ZŠA hatovy zabaranić biznes z «Biełnaftachimam»

ZŠA majuć namier uvieści novyja sankcyi suprać Biełarusi — u suviazi ź pieraśledami aktyvistaŭ apazicyi paśla śniežańskich prezidenckich vybaraŭ. Pra heta ŭ čaćvier na słuchańniach u Sienacie paviedamiŭ pamočnik dziaržsakratara ZŠA Filip Hordan. Jon nahadaŭ, što ŭ minułym sankcyi, jakija ŭžyvalisia da Biełarusi, «byli zaŭvažany i akazvali realnaje ŭździejańnie».

Słuchańni na temu «Nastup na demakratyju ŭ Biełarusi: adkaz režymu Łukašenki» prajšli ŭ čaćvier u padkamitecie pa spravach Jeŭropy Sienata ZŠA. Amierykanskija sienatary zasłuchali ekśpiertaŭ, kab pryniać adekvatnyja zachady suprać aficyjnaha Minsku.

Jak paviedamlaje «Hołas Amieryki», zaprošany na słuchańni pamočnik dziaržsakratara Filip Hordan zajaviŭ, što «u tym vypadku, kali ŭrad Biełarusi nie źmienić kursu, Złučanyja Štaty rychtujuć dziejańni, jakija ŭklučajuć try asnoŭnych nakirunki, što stanuć nastupstvami dziejańniaŭ biełaruskich uładaŭ. Heta budzie razhlad dadatkovych sankcyj suprać Biełarusi, dapamoha apazicyjnym siłam i niezaležnym hramadskim hrupam, a taksama ciesnaja praca ź Jeŭrapiejskim sajuzam, kab pasłać ahulny i dakładny sihnał uradu [Biełarusi]».

Spadar Hordan detalova patłumačyŭ, u čym heta budzie zaklučacca:

1. Adklikańnie vydadzienaj u 2008 hodzie hienieralnaj licenzii, jakaja dazvalaje amierykanskim hramadzianam vieści biznes z dvuma paduładnymi kampanijami biełaruskaj dziaržaŭnaj naftavaj i chimičnaj kampanii «Biełnaftachim».

2. Pašyreńnie śpisu dziaržaŭnych čynoŭnikaŭ, jakim zabaronieny ŭjezd u ZŠA.

3. Uviadzieńnie dadatkovych finansavych sankcyj, jakija raspaŭsiudžvajucca na šerah pryvatnych fizičnych i jurydyčnych asobaŭ.

U słuchańniach akramia Filipa Hordana taksama ŭdzielničali: sienatar Dzik Durbin, jaki niadaŭna naviedaŭ Biełaruś, Tom Mielia — namieśnik pamočnika dziaržsakratara pa pytańniach demakratyi i pravoŭ čałavieka, Devid Kramier — dyrektar «Frydam Chaŭs», Kien Uołak — prezident Nacyjanalnaha demakratyčnaha instytuta i Natalla Kalada — zasnavalnica i dyrektarka biełaruskaha «Svabodnaha teatru».

Padzielenyja na dva pasiedžańni słuchańni adkryŭ svaimi kamientarami sienatar Durbin. Jon raskazaŭ pra svaje ŭražańni ad pajezdki ŭ Biełaruś i sustrečach z rodnymi tych, chto akazaŭsia za kratami paśla 19 śniežnia. Na jaho prośbu ŭdzielnikam pasiedžańnia pakazali padborku fotazdymkaŭ blizkich aryštavanych apazicyjanieraŭ.

«Biełaruski KDB pastajanna ŭryvajecca ŭ ich damy, abšukvaje ich, pieraśleduje ich, padstrojvaje telefanavańni. Hetaja staraja stalinskaja technika, jakaja dahetul žyvie i kvitnieje ŭ Biełarusi», — adznačyŭ sienatar Durbin.

Jon taksama raskazaŭ pra svaju sustreču ź ministram zamiežnych spraŭ Biełarusi Siarhiejem Martynavym.

Sienatar asabliva byŭ aburany cynizmam biełaruskaha dypłamata, kali toj paraŭnoŭvaŭ biełaruskuju «demakratyju» z amierykanskaj.

Tomas Mielia, jaki taksama dniami naviedaŭ Biełaruś, skazaŭ, što realii siońniašniaj Biełarusi jaho šakavali. Havoračy ab šmatlikich parušeńniach pravoŭ čałavieka ŭ Biełarusi, jon źviarnuŭ uvahu na artykuł Kryminalnaha kodeksu pra adkaznaść za dziejnaść ad imia niezarehistravanaj arhanizacyi.

«U ciapierašniaj situacyi ŭ Biełarusi heta značyć, što siemji palityčnych źniavolenych nie mohuć nazyvać siabie „kamitetam pa abaronie palitźniavolenych“, pakolki hetaja nazva pryviadzie ich da kryminalnaha pieraśledu», — adznačyŭ amierykanski dypłamat.

Taksama Mielia raskazaŭ pra pieratrus u ofisie Abjadnanaj hramadzianskaj partyi ŭ Homieli i čarhovuju kanfiskacyju abstalavańnia, jakoje tolki nabyli paśla papiaredniaj kanfiskacyi.

Kamientujučy zaściarohi sienataraŭ pra toje, što sankcyi suprać biełaruskaha režymu mohuć zblizić jaho z Rasijaj, dyrektar «Frydam chaŭs» Devid Kramier zaŭvažyŭ: ««Nam treba bolš nie hladzieć na Biełaruś skroź rasijskuju pryzmu. U 2006 hodzie ES i ZŠA nakłali sankcyi na Łukašenku zychodziačy z taho, što jon žorstka abychodziŭsia sa svaim narodam, a nie zychodziačy z dobrych ci kiepskich adnosinaŭ pamiž Maskvoj i Minskam.

My nie pavinny adstupać ad hetaha padychodu, taksama jak my nie pavinny pieražyvać za toje, što sankcyi padšturchnuć Łukašenku da Rasii».

Kien Uołak z Nacyjanalnaha demakratyčnaha instytuta ŭ Vašynhtonie zajaviŭ, što Biełaruś pavinna być vyklučana ź mižnarodnych arhanizacyj, uklučna z ABSIE. Jon adznačyŭ, što «ZŠA pavinny dziejničać razam ź Jeŭrapiejskim Sajuzam i inšymi siabrami mižnarodnaj supolnaści».

Adkazvajučy na pytańnie, ci dapamoža pryciahnieńnie Rasii ŭ hety praces, Natalla Kalada skazała, što Maskva nie nadaje značeńnia parušeńniam pravoŭ čałavieka, ale moža dałučycca da mižnarodnych dziejańniaŭ, kali zmoža atrymać z hetaha vyhadu.

• 0
• 0
• 0
• 0
• 0
• 0
• 0
• 0