaje jaho pažadańni, nabranuju kolkaść bałaŭ, paraŭnoŭvaje jaho bały z bałami kankurentaŭ i prapanuje jamu tuju VNU i tuju śpiecyjalnaść, kudy jon moža być zaličanym, zychodziačy z nabranych bałaŭ. Treba budzie vyznačycca tolki z kolkaściu pryjarytetaŭ. Miarkujecca, što ekśpierymientalnaja aprabacyja aŭtamatyzavanaj sistemy zaličeńnia adbudziecca ŭ 2012 hodzie, i kali ekśpierymient projdzie ŭdała, to ŭžo ŭ nastupnym hodzie abituryjentam nie pryjdziecca biehać pamiž pryjomnymi kamisijami, nie treba budzie sačyć za raźvićciom konkursu ŭ internecie, a zastaniecca tolki dačakacca pryjemnych navinaŭ. U Ministerstvie adukacyi nie ličać heta fantastykaj. Alaksandr Radźkoŭ upeŭnieny, što lepš ažyćciaŭlać nabor nie na śpiecyjalnaści, a na fakultet. «Mnie padajecca, što pieršyja dva hady studenty pavinny vyvučać ahulnyja kursy, i tolki paźniej vybirać sabie bolš vuzkuju śpiecyjalizacyju», — padzialiŭsia svaim bačańniem situacyi ministr.

Daviedka «Źviazdy»:

Na dzionnuju biudžetnuju formu navučańnia ŭ VNU pa-za konkursam było zaličana 598 čałaviek, ź ich dziaciej-sirot i dziaciej, što zastalisia biez baćkoŭskaj apieki — 522.

Biez ustupnych ispytaŭ zaličana 305 čałaviek.

Pa ahulnym konkursie zaličany: 2126 školnych miedalistaŭ, 5247 vypusknikoŭ sielskich škoł, 167 dziaciej-invalidaŭ i invalidaŭ 1 i 2 hrup, 188 zamiežnych hramadzian, u tym liku 136 hramadzian Rasijskaj Fiederacyi, Kazachstana, Kyrhyzstana i Tadžykistana.

• 0
• 0
• 0
• 0
• 0
• 0
• 0
• 0