Zianon Paźniak: Dzie Niaklajeŭ?

Takoj iłžy my nia viedali nikoli ŭ historyi, navat pry balšavikach. Zdajecca, što ŭsio hramadztva pahruziłasia ŭ jaje lipkuju tvań. Iłhuć usiudy: va ŭładzie, na telebačańni i radyjo, u KHB i milicyi, u CVK i na vybarach, u achovie zdaroŭja i ŭ druku, u justycyi i sudach. Iłhuć cynična i nachabna, nie mirhajučy i hledziačy ŭ vočy.

U śviecie chłuśni čałaviek tracić aryjentacyju. Heta jakraz toje, čaho nijak nia mohuć zrazumieć ludzi z Zachadu, traplajučy na Ŭschod. Niadaŭna zachodnija žurnalisty (što byli śviedkami pabićcia narodu na płoščy Niezaležnaści ŭ Miensku) pieražyli cyvilizacyjny šok, pasłuchaŭšy na pres-kanferencyi hałoŭnaha arhanizatara i zakazčyka hetaha złačynstva, jaki vystupiŭ u roli abvinavaŭcy. Tut jakraz zdaryŭsia toj vypadak, kali zachodniki, jakija byli tam i sami bačyli tuju rečaisnaść, pačuli na kanferencyi pierakručany jaje kamentar u vulharnaj frazealohii.

Z «šoku» jany, vidać, jašče doŭha nia vyjduć. Chacia sutnaść źjavy viadomaja. Fantan nieadekvatnaj niekantralujemaj chłuśni — heta vynik skryŭleńnia dušy, psichičnaje zbačenstva, kštałtu kleptamanii. Asoba, jakuju apanavała chłusamanija, nia moža nia chłusić, pra što b jana ni kazała. U pabytovych dačynieńniach čałaviek, što zaležny ad chłusamanii, tracić usialakuju pavahu ŭ asiarodździ. Adnak jon nia ŭ stanie ŭpłyvać na svajo asiarodździe. Kali ž taki subjekt uznosicca na viaršyniu niekantralujemaj aŭtarytarnaj ułady (redki vypadak), to chłusić pačynaje ŭsia ŭłada. Jaje chłuśnia ŭpłyvaje na zdaroŭje hramadztva.

Uvieś internetny śviet dakumentalna ŭ videa-zapisach ubačyŭ bandyckaje napadzieńnie specnazu na Ŭładzimiera Niaklajeva ŭ čas vybarčaj kampanii, bačyli jahony ciažki nieprytomny stan, pabituju hałavu i tvar.

I voś charakterny prykład publičnaj chłusamanii:

«Milicyja źbiła Niaklajeva, aj-jaj-jaj, aj-jaj-jaj! — iranizuje Łukašenka. — Ja znachodžu ministra achovy zdaroŭja Žarko ŭnačy, kažu: «Vasil Ivanavič, ja ciabie pierakanaŭča prašu, prakantraluj, akažycie dapamohu. Ty ž razumieješ, što smurodu stolki, što dalej niama kudy». Jon mnie kaža: «Dy supakojciesia vy, tam drapina na patylicy i siniak pad vokam…» Niaklajeŭ rviecca na płošču, bo tam bieź jaho ŭžo dzielać uładu. Padziei na płoščy skončylisia. Sabrali kansylijum, jaho nakiroŭvajuć na ambulatornaje lačeńnie. Telefanuje mnie ministar i kaža: «Dy my jaho sa špitala vyturyć nia možam. Pad dźviuma koŭdrami schavaŭsia». Znajšoŭ tam adstojničak, dzie vyrašyŭ cichieńka adlažacca. Nia vyjdzie!»

Nočču z 19 na 20 śniežnia siem zamaskavanych asobaŭ u čornym uvarvalisia ŭ pałatu reanimacyi špitala chutkaj dapamohi, dzie pad kropielnicaj lažaŭ źbity paet Niaklajeŭ, vyrvali katetary, kinuli paeta na balničnuju koŭdru i pavałakli na joj preč.

Da siońniašniaha dnia (čaćvier, 23 śniežnia) nieviadoma, što ź Niaklajevym, ci žyvy jon i dzie jon znachodzicca.

Čarhovy iłhun režymu ministar unutranych spraŭ A. Kulašoŭ 22 śniežnia skazaŭ nastupnaje: «Zatrymanyja byłyja kandydaty ŭ prezydenty Andrej Sańnikaŭ i Ŭładzimier Niaklajeŭ absalutna zdarovyja, absalutna narmalna, kamfortna siabie adčuvajuć… i znachodziacca ŭ adpaviednych miescach».

Nastupny chłus paviedamiŭ, što «adpaviednaje miesca» — heta turma KHB. I što byccam by Niaklajeŭ tam. Uskosna jano nibyta paćvierdziłasia. Zatrymanyja, jakim režym zaplanavaŭ «pryšyć» kryminał, sapraŭdy znachodziacca ŭ KHB. Ź niekatorymi ŭžo bačylisia advakaty.

Ale nichto nia bačyŭ Niaklajeva, nichto nia ŭziaŭ jamu pieradačy, nie dapuścili advakata.

Toj, chto viedaje maniery łukašysckaha režymu i Łukašenki, razumieje złaviesnaść takoha stanovišča.

Biełarusy musiać daznacca, dzie znachodzicca vykradzieny režymam naš znakamity paet Uładzimier Niaklajeŭ. Jaho nichto nie aryštoŭvaŭ. Suprać jaho byli vykananyja kryminalnyja dziejańni: napad, źbićcio i vykradańnie.

Dzie Niaklajeŭ? Hetaje pytańnie – usim uładnym chłusam. Dzie paet? U mianie padazreńnie, što tut niešta nia prosta tak. My pamiatajem, jak (pa-miedycynsku) źniščyli ŭ špitali ŭ Baraŭlanach vialikaha Vasila Bykava. Kali z paetam što zdarycca, to Vy, chłusy, ŭsioj vašaj čornaj kryvioj nia zmyjecie jahonuju kroŭ!

Dzie Niaklajeŭ? Hetaje pytańnie — usim uładnym chłusam. Dzie paet? U mianie padazreńnie, što tut niešta nia prosta tak.

Kali z paetam što zdarycca, to Vy, chłusy, ŭsioj vašaj čornaj kryvioj nia zmyjecie jahonuju kroŭ!

18 śniežnia byŭ zakładzieny Ruch «Za novyja vybary biez Łukašenki». Praces tolki pačynajecca. Treba ŭklučacca ŭ hetuju spravu. Ale najpieršaja zadača — heta vyzvaleńnie ŭsich aryštavanych u čas paboišča, arhanizavanaha režymam 19 śniežnia ŭ Miensku, i pryciahnieńnie da kryminalnaj adkaznaści pravakataraŭ dy režymnych arhanizataraŭ pabićcia ludziej.

Faktaŭ dastatkova. Jość fatahrafii pravakataraŭ i aŭdyjo-zapisy ichnych pieramovaŭ pa racyi sa specnazam. Kryminalnuju spravu treba budzie adčyniać, ale na łavie padsudnych pavinny siadzieć nia tyja, kaho źbili, a tyja, chto źbivaŭ ludziej, chto demanstratyŭna raźbivaŭ vokny ŭ Domie ŭradu.

• 0
• 0
• 0
• 0
• 0
• 0
• 0
• 0