«Naša słova» № 1000

2 lutaha 2011 hoda vyjdzie z druku 1000-ny numar haziety «Naša słova».

27 červienia 1989 h. u Miensku adbyŭsia Pieršy ustanoŭčy źjezd Tavarystva biełaruskaj movy imia F. Skaryny i ŭžo ŭ sakaviku 1990 h. pačaŭ vychodzić štomiesiačny biuleteń «Naša słova».

Staršyniom TBM i redakcyjnaj kalehii biuletenia staŭ adzin z samych niaŭrymślivych zmaharoŭ za biełaruskuju movu narodny paet Biełarusi Nił Hilevič — hałoŭny inicyjatar i arhanizatar ich stvareńnia. Ciaham taho hoda «Naša słova» rychtavałasia na hramadskich asnovach, i asnoŭny ciažar hetaj pracy ŭziaŭ na siabie Hienadź Tumaš.

Užo sa studzienia 1991 h. biuleteń pieratvaryŭsia ŭ vaśmipałosnuju ŭsiebiełaruskuju štotydniovuju hazietu, hałoŭnym redaktaram jakoj staŭ viadomy piśmieńnik Erniest Jałuhin.

Vychad haziety «Naša słova» byŭ sustrety bolšaściu biełaruskaj hramadskaści ź vialikaj prychilnaściu i navat entuzijazmam. Hazieta adyhrała značnuju rolu ŭ spravie pryniaćcia Viarchoŭnym Savietam BSSR Zakona ab movach, u adpaviednaści ź jakim biełaruskaja mova abvieščana dziaržaŭnaj; Dekłaracyi ab dziaržaŭnym suvierenitecie Biełaruskaj SSR i nadańnia joj statusu kanstytucyjnaha zakona; źmienie nazvy BSSR na Respubliku Biełaruś, pryniaćcia Dziaržaŭnaha hierba i ściaha.

Hazieta «Naša słova» źmiaščała cikavyja i važnyja artykuły pa kultury movy, publicystyčnyja, histaryčnyja. movaznaŭčyja i inšyja materyjały, jakija mocna ŭpłyvali na spravu biełaruskaha adradžeńnia. Rola i aŭtarytet «Našaha słova» značna ŭzraśli, i nakład haziety dasiahnuŭ bolš za 8000 asobnikaŭ.

Paśla refierendumu 1995 h., kali dziaržaŭnaj movaj była abjaŭlena nie tolki biełaruskaja mova, ale i ruskaja, moŭnaja situacyja ŭ krainie vielmi źmianiłasia. Biełaruskaja mova stała aktyŭna vydalacca z usich śfier hramadskaha žyćcia. U krasaviku 1997 h. urad admoviŭ u dziaržaŭnym finansavańni haziety. Dziakujučy rašučaj pazicyi Lidskaj haradskoj arhanizacyi TBM, vychad haziety «Naša słova» na pryvatnyja srodki byŭ adnoŭleny ŭžo ŭ listapadzie 1997 h. u Lidzie, dzie jana i vydajecca da hetaha času. Ad 1997 hoda i da siońnia hazietu ŭznačalvaje paet i publicyst Stanisłaŭ Sudnik.

TBM i hazieta «Naša słova» aktyŭna pracujuć na nivie biełaruščyny. I kali ŭ pieršyja bijahrafičnyja hady haziety žyła vieraj u moŭnaje parazumieńnie, to siońnia, ciapier patrebna mužnaja nastojlivaść: my jość! My budziem!

«Naša słova» — zaŭsiody adlustroŭvaje pracu śviadomych patryjotaŭ na karyść biełaruščyny i asabliva biełaruskaj movy. Hazieta maje aśvietnickaje i instruktyŭnaje značeńnie dla arhanizacyj TBM. Dla siabroŭ TBM jana nieabchodna, kab być u kursie padziej i dziejničać uzhodniena, u adnym kirunku. Jana źviazvaje nas duchoŭna: drukuje dumki, śvietapohlady, jakija jadnajuć siabroŭ i prychilnikaŭ TBM.

• 0
• 0
• 0
• 0
• 0
• 0
• 0
• 0