Zatrymanych «padpalščykaŭ» usio boleje

Termin źniavoleńnia anarchistaŭ, zatrymanych pavodle padazreńnia ŭ napadzie na rasijskaje pasolstva, skončyŭsia, ale maładych ludziej nie vyzvalili. Śpis padazronych pavialičvajecca.

9 vieraśnia skončyŭsia termin źniavoleńnia anarchistaŭ, zatrymanych 3 vieraśnia, adnak na volu jany nie vyjšli. U čaćvier, a 15-j baćki i siabry aktyvistaŭ čakali ich la ścienaŭ izalatara pa zavułku Akreścina ŭ Minsku. Dziažurny milicyjant IČU paviedamiŭ, što zatrymanych pieraviali u RUUS Leninskaha rajona, adnak u leninskim RUUS infarmacyju nie paćviardžajuć.

3 vieraśnia maładych ludziej, što žyli kamunaju na adnoj kvatery, zatrymali pa padazreńni ŭ padpale słužbovaj mašyny kala rasijskaha pasolstva 30 žniŭnia. Im było pradjaŭlena abvinavačvańnie ŭ hrupavym chulihanstvie. Na praciahu troch sutak rabiłasia pravierka. Zatym spravy pierakvalifikavali, dy aktyvistaŭ dapytvali ŭžo z nahody napadu na Dom prafsajuzaŭ, u jakim nočču 1 maja nieviadomyja vybili škło. Na hety raz spravy byli zaviedzienyja za indyvidualny napad, ale pad padazreńni pravaachoŭnych orhanaŭ patrapili siamiora čałaviek anarchisckich pohladaŭ.

Kolkaść padazronych ŭ datyčnaści da incydentu la pasolstva Rasii raście. U sieradu zatrymali jašče čatyroch čałaviek, siarod ich — siabra «Pravaha Aljansu» Ihar Čapiha, aktyvist ekałahičnaha ruchu Uładzimir Vałodzin, jakoha abvinavačvajuć u padpale dźviarej budynka «Biełarusbanka» na Partyzanskim praśpiekcie ŭ Minsku, jaki zładzili 30 krasavika anarchisty. Zatrymanuju 3 vieraśnia Taćcianu Siemianiščavu praz 12 hadzin adpuścili. Z nahody zatrymańniaŭ dy pieratrusaŭ jana paśpieła dać intervju Jeŭraradyjo, ale 9 vieraśnia jaje zatrymali iznoŭ — supracoŭniki KDB znajšli na raniej kanfiskavanym žorstkim dysku niejkuju važnuju dla śledstva infarmacyju.

Padčas dopytu dziaŭčyna parezała sabie ruki kancylarskim nažom i joj vyklikali chutkuju dapamohu, apaviadajuć siabry Taćciany.

Pavodle kryminalnaha kodeksu, maksimalny termin źniavoleńnia biez pradjaŭleńnia abvinavačvańnia abvinavačańnia składaje 3 sutak. Prakuror moža praciahnuć jaho da 10 sutak. Siamiora anarchistaŭ užo adsiadzieli dva razy pa troje sutak pa roznych abvinavačvańniach. Pa słovach siabroŭ, na zatrymanych sprabujuć prypisać roznaje, niekatorych padazrajuć u padpałach u Mahiloŭskaj vobłaści. Niekatorym baćkam źniavolenych milicyjanty patłumačyli, što ichnija dzieci padazrajucca ŭ padpale dźviarej budynka «Biełarusbanka» 30 krasavika. Advakatami zatrymanych vystupajuć Pavieł Sapiełka i Tamara Sidarenka.

«Zaraz viadoma, što anałahičnyja dopyty, praŭda biez zatrymańniaŭ, adbyvalisia taksama ŭ Salihorsku i Homieli,« — paviedamiŭ pradstaŭnik infarmacyjna-vydavieckaha ahienstva «Postmiedyja», jakoje zajmajecca manitorynham situacyi.

Heta nie pieršyja ckavańni anarchistaŭ. Zatrymańni, dopyty byli i raniej. Ale jany nikoli nie dachodzili da kryminalnych spravaŭ, dy abvinavačanych nie trymali pa niekalki sutak.

Adkaznaść za napad na ambasadu Rasii i paźniejšuju ataku na izalatar časovaha utrymańnia, uziała na siabie nibyta arhanizacyja anarchistaŭ «Siabry svabody». U zajavie mifičnaj aŭtanomnaj supołki idejnyja anarchisty źviartajuć uvahu na pryzyvy «za demakratyju», zusim nie charakternyja dla antydziaržaŭnych pohladaŭ anarchistaŭ. Isnavańnie «Siabroŭ Svabody» vyhladaje sumnieŭnym, bolš nahadvaje pravakacyju.

Z-za incydentu kala rasijskaha pasolstva na ciapierašni momant źniavolenymi zastajucca 11 čałaviek,

siarod jakich nie tolki anarchisty. Imiony zatrymanych: Ihar Čapiha, Taciana Siemianiščava, Istazaraŭ Ihar, Chocina Valeryja, Ślusaraŭ Siarhiej, Dziadok Mikałaj, Anton Łapcionak, Žynhieroŭski Alaksiej, Franckievič Alaksandr, Siarhiej Papoŭ, Uładzimir Vałodzin.

Pravaachoŭnyja orhany zatrymańni nie kamientujuć. «Idzie śledstva, žurnalisckaje ŭmiašalnictva moža jamu tolki zaškodzić,« — paviedamiŭ Kanstancin Šalkievič, namieśnik načalnika upraŭleńnia infarmacyi MUS.

Nahadajem, na terytoryju rasijskaha pasolstva viečaram 30 žniŭnia nieviadomyja kinuli butelki z zapalnaj sumieśsiu, padpaliŭšy takim čynam słužbovy aŭtamabil.

Juljan Misiukievič

• 0
• 0
• 0
• 0
• 0
• 0
• 0
• 0