Pavodle novych mytnych praviłaŭ, ciapier u Biełaruś možna ŭvozić 50 kilahramaŭ asabistych rečaŭ na sumu da paŭtary tysiačy eŭra.Hruzavyja mikraaŭtobusy, paŭpryčepy, mapedy, rovary, skutery — stali daražej. Ale jość mahčymaść biazmytnaha pravozu bytavoj techniki, čym aktyŭna karystajucca biełarusy.
Na pamiežnym pierachodzie «Varšaŭski most» čerhi rastuć. Z momantu ŭstupleńnia Biełarusi ŭ Mytny sajuz kolkaść achvotnych nabyć tavary za miažoj pavialičvajecca. Voś što paviedamili nam u Bieraściejskaj mytni:
«Kali patrebny matacykł, pralnaja mašyna — ciapier heta budzie daražej. Kali, naprykład, niechta žadaje pieravieźci televizar vahoj mienš za 50 kilahramaŭ, abo mikrachvaloŭku, to ciapier za heta nia treba budzie płacić. A voś što tyčycca „prałki“, to treba budzie apłacić staŭku, jakaja składaje prykładna 15% ad cany tavaru i plus kala 20% padatku na dadatkovuju vartaść».
Tym časam pryvatnyja pieravozčyki adznačajuć, što z uviadzieńniem novych praviłaŭ mahčymaściaŭ dla ŭvozu tavaraŭ u Biełaruś źjaviłasia bolš. Voś što raspavioŭ žychar Bieraścia Hienadź, jaki časta byvaje ŭ Polščy:
«Raz na miesiac ja mahu niejkuju reč uvozić u Biełaruś. I heta dobra, bo apošnija piać hadoŭ naahuł niešta ŭvieźci było prosta niemahčyma. Voś, naprykład, ja kupiŭ u Polščy televizar, raniej za jaho ja b byŭ vymušany płacić kala 500 eŭra».
Košty ŭ Polščy, adznačaje Hienadź praktyčna ŭdvaja mienšyja, čym u Biełarusi za analahičnyja tavary. Mohuć nie prapuścić z tavaram dadomu, skazaŭšy, što vielmi časta pierasiakaješ miažu. Tamu mnohija namahajucca zrabić vizy nia tolki sabie, ale i rodnym, i padčas pajezdak zapisvajuć tavary na ich.
Tym nia mienš, jak adznačaje žychar Bieraściejskaha rajonu Valer, uźnikajuć dadatkovyja składanaści z tym, što kolkaść žadajučych prajechać praź miažu pavialičvajecca, rastuć čerhi. Mytniki taksama pačali bolš pilna praviarać i kantralavać patok tavaraŭ. Za častyja pajezdki biełaruskija mytniki mohuć nie puścić z tavaram na terytoryju Biełarusi:
«Mohuć nie prapuścić z tavaram dadomu, skazaŭšy, što vielmi časta pierasiakaješ miažu. Pryčym arhumentujuć heta tym, što nia maješ prava časta niešta pieravozić. Razvaročvajuć nazad u Polšču z tavaram, jaki pavinien być tam pakinuty. Ja niejak jechaŭ z kołami, što dazvolena zakanadaŭstvam, ale mytniki skazali, što vielmi časta ježdžu i pryjšłosia načavać u Terespali, a ranicaj znoŭ jechać i prasić u načalnika źmieny».
Kamientary