Biełaruskamoŭnaja Windows 7 źjavicca ŭ nastupnym hodzie
Praca nad pierakładam viadziecca sa studzienia.
Praca nad pierakładam viadziecca sa studzienia.
Adzin ź inicyjataraŭ pierakładu Aleś Bułojčyk paviedamiŭ, što ŭžo zroblena tracina pracy. «My idziom ad bolš užyvalnaha da mienš užyvalnaha», — tłumačyć Aleś. I adznačaje, što pakul niekatoryja prahramy z pakieta Windows biełarusizavać nie buduć: Internet Explorer, Media Player. Pa jaho słovach, poŭnaha pierakładu nie maje navat rasiejskamoŭnyja viersija.
Razam z Alesiem nad pierakładam pracuje Usievaład Čorny. Jany zaprašajuć inšych ludziej dałučacca ([email protected]).
Da viasny płanujecca zrabić pierakład amal usich paviedamleńniaŭ, jakija bačyć šerahovy karystalnik Windows 7.
Ale ŭžo ciapier možna skarystacca pieršymi vynikami.
Maładyja ludzi stvarajuć ustaloŭnik, jaki nie zamianiaje anhłamoŭnyja ci rasiejskamoŭnyja fajły Windows 7, a da isnujučych dadaje biełaruskija. Tamu nie idzie havorka, kab vypuskać na dyskach biełaruskamoŭnuju apieracyjnuju sistemu. Pakunak pierakładu raspaŭsiudžvajecca biaspłatna.
Nijakaj padtrymki ad kampanii Microsoft, jakaja vypuskaje Windows, niama.
Były dyrektar Microsoft u Biełarusi i Ukrainie Valer Łanavienka havaryŭ jašče try hady tamu pra mahčymaść stvareńnia biełaruskamoŭnaj viersii Windows Vista. Ale sprava dalej za słovy nie pajšła. Aleś Bułojčyk adznačaje, što letaś znoŭ byli zvaroty ŭ kampaniju ab biełarusizacyi apieracyjnaj sistemy. Ale ŭsie adkazy zvodzilisia da taho, što Microsoft u pieršuju čarhu choča zarablać hrošy na svaim pradukcie. A na biełaruskamoŭnym rynku heta nie mahčyma. Tamu Aleś nie bačyć patrebnym źviartacca i da novaha kiraŭnika biełaruskaha pradstaŭnictva kampanii Michaiła Machańka.
Praca Bułojčyka i Čornaha — nie pieršaja sproba abiełarusić apieracyjnuju sistemu. Raniej rabilisia pierakłady papiarednich viersij Windows. Prahramist Aleh Azaroŭski stvaryŭ asobny sajt, na jakim raźmiaściŭ papularnyja prahramy dla Windows na biełaruskaj movie. Ale najbolš udałym na siońnia źjaŭlajecca pierakład Linux.
Windows — heta siamiejstva apieracyjnych sistem karparacyi Microsoft. Pad kiraŭnictvam hetych sistem pracuje kala 90% piersanalnych kampjutaraŭ.
Kamientary